YouVersion Logo
Search Icon

Sefanaia 3

3
O le A‘oa‘iga ‘iā Ierusalema; o le Manuia Atalī
1‘Oi talofa i le ‘a‘ai fouvale ma le leaga, o le ‘a‘ai sauā!#Iere 6.6; 5.3 2Na ia lē fa‘alogo i le leo; na ia lē talia le a‘oa‘iga; na ia le fa‘atuatua i le ALI‘I, na ia le fa‘alatalata atu i lona Atua. 3O ona ali‘i sili i totonu ‘iā te ia o leona fētāgisi i latou; o ‘ona fa‘amasino o luko o le afiafi i latou; ‘ua latou le pa‘agugu ni ivi i le taeao. 4O ana perofeta o tagata mitamita vale i latou ma le fa‘a‘ole‘ole; o ana ositaulaga ‘ua latou soli le malumalu, ‘ua latou soli le tulafono.#Iere 23.11; Eseki 22.26 5O le ALI‘I le amiotonu o lo‘o i totonu ‘iā te ia, e lē faia o ia se amioletonu; o lea taeao ma lea taeao na te fa‘amalamalama mai ai lana fa‘amasinoga, e lē aunoa lava; a o le tagata amioletonu na te lē iloa mā.
6‘Ua ‘ou fa‘aumatia nu‘u ‘ese; ‘ua fa‘atafunaina o latou ‘olo; ‘ua ‘ou fa‘agaogaoina o latou malae, ‘ua leai sē ui ai; ‘ua fa‘aumatia a latou ‘a‘ai, ‘ua lē i ai se tagata, ‘ua leai fo‘i sē mau ai.#Sefa 2.4-15; Saka 7.14; 9.8 7Na ‘ou fai atu, “Tau ‘ina e mata‘u mai ‘iā te a‘u, ‘ia e talia le a‘oa‘iga, ‘ona lē fa‘aumatia ai lea o le mea e mau ai o ia, e lē o‘o fo‘i se mea e tasi ‘ua ‘ou fa‘asalaina atu ai ‘iā te ia;” A ‘ua latou ala tula‘i, ‘ua latou fai, ‘ia leaga a latou mea uma ‘ua fai.
8O lenei, ‘ia ‘outou fa‘atalitali ‘iā te a‘u, o lo‘o fetalai mai ai le ALI‘I: ‘Ia o‘o i le aso ‘ou te tula‘i atu ai i le vete; auā ‘ua tonu ‘iā te a‘u le fa‘apotopotoina o nu‘u ‘ese, e aofia lava mālō; ‘ina ‘ia sasa‘a atu i luga ‘iā i latou lo‘u ita, o lo‘u ita tele uma lava; auā e fa‘aumatia le lalolagi uma i le afi o lo‘u fuā.#Ioe 3.2; Sapa 2.3; Sefa 1.18
9Auā o ona po ia ‘ou te liliu atu ai i nu‘u o le gagana lelei, ‘ina ‘ia latou vala‘au uma lava i le suafa o le ALI‘I, ma ‘au‘auna ‘iā te ia ma le loto gatasi. 10O i tala atu vaitafe o Aitiope e ‘aumai ai le taulaga ‘iā te a‘u o o‘u tagata o ole mai, o le afafine lava o o‘u tagata ‘ua fa‘asalalauina.#Sala 68.31; Isai 11.11 11O lea aso ‘e te lē mā ai ‘ona o sau amioga e tasi ‘ua e fouvale ai ‘iā te a‘u; auā o ona po ia ‘ou te ‘ave‘eseina ai i totonu ‘iā te oe o i latou o ‘iā te oe o ē mitamita fa‘amaualuga; ‘ona e lē toe fa‘amaualuga ai lea i lo‘u mauga pa‘ia.#3.11 mauga pa‘ia: po o mauga o Siona. 12‘Ou te fa‘atotoe i totonu ‘iā te oe o le nu‘u agamalū ma le mativa, latou te fa‘atuatua fo‘i i le suafa o le ALI‘I. 13O ē totoe o Isaraelu latou te lē faia amioletonu, latou te lē tala pepelo fo‘i; e iloa fo‘i i o latou gutu le laulaufaiva fa‘a‘ole‘ole; ‘ae latou te ‘a‘ai ma ta‘o‘oto, e leai fo‘i sē fa‘amata‘u mai.#Fa‘aa 14.5
O le Pese Fiafia
14Le tama fafine a Siona e, ‘ia e pese.
Isaraelu e, ‘ia e ‘alaga;
le tama fafine a Ierusalema e, ‘ia e fiafia,
ma ‘oli‘oli lava ma le loto ‘atoa.#Isai 12.6; 54.1; Saka 2.10; 9.9
15‘Ua fa‘aolaina e le ALI‘I au sala,
‘ua na ‘ave‘eseina lē na fai oe ma ona fili.
O le Tupu o Isaraelu, o le ALI‘I,
o lo‘o i ai o ia i totonu ‘iā te oe,
‘e te lē toe iloa ai se malaia.#Sala 46.5; Mata 27.42; Ioane 1.49; Fa‘aa 21.3
16O lea aso o le a fa‘apea atu ai i Ierusalema:
‘Aua ‘e te fefe; Siona e,
‘aua ne‘i vaivai ou lima.#Isai 35.3
17O le ALI‘I, lou Atua i totonu ‘iā te oe,
o lē malosi ia na te fa‘aolaina.
E ‘oli‘oli o ia ‘iā te oe ma le fiafia;
o lona alofa e le fetalai ai o ia;
e ‘oli‘oli lava o ia ‘iā te oe ma ofo fiafia.
18‘Ou te fa‘apotopotoina i latou ‘ua fa‘anoanoa ‘ona o tausamiga,
o o‘u tagata i latou ‘ua mafatia i le luma ‘ona o ia.#Paru 1.4; 2.6
19Fa‘auta, o ona po ia ‘ou te fa‘atigā ai ‘iā te i latou uma,#Isai 60.14; 61.7; Iere 13.11; Mika 4.6-7
o ē fa‘asauā ‘iā te oe.
‘Ou te fa‘aolaina fo‘i lē ‘ua setusetu,
‘ou te fa‘apotopotoina fo‘i lē ‘ua tulia.
‘Ou te avatu fo‘i ‘iā te i latou le vi‘iga,
ma le igoa i nu‘u uma lava sa fa‘amāina ai i latou.
20O ona po ia ‘ou te ‘aumai ai ‘outou,#Eseki 11.17
o ona po fo‘i lava ‘ou te fa‘apotopotoina ai ‘outou.
‘Ou te avatu ai lava ‘iā te ‘outou le igoa ma le vi‘iga i nu‘u uma o le lalolagi,
pe a ‘ou fa‘afoisia la ‘outou tāfeaga, o ‘outou o va‘ai i ai.
O lo‘o fetalai mai ai le ALI‘I.

Currently Selected:

Sefanaia 3: RSCB

Highlight

Share

Copy

None

Want to have your highlights saved across all your devices? Sign up or sign in