Iakopo 4

O le A‘oa‘iga i nisi Amio Leaga

1Maifea tau‘a ma misa o ‘ia te ‘outou? E lē o lenei ‘ea, mai o ‘outou mana‘o leaga o lo‘o tau i o ‘outou tino uma?#Roma 7.23; 1 Pete 2.11 2‘Ua ‘outou tu‘inanau, ‘ae le‘i maua; o lea ‘ua ‘outou fasioti. ‘Ua ‘outou losilosi, ‘ae tou te lē mafai ‘ona maua; o lea ‘ua ‘outou femisa‘i ma fai tau‘a. E le‘i maua, e ‘outou auā ‘ua ‘outou lē ole atu. 3‘Ua ‘outou ole atu, ‘ae le‘i maua, auā ‘ua ole atu ma le fa‘alētatau, ‘ina ‘ia fa‘auma ai ia mea i o ‘outou mana‘o leaga. 4O ‘outou tagata mulilulua e, tou te lē iloa ‘ea o lē fefa‘auōa‘i ma le lalolagi o le ita lea i le Atua? O lenei, o sē fia uō ma le lalolagi, ‘ua ‘avea o ia ma ita i le Atua.#Luka 6.26; Roma 8.7; 1 Ioane 2.15 5‘Aua tou te manatu ‘ua fai mai fua le Tusi, “O le loto o lo‘o nofo i totonu ‘iā te ‘outou ‘ua naunau ia i le matau‘a?”#Eso 20.3, 5; Mata 6.24; Kala 5.17 6A ‘ua foa‘i mai e ia le alofa tunoa e sili; o lea ‘ua fa‘apea mai ai, “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo.”#Fa‘ata 3.34; Iopu 22.29; Mata 23.12; 1 Pete 5.5

7O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou. 8‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, ‘inā fafano ia o ‘outou lima, o ‘outou e fa‘alotolotolua e, ‘inā fa‘amamā ia o ‘outou loto.#Saka 1.3; Isai 1.16 9‘Ia puapuagātia ‘outou, ‘ina ‘ia fa‘avauvau, ma fētāgisi. ‘Ia liua o ‘outou ‘ata‘ata ma fa‘avauvau, ma lo ‘outou fiafia i le fa‘anoanoa; 10‘inā fa‘amaulalo ia i luma o le Ali‘i, ‘ona fa‘amaualugaina lea o ‘outou e ia.

O le Lapata‘iga i le Fa‘amasino atu i le Tasi Tagata

11Le ‘au uso e, ‘aua tou te fēfai‘upua‘i; o lē fai ‘upu i lona uso, ma fa‘amasino i lona uso, ‘ua fai ‘upu o ia i le tulafono, ma fa‘amasino i le tulafono. ‘Āfai fo‘i ‘ua e fa‘amasino i le tulafono, ‘e te lē se ‘ana‘ana i le tulafono, a o le fa‘amasino. 12E to‘atasi lava lē fai tulafono ma fa‘amasino, o lē na te mafaia ‘ona fa‘aola ma fasioti. O ai ‘ea oe ‘e te fa‘amasino ai i lē lua te tuā‘oi?#Mare 7.1; Roma 2.1; 14.4

O le Lapata‘iga i le Mimita

13Fa‘auta mai ia, ‘outou o fai ane, “O le asō po o taeao tatou te ō atu ai i lea ‘a‘ai, po o le tasi ‘a‘ai, ma nonofo ai i le tausaga e tasi, ma fa‘atau, ma maua ai ‘oloa.”#Fa‘ata 27.1 14‘Ae lē iloa e ‘outou se mea e tupu a taeao. Auā pe se a lo ‘outou ola? O le puao lava lea, ‘ua aliali mai se itū aso itiiti, ‘ona mou ai lea.#Luka 12.20; Sala 39.5, 11 15‘Ae tatau ‘ona ‘outou fa‘apea, “A finagalo i ai le Ali‘i, tatou te ola ai, ma tatou faia lea mea ma lea mea.” 16A o lenei, ‘ua ‘outou mitamita ‘iā ‘outou ‘upu fa‘amaualuga; e leaga le mitamita fa‘apenā uma lava.

17O lenei, o lē ‘ua iloa e fai le mea lelei, ‘ae lē faia, o le agasala lea ‘iā te ia.#Luka 12.47; Roma 14.23

Currently Selected:

Iakopo 4: RSCB

Highlight

Copy