Iakopo 5

O le Lapata‘iga i le ‘au Mau‘oa

1Fa‘auta mai ia; ‘Outou e tamao‘āiga, ‘ia ‘outou fētāgisi ma uiō ‘ona o puapuagā e o‘o mai ‘iā te ‘outou.#Luka 6.24 2‘Ua pala la ‘outou ‘oloa, ‘ua ‘ati‘atia ‘outou ‘ofu i mogamoga.#Mata 6.19 3‘Ua ‘elea o ‘outou auro ma ario; e fai fo‘i ma molimau ‘iā te ‘outou o latou ‘ele, e ‘aina ai o ‘outou tino pei o se afi. ‘Ua ‘outou fa‘aputu mea i ona aso e gata ai.#Fa‘ata 16.27 4Fa‘auta, o le totogi o ē galulue, ē na fa‘aputu le fua o ‘outou fanua, ‘ua tāofia e ‘outou, ‘ua ‘alaga ia; o le ‘alaga fo‘i o ē na selesele saito ‘ua fa‘afofoga lava e le Ali‘i o ‘au.#5.4 Ali‘i o ‘au: po o Sapaota mai le gagana Eleni. #Levi 19.13; Mala 3.5; Teu 24.14-15 5‘Ua ‘outou nonofo i le nu‘u ma le sololelei, ma le fiafia i la le tino, ‘ua fafagaina ‘outou e ‘outou, fa‘apei o manu mo le aso e fafasi ai.#Luka 16.19, 25; Iere 12.3 6‘Ua ‘outou fa‘asala ma fasioti le amiotonu, ‘ua lē tete‘e mai o ia ‘iā te ‘outou.

O le ‘Onosa‘i ma le Tatalo

7O lenei, le ‘au uso e, ‘onosa‘i ia se‘ia o‘o i le afio mai o le Ali‘i. Fa‘auta, e fa‘atali lē galue fanua i le fua aogā o le ‘ele‘ele, e fa‘atalitali i ai, se‘ia maua le timuga muamua ma lē mulimuli.#Teu 11.14; Ioe 2.23; Saka 10.1; Iere 5.24; Luka 21.19; Epe 10.36 8‘Ia ‘onosa‘i fo‘i ‘outou, ia fa‘atumauina o ‘outou loto, auā ‘ua latalata le afio mai o le Ali‘i.

9Le ‘au uso e, ‘aua tou te fēmuimuia‘i, ne‘i fa‘asalaina ‘outou; fa‘auta, ‘ua tu mai le fa‘amasino i luma o le faitoto‘a. 10O‘u uso e, ‘ia ‘outou fa‘aa‘oa‘o i le fa‘ato‘ato‘a i le leaga, ‘atoa ma le ‘onosa‘i o le ‘au perofeta, ē na tautala mai i le suafa o le Ali‘i. 11Fa‘auta, ‘ua tatou ta‘u‘amu‘ia i ē ‘onosa‘i; ‘ua ‘outou fa‘alogologo i le ‘onosa‘i o Iopu, ‘ua ‘outou iloa fo‘i le i‘uga i la le Ali‘i, ‘ina ‘ua mutimutivale tele le Ali‘i ma le alofa naunau.#Iopu 1.21-22; 2.10; Sala 103.8

12O‘u uso e, e muamua lava i mea uma lenei, ‘aua lava ne‘i ‘outou tautō, po o i le lagi, po o i le fanua, po o se tasi lava tautoga; ‘ae tau lava o la ‘outou “Ioe,” ioe, ma la ‘outou “Leai,” e leai; ‘ina ne‘i fa‘asalaina ai ‘outou.#Mata 5.34-37

13‘Ua tigāina ‘ea so ‘outou? ‘Inā tatalo ia. ‘Ua fiafia ‘ea se tasi? ‘Inā pese ia.#Sala 50.15; Kolo 3.16 14‘Ua ma‘i ‘ea so ‘outou ‘inā ‘a‘ami atu ia i toeaina o le ekalesia, ‘ia latou tatalo mo ia, pe a uma ‘ona fa‘au‘u ‘iā te ia i le suāu‘u i le suafa o le Ali‘i.#Mare 6.13 15O le tatalo fo‘i e faia i le fa‘atuatua e fa‘aolaina ai le ma‘i, e fa‘atūina fo‘i o ia e le Ali‘i; ‘āfai fo‘i ‘ua agasala, e fa‘amāgaloina ia. 16‘Ia feta‘uta‘ua‘i#5.16 feta‘uta‘ua‘i: O nisi fa‘aliliuga; fēfa‘aalia‘i. a ‘outou agasala, ma tatalo le tasi mo le tasi, ‘ina ‘ia fa‘amālōlōina ‘outou. ‘Ua aogā tele le tatalo fa‘atauānau a le tagata amiotonu. 17O Elia o le tagata ia e tusa ma i tatou. ‘Ua matuā tatalo o ia ‘ina ‘ia lē timu, ‘ona lē timu ai lea o le fanua i tausaga e tolu ma masina e ono.#1 Tu 17.1; 18.1; Luka 4.25; Galu 14.15 18‘Ua toe tatalo fo‘i, ‘ona tō ifo ai lea o le timu mai le lagi, ‘ona fua mai ai lea o le ‘ele‘ele i ona lava fua.#1 Tu 18.42

19Le ‘au uso e, ‘ai se tasi o ‘iā te ‘outou ‘ua sesē i le ‘upu moni, a ‘ua fa‘afo‘i mai se tasi ‘iā te ia. 20‘Ia iloa e ia, o lē fa‘afo‘i mai le tagata agasala nai lona ala sesē, e fa‘aolaina e ia le agaga nai le oti, e ufiufi fo‘i e ia le vao agasala.#Sala 51.13; Fa‘ata 10.12; 1 Pete 4.8

Currently Selected:

Iakopo 5: RSCB

Highlight

Copy