Salāmo 92
92
‘Ia Vi‘ia le Atua ‘ona o lona Alofa i ē Amio Atua
O le salāmo, o le pese lea mo le aso sapati
1E lelei ‘ona vivi‘i atu i le ALI‘I,#Kene 14.19-20; Sala 147.1
ma ‘ia fai pesega i lou suafa lē Silisili‘ese e.
2‘Ia ta‘u atu i le taeao lou alofa
‘ia ta‘u atu fo‘i i le po lou fa‘amaoni,
3i le la‘aupese e sefulu ona manoa,#Sala 33.2
ma le napeli, ma le leo o le kitara.
4Auā ‘ua e fa‘afiafia mai ‘iā te a‘u i lau galuega,
le ALI‘I e;
‘ou te ‘alaga fiafia ‘ona o mea ‘ua faia e ou ‘a‘ao.
5Le ALI‘I e,#Sala 111.2; 139.17; Roma 11.33; Fa‘aa 15.3
e matuā sili lava mea ‘ua e faia;
e loloto lava ou manatu.
6O le tagata valea na te lē iloa;
ma le vale na te lē lagona lenei mea.
7A tupu olaola o ē amio leaga e pei o le vao iti,#Iopu 21.7; Sala 94.4; Iere 12.1
a fuga mai fo‘i i latou uma o ē fai mea leaga
e fa‘apea i latou ‘ina ‘ia fa‘aumatia e o‘o i le fa‘avavau lava.
8A o oe le ALI‘I e,
o lo‘o silisili oe e fa‘avavau.
9Auā le ALI‘I e, fa‘auta i ē ita ‘iā te oe,
auā fa‘auta i ē ita ‘iā te oe, e fano i latou;
e fa‘ata‘ape‘apeina i latou uma o ē fai amio leaga.
10‘Ae fa‘amaualugaina e oe lo‘u nifo e pei o le rema;#1 Samu 2.1; Sala 23.5; 75.10
e fa‘au‘uina a‘u i le suāu‘u fou.
11E iloa atu fo‘i o‘u mata i ē lamalama mai ‘iā te a‘u,
e fa‘alogo fo‘i o‘u taliga i ē amio leaga ē ‘ua laga mai ‘iā te a‘u.
12E tupu olaola le tagata amiotonu e pei o le pama;#Sala 52.8; 72.7; Hose 14.5-6
e tupu tele e pei o le arasi i Lepanona.
13O ē ‘ua totōina i le fale o le ALI‘I,
e tupu olaola i latou i lotoā o le tatou Atua.
14A o‘o ‘ina ulusinā, latou te fua mai pea lava;
e malolosi ma lauolaola i latou;
15‘ina ‘ia iloa ai o le ALI‘I e tonu ia;#Teu 32.4; Sala 58.11; Roma 9.14
o lo‘u papa ia e lē o ‘iā te ia fo‘i se amio leaga.
Currently Selected:
Salāmo 92: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
