1 Corinthians 10
10
Netsodaꞌne, ꞌenne bugha whutsꞌodulꞌeh
1ꞋEt ꞌawet sulhutsinke netsodaꞌne, ꞌenne bunatsꞌodoolnoh hukwa lheꞌnuszun. Soo kwꞌus yanyus tsꞌe ꞌuntꞌohne, yatooꞌ toh lhuhúzdil. 2ꞋEt netsodaꞌne kwꞌus ꞌinkꞌez yatooꞌ ꞌi bulh tsꞌiyawh Moses tsꞌun too beꞌ binla. 3Tsꞌiyawh tꞌalh-i yakꞌuz hainkat-i, ꞌi ndunne tsꞌiyawh huyanꞌal. 4ꞋInkꞌez tsꞌiyawh ndai huyitnaiꞌ yakꞌuz tsꞌe ha huyanla ꞌi ꞌalhgoh huyitnaiꞌ. Ndi yakꞌuz whutseꞌ ꞌi buwhusaíniltsꞌut, ꞌet huwa ꞌi ootsꞌu ha yíjul-i, ꞌi tsꞌiyawh ꞌalhgoh huyitnaiꞌ. ꞋInkꞌez ndi tse ꞌi Christ unli ꞌuntꞌoh. 5ꞋEt hoontsꞌi kꞌus lhane Yakꞌusda ba ꞌaw lheꞌhízooꞌ. ꞋEt huwa dune lhuhootꞌih-un tsꞌe buzi ndulcho whe núdistꞌai suliꞌ.
6ꞋEt ndi tsꞌiyawh oogha tꞌetsꞌoninzun-i hukwꞌunꞌa ꞌuhooja. ꞋEt huwa la ꞌaw ꞌenne bukꞌunꞌa lubeshi ꞌuztilhꞌelh hukwa ꞌuznoozin ꞌaitꞌoh. 7ꞋInkꞌez whulohne, ꞌenne bukꞌunꞌa ꞌukꞌeltsi nohba ꞌalha ꞌootꞌeꞌ junih. ꞋEt whuz unꞌa ꞌukꞌuneꞌ ꞌúsgus whe ndutni, “Dunene hudilhtsꞌi, naꞌhitꞌal ꞌinkꞌez ꞌuhitnaiꞌ chaꞌ huja. ꞋEt dodindil ꞌinkꞌez ꞌukꞌenus hoontsiꞌ kꞌunꞌa nahúwhulhya.” 8ꞋEnne bukꞌunꞌa tsꞌekoo bulh lubeshi olhchoot junih! Whulohne ꞌet whuz unꞌa lubeshi ꞌuhinla. ꞋEt huwa ꞌilhudzin 23,000ne ꞌet ꞌultsukne yaidla. 9ꞋEnne bukꞌunꞌa Christ tsꞌoolhdzih leꞌ tsꞌootꞌen junih. Whulohne huyóolhdzai ꞌet huwa tlꞌughus be higan. 10ꞋInkꞌez ꞌenne bukꞌunꞌa howu tádohtni tuzai junih! Whulohne ꞌet whuz unꞌa nduhuja ꞌet huwa mbe la musai ulhtsih-un ndunne tsꞌiyawh gak hubulhtsi.
11ꞋEt ndi ꞌi tsꞌiyawh buba ꞌet ndúhooja ꞌi tsꞌiyawh ooghá tꞌetsꞌonozin ha ndóohooja, ꞌinkꞌez neba ꞌukꞌeyanguz whe wheni ꞌuneúlhni. Wheni ꞌutsꞌintꞌoh ndi yun kꞌut uzdilhtsꞌi-un hukwꞌunꞌa, wheni neba ꞌawet whula toh suliꞌ. 12ꞋEt huwa mbe la soo usyin unli-un naꞌdunúdzun-un, ꞌen soo cho howoleꞌ doo ka la naooltsꞌit. 13ꞋEt ndet whe netsudule dunene ubóolhdzih, whuz unꞌa za nohni cha nohóolhdzai. ꞋEt hoontsꞌi Yakꞌusda ꞌaw nela dootnih ꞌaitꞌoh. Ndet whe netsudule nohóolhdzih, ꞌet dáwhultsuk ulhtus-i be whulh áhyin, ꞌet za Yakꞌusda ba sooꞌ whutatꞌelh. ꞋEt nohóolhdzih de, ꞌet de Yakꞌusda whuchꞌa tilhdoh ꞌinkꞌez nohbaꞌ whutilelh.
14ꞋInka ookꞌesiꞌne, ꞌukꞌeltsi nohba ꞌalhaꞌ ꞌuntꞌoh-i, ꞌi oochꞌa neꞌoohtꞌen.
ꞋUkꞌeltsi tsꞌu teniꞌ noolhdzin junih
15Whunihne kꞌunꞌa nohbulh yasduk. Nohnihchꞌoh soo cho tsꞌihꞌun neóonahꞌaih daja dusni-un. 16ꞋEt ndi lubot ꞌi be musi tsꞌutni, ꞌet ꞌalhaꞌ Christ duzkaiꞌ bulh ꞌútsꞌintꞌoh nuhzún eh? A! ꞋInkꞌez ndi lhes lhtsꞌe uzdanyuz ꞌet ꞌalhaꞌ Christ ooyustꞌe bulh ꞌutsꞌintꞌoh nuhzun eh? A! 17ꞋEt daltsukne tsinli, ꞌet hoontsꞌi lhes ꞌilho za ꞌutsꞌintꞌoh ꞌinkꞌez yustꞌe ꞌilho za unli. Ndi lhes ꞌilho wheni tsꞌiyawh bulh ꞌutsꞌintꞌoh ꞌet huwa.
18Israel ooduneꞌne kꞌoh tsꞌe tꞌeóonúhzun eh? Soo cho whunulhꞌen, mbe la loodel gha tꞌaih-i huyanꞌalne, ꞌenne ndi loodel bulh ꞌúhintꞌoh. 19Daja dusni ꞌet tꞌeóonúhzun eh? Daja nuhzun? ꞋUkꞌeltsi hoonli ꞌuntꞌoh eh? Kꞌus ꞌukꞌeltsi gha tꞌaih-i, ꞌi cha eh hoonli unli? ꞋAwundooh! 20ꞋEt ꞌudun yun kꞌut whutꞌenne ndai la ꞌukꞌeltsi gha huyaꞌaih-i, ꞌi ntsiꞌne nududehne, ꞌenne butsꞌu hitulhdilh ꞌaw Yakꞌusda tsꞌun iloh. ꞋInkꞌez nohni ntsiꞌne nududehne bulh ꞌutihtꞌelh nohba hukwa lheꞌnúszun ꞌet huwa. 21NeMoodihti oolubot ꞌinkꞌez ntsiꞌne nududehne bulubot bulh ꞌaw lhtohtsꞌootnaiꞌ ꞌaítꞌoh. ꞋEt neMoodihti ooludab ꞌinkꞌez ntsiꞌne nududehne buludab bulh ꞌaw nankiltꞌoh ookꞌut ꞌutsꞌooꞌalh huba lheꞌhóotꞌoh. ꞋAw whuz unꞌa ꞌuhóneh ꞌaítꞌoh! 22ꞋEt neMoodihti ꞌóotálnih uztilhtselh eh? ꞋAw ꞌet ndutsꞌóotꞌen huba lheꞌhóotꞌoh. ꞋEn ba nus tsꞌilhtus nahzun eh? ꞋAwundooh!
Yakꞌusda whe dulhtiꞌ-un, ꞌet whuz unꞌa dune oohleꞌ hubaꞌ hoontꞌoh
23ꞋEt ꞌaw hoonliyaz whuchꞌa nusjoot-un hooloh, ꞌet hoontsꞌi whulukhun sba lheꞌhóozooꞌ. Hoonliyaz whuchꞌa nusjoot-un hooloh, ꞌet hoontsꞌi whulukhun ndutistꞌelh de ꞌaw dune whe bula ꞌeꞌwhudóneh ꞌaitꞌoh. 24Wheni za neba unzoo-i, ꞌi haꞌ tsꞌootꞌen ꞌaítꞌoh. ꞋEt hoontsꞌi ꞌuyoonne ba unzoo-i, ꞌi za haꞌ tsꞌootꞌen.
25ꞋEt ndai la ꞌilhunaoodulhne huye ꞌóoket-i, ꞌi tsꞌiyawh ꞌahꞌalh. ꞋInkꞌez nohyo tsꞌe oogha tꞌetsꞌoninzun-i, ookaꞌ oodolhkut junih. 26Ndi yun kꞌut ꞌinkꞌez ndai la hoonli-i, ꞌi tsꞌiyawh neMoodihti oochꞌeꞌ ꞌet huwa.
27ꞋEt ooba ꞌalhaꞌ lheꞌhootꞌohne, ndet la nohghu nuhúzya ꞌinkꞌez whuz tanyalh de, ndai nohbut néhininla-i, ꞌi oohꞌalh ꞌinkꞌez nohyo tsꞌe oogha tꞌetsꞌoninzun-i hoontsꞌi ookaꞌ oodolhkut junih. 28ꞋEt hoontsꞌi dune nohdutánelh, “Ndi ꞌukꞌeltsi gha tꞌaih-i ꞌuntꞌoh,” ꞌet de ꞌaw lhuzoohꞌal. Mbe la nohdutáni-un ꞌinkꞌez ooyo tsꞌe oogha tꞌetsꞌoninzun-i ꞌet huwa ꞌet la ꞌaw lhuzoohꞌal. ꞋEt hoontsꞌi ndi yun kꞌut ꞌinkꞌez ndai la hoonli-i, ꞌi tsꞌiyawh neMoodihti ꞌen oochꞌeꞌ ꞌuntꞌoh. 29Neyo tsꞌe oogha tꞌetsꞌoninzun-i ooghu yasduk-un, ꞌaw nohni nohyo tsꞌe oogha tꞌetsꞌoninzun-i, ꞌet iloh howu yasduk. Ndun ooyo tsꞌe oogha tꞌetsꞌoninzun-i, ꞌi ghu yasduk wheꞌ dusni. ꞋEt di ha ꞌuyoon ooyo tsꞌe oogha tꞌetsꞌoninzun-i, ꞌi be ꞌaw hoonli whe whuchꞌa nusjoot-un, ntsꞌenꞌa ꞌuyoonne beni tidizꞌai ꞌi sba nahutiyelh? 30ꞋEt ꞌutꞌalh-i ha musi dusni whe usꞌal ꞌet hoontsꞌi sghu yahalhduk. ꞋEt di ha sghu yahalhduk musi dusni ꞌet hoontsꞌi?
31ꞋEt ꞌinka ndet la ꞌahꞌalh totsuk, ꞌinkꞌez ꞌahtnai de cha, kꞌus ntsꞌoh dahtꞌen ꞌi cha, ꞌet tsꞌiyawh ꞌi be ꞌet Yakꞌusda whé dulhtiꞌ-un hubaꞌ hoontꞌoh. 32ꞋEt huwa Lizwifne ꞌinkꞌez ꞌudun yun kꞌut whutꞌenne cha, ꞌinkꞌez Yakꞌusda ba ꞌilhunaoodúlhne, ꞌenne cha, mbene hinli hoontsꞌi, ꞌet hoonli whe tankꞌus uboolhtselh junih. 33Si cha whuz unꞌa ꞌet tsꞌiyanne tsꞌun ooszooꞌ hukwa ꞌustꞌen. Sichꞌoh hootástꞌeꞌ hukwa lheꞌzustꞌen. Kꞌus ndet la tsꞌiyanne ba hoonzoo ꞌoh teneꞌ ꞌustꞌen, ꞌet huwa ꞌenne tilah hudoojih.
Currently Selected:
1 Corinthians 10: crx
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.