Salāmo 90
90
TUSI 4
(Salāmo 90—106)
O le Pu‘upu‘u o le Olaga nei. O le Tatalo ‘ina ‘ia Alofa mai le Atua
O le tatalo a Mose le tagata o le Atua
1Le Ali‘i e,
‘ua fai oe ma mea matou te nonofo ai,
i lea tupulaga ma lea tupulaga.
2A o le‘i fānaua mai mauga,#Iopu 36.26; Fa‘ata 8.25
e le‘i faia fo‘i e oe le lalolagi ma le atu laulau,
o le Atua oe mai le vavau e o‘o i le fa‘avavau.
3‘Ua e liua tagata ‘ia momomo;#Kene 3.19; Fai 12.7
ma e fetalai mai,
“‘Outou na le fānau a tagata ‘ia liu ‘outou;”
4auā e tusa i ou luma le afe o tausaga#2 Pete 3.8
ma le aso ananafi ‘ina o mavae atu
ma se leoleoga i le po.
5‘Ua e fa‘atāfea i latou i le lolo; ‘ua se moe latou;#Iopu 20.8; Sala 103.15; Isai 40.6-8
e pei o le mutia i latou ona olaola i le taeao.
6O le taeao e fuga mai ai ma olaola mai ai;
a o‘o i le afiafi, ‘ona sele‘eseina ai lea,
‘ua magumagu ai.
7Auā ‘ua fa‘aumatia matou i lou to‘asā,
o lou to‘atama‘i fo‘i ‘ua atuatuvale ai i matou.
8‘Ua e tu‘uina a matou amio leaga i ou luma,#Sala 19.12; Iere 16.17; Epe 4.13
‘ua tu‘uina fo‘i a matou agasala lilo
i le malamalama o ou fofoga.
9Auā ‘ua mavae atu o matou aso uma a o ē to‘asā mai;
‘ua uma atu o matou tausaga e pei o se manatu.
10O tausaga o matou olaga e fitugafulu ia tausaga;
‘ae ‘āfai e valugafulu tausaga ‘ona o le malosi.
A o lo latou malosi o i ai le tigā ma le puapuagā;
auā e vave ‘ona mavae atu ia ma matou lele ‘ese.
11O ai sē na te iloa le malosi o lou to‘asā?
auā e pei ‘ona mata‘utia oe e fa‘apea lou to‘atama‘i.
12‘Ia fa‘apea ‘ona e a‘oa‘o mai ‘iā i matou
e faitauina o matou aso,
‘ina ‘ia maua ai le poto i o matou loto.
13Le ALI‘I e, ‘ia e toe liliu mai, se‘ia afea?#Teu 32.36; Sala 74.9-10; 135.14
‘Ia e salamō ‘ona o au ‘au‘auna.
14‘Ia e fa‘amalilie mai ‘iā te i matou i le taeao i lou alofa;
‘ina ‘ia matou ‘alalaga fiafia,
ma ‘ia ‘oli‘oli i o matou aso uma.
15‘Ia e fa‘afiafia mai ‘iā i matou ‘ia tusa ma ona po na e fa‘atigāina ai i matou,
o tausaga na matou iloa ai le leaga.
16‘Ia fa‘aalia mai au galuega i au ‘au‘auna,#Sala 92.4; Sapa 3.2
‘ia fa‘aalia fo‘i lou matagofie ‘iā latou fānau.
17‘Ia o‘o mai fo‘i ‘iā te i matou le matagofie mai i le ALI‘I lo matou Atua.#Isai 26.12; 2 Tesa 2.16-17
‘Ia e fa‘atumauina ‘iā te i matou le galuega a o matou lima;
o le galuega lava a o matou lima ‘ia e fa‘atumauina.
Currently Selected:
Salāmo 90: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
