Mataio 7

O A‘oa‘oga e Fa‘atatau i Fa‘amasinoga

(Luka 6.37-38, 41-42)

1“‘Aua tou te fa‘amasino atu, ‘ina ne‘i fa‘amasinoina ‘outou. 2Auā o le fa‘amasinoga tou te fa‘amasinoina atu, e fa‘amasinoina ai ‘outou; o le fua fo‘i tou te fuaina atu, e toe fuaina mai ai ‘iā te ‘outou.#Mare 4.24 3Se a le mea ‘e te va‘ai atu ai i si fāsi la‘au i le mata o lou uso, a ‘e te lē iloa e oe le utupoto i lou lava mata? 4Pe fa‘apefea fo‘i ‘ona e fai atu i lou uso, ‘Tu‘u mai ia, se‘i ‘ou ‘eu ‘ese le fāsi la‘au i lou mata;’ fa‘auta fo‘i, o i lou lava mata le utupoto? 5O oe na le tagata fa‘afiaamiotonu, ‘ia e mua‘i tia‘i le utupoto i lou lava mata, ‘ona e iloa lelei ai lea e ‘eu ‘eseina atu le fāsi la‘au i le mata o lou uso.

6“‘Aua tou te avatu le mea pa‘ia i ta‘ifau;#7.6 ta‘ifau: O le fa‘aliliuga tuai; ulī. ‘aua fo‘i tou te lafo a ‘outou penina i luma o pua‘a, ne‘i latou soli ai i o latou vae, ma liliu mai, i le saeia ai ‘outou.

‘Ia Ole atu, Tu‘itu‘i atu ma Sā‘ili atu

(Luka 11.9-13)

7“‘Ia ‘outou ole atu, ‘ona foa‘iina mai ai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tōina ai lea ‘iā te ‘outou. 8Auā ‘ai sē ole atu, e maua e ia; o lē sā‘ili fo‘i, e iloa e ia; e tōina fo‘i i lē tu‘itu‘i atu. 9O ai fo‘i se tagata o ‘outou pe a ole mai lona atali‘i i se areto, na te avane ‘ea ‘iā te ia se ma‘a? 10A ole mai fo‘i i se i‘a, na te avane ‘ea ‘iā te ia se gata? 11O lenei, o ‘outou e leaga, ‘āfai ‘ua iloa e ‘outou ‘ona avatu o mea lelei mā a ‘outou fānau, e lē sili ‘ea ‘ona foa‘iina mai e lo ‘outou Tamā o i le lagi o mea lelei i ē ole atu ai ‘iā te ia?

12“O mea uma fo‘i tou te loto i ai, ‘ia faia e tagata ‘iā te ‘outou, ‘ia fa‘apea lava ‘ona ‘outou faia ‘iā te i latou; auā o le tulafono lea ma le ‘au perofeta.#Luka 6.31

O le Faitoto‘a Vā Apiapi

(Luka 13.24)

13“‘Ia ‘outou ulu atu i le faitoto‘a vā apiapi; auā e vā tele le faitoto‘a, e lautele fo‘i le ala e tau atu i le malaia, e to‘atele fo‘i i latou e ui atu i ai. 14Auā e vā apiapi le faitoto‘a, e lauitiiti fo‘i le ala e tau atu i le ola, e to‘aitiiti fo‘i i latou o ē maua.

O le La‘au ma ona Fua

(Luka 6.43-44)

15“‘Ia ‘outou ma perofeta pepelo, o ē ō mai ‘iā te ‘outou i ‘ofu fa‘amamoe, a o totonu o luko fe‘ai lava i latou. 16Tou te iloa i latou i o latou fua. Pe tau mai ‘ea e tagata se fuifui vine mai le la‘au tuitui, po o mati mai le la‘au talatala? 17E fa‘apea fo‘i la‘au lelei ta‘itasi ma fua mai i fua lelei; a o le la‘au leaga e fua mai i fua leaga. 18E lē mafai i le la‘au lelei ona fua mai i fua leaga, e lē mafai fo‘i i le la‘au leaga ona fua mai i fua lelei. 19O la‘au uma e lē fua mai i fua lelei, e taia ia ma lafoina i le afi.#Mata 3.10; Luka 3.9 20O lea fo‘i tou te iloa ai i latou i o latou fua.#Mata 12.33

‘Ou te Lē Iloa ‘Outou

(Luka 13.25-27)

21“E lē sao atu i le mālō o le lagi i latou uma o ē fai mai ‘iā te a‘u, ‘Le Ali‘i e, le Ali‘i e;’ na o lē na te faia le finagalo o lo‘u Tamā o i le lagi. 22E to‘atele latou te fai mai ‘iā te a‘u i lea aso, ‘Le Ali‘i e, le Ali‘i e, matou te le‘i perofeta ane ‘ea i lou igoa, o lou igoa fo‘i na matou tulia ai temoni, o lou igoa fo‘i na matou fai ai vāvega e tele?’ 23‘Ona ‘ou ta‘utino atu ai lea ‘iā te i latou, ‘‘Ou te le‘i iloa lava ‘outou; ‘inā ō ‘ese ia ‘outou ‘iā te a‘u, o ‘outou o ē fai amio leaga.’#Sala 6.8

O Tufuga Fai Fale e To‘alua

(Luka 6.47-49)

24“O lenei, ‘ai sē fa‘alogo i a‘u ‘upu nei ma faia e ia, ‘ou te fa‘atusaina o ia i le tagata poto, ‘ua nā faia lona fale i luga o le papa; 25‘ona tō mai lea o timuga tetele,#7.25 timuga tetele: O le fa‘aliliuga tuai; uaga. ‘ua o‘o mai fo‘i tāfega, ‘ua agi mai fo‘i o matagi, ‘ua pesi mai i lea fale ‘ae le‘i pa‘ū lava ia; auā ‘ua fa‘avaeina i luga o le papa. 26‘Ai se fa‘alogo fo‘i i a‘u ‘upu nei, ‘ae lē faia, e fa‘atusaina o ia i le tagata valea, na faia lona fale i luga o le oneone; 27‘ona tō mai lea o timuga tetele, ‘ua o‘o mai fo‘i tāfega, ‘ua agi mai fo‘i o matagi, ‘ua pesi mai i lea fale, ‘ona pa‘ū ai lea, ‘ua nutipalaina lava.”

O le Pule a Iesu

28‘Ua fa‘ai‘u e Iesu o nei ‘upu, ‘ona matuā taufaiofo ai lea o le motu o tagata i lana a‘oa‘oga;#Mare 1.22; Luka 4.32 29auā ‘ua ia a‘oa‘o ‘iā te i latou e pei o sē ‘ua i ai le pule, ‘ae lē pei o le ‘au tusi‘upu.

Currently Selected:

Mataio 7: RSCB

Highlight

Copy