Kenese 29
29
‘Ua o‘o atu Iakopo i Patanarama
1‘Ona alu ai lea o Iakopo i lana malaga, ‘ua o‘o atu i le lau‘ele‘ele o le nu‘u i sasa‘e.#Nume 23.7; Fa‘ama 6.3 2‘Ua ia va‘ai, ‘ona iloa lea o le vai‘eli i le fanua, fa‘auta fo‘i, ‘ua ta‘o‘oto latalata i ai o lafu mamoe e tolu; auā o lea vai‘eli na latou fa‘ainu ai lafu; ma i ai fo‘i le ma‘a tele i le gutu o le vai‘eli. 3A fa‘apotopotoina fo‘i lafu uma i lea mea, ‘ona latou fuli ‘ese ai lea o le ma‘a i le gutu o le vai‘eli ma fa‘ainu mamoe; ‘ona latou toe tu‘u ai lea o le ma‘a i le gutu o le vai‘eli, i lea mea e tu‘u ai.
4‘Ona fai atu ai lea o Iakopo ‘iā te i latou, “O‘u uso e, maifea ‘outou?”
‘Ona latou fai mai ai lea, “O i matou nei mai Karana.”
5‘Ona fai atu ai lea o ia ‘iā te i latou, “‘Ua ‘outou iloa ‘ea Lapana le atali‘i o Nakori?”
‘Ona latou fai mai ai lea, “‘Ua matou iloa lava.”
6‘Ona fai atu ai lea o ia ‘iā te i latou, “O mālōlō ‘ea ia?”
‘Ona latou fai mai ai lea, “O mālōlō lava.” “Fa‘auta fo‘i, o lo‘o sau lona afafine o Rasela ma mamoe.”
7‘Ona fai atu ai lea o ia, “Fa‘auta, e maualuga pea le la, e le‘i o‘o i le itū ‘ae fa‘apotopotoina ai manu, ‘ia ‘outou fa‘ainu mamoe, i le ‘outou ō e fafaga ai.”
8‘Ona latou fai mai ai lea, “Matou te lē mafaia, se‘ia fa‘apotopotoina lafu uma, se‘ia latou fuli ‘ese fo‘i le ma‘a i le gutu o le vai‘eli, ‘ona matou fa‘ainu ai lea o mamoe.”
9O lo‘o latou tautala ma ia, ‘ae sau Rasela ma mamoe a lona tamā, auā na ia leoleo ai. 10‘Ua iloa e Iakopo o Rasela le afafine o Lapana le tuagane o lona tinā, ma mamoe a Lapana le tuagane o lona tinā, ‘ona sōsō atu ai lea o Iakopo, ‘ua fuli ‘ese le ma‘a i le gutu o le vai‘eli ma fa‘ainu mamoe a Lapana le tuagane o lona tinā. 11‘Ona sogi atu lea o Iakopo ‘iā Rasela, ‘ua tagi fo‘i ma le leo tele. 12‘Ona ta‘u atu ai lea e Iakopo ‘iā Rasela o ia o le uso o lona tamā, o le tama fo‘i a Repeka, ‘ona momo‘e ai lea o ia e ta‘u atu ai i lona tamā. 13‘Ua fa‘alogo Lapana i le tala ‘iā Iakopo le tama a lona tuafafine, ‘ona momo‘e ai lea o ia e fa‘afetaia‘i ‘iā te ia, ‘ua fusi ‘iā te ia ma sogi ‘iā te ia, ‘ua ‘aumai fo‘i ‘iā te ia i le fale; ‘ona tala atu ai lea e ia o mea uma ‘iā Lapana. 14‘Ona fai mai ai lea o Lapana ‘iā te ia, “O o‘u lava ivi oe ma o‘u ‘a‘ano.” ‘Ua la nonofo fo‘i ma ia i le masina ‘atoa.
‘Ua ‘Au‘auna Iakopo ‘iā Lapana ‘ona o Rasela ma Lea
15‘Ona fai mai ai lea o Lapana ‘iā Iakopo, “A e ‘au‘auna fua mai ‘ea ‘iā te a‘u auā o oe o lo‘u uso? ‘Ia e fai mai ‘iā te a‘u pe se a lou totogi.” 16Na ia Lapana o afafine e to‘alua, o le igoa o le matua o Lea, o le igoa fo‘i o lē itiiti o Rasela. 17O Lea ‘ua leaga ona mata,#29.17 leaga ona mata: po o le ‘auleaga. a o Rasela ‘ua lālelei le tino, ‘ua lālelei fo‘i ma ona mata.
18‘Ua mana‘o Iakopo ‘iā Rasela, ‘ua fai atu ia, “‘Ou te ‘au‘auna ‘iā te oe i tausaga e fitu ‘ona o Rasela lou afafine aupito itiiti.”#Kene 30.26; 31.41
19‘Ona fai mai ai lea o Lapana, “E lelei ‘ona ‘ou avatu ai o ia ‘iā te oe, ‘ae leaga ‘ona ‘ou avatu i se tasi tagata; ‘inā tā nonofo ia ma a‘u.” 20‘Ona ‘au‘auna ai lea o Iakopo i tausaga e fitu ‘ona o Rasela, ‘ua peiseaī o nai aso itiiti ia i lona manatu, auā o lona mana‘o tele ‘iā te ia.
21‘Ona fai atu ai lea o Iakopo ‘iā Lapana, “‘Aumai ia la‘u avā; auā ‘ua ‘atoa o‘u aso ‘ina ‘ia ‘ou alu atu ‘iā te ia.” 22‘Ona fa‘apotopotoina lea e Lapana o tagata uma o le nu‘u, ‘ua fai le tausama‘aga.#Fa‘ama 14.10; Ioane 2.1 23‘Ua o‘o i le afiafi, ‘ona ‘ave ai lea e ia o lona afafine o Lea, ‘ua ‘aumaia ‘iā te ia; ‘ona alu atu ai lea o ia ‘iā te ia. 24‘Ua avatu e Lapana i lona afafine o Lea o lana ‘au‘auna fafine o Selepa, e fai māna ‘au‘auna. 25‘Ua o‘o i le taeao, fa‘auta mai, o Lea; ‘ona fai atu ai lea o ia ‘iā Lapana, “Se a lenei mea ‘ua e faia ‘iā te a‘u? ‘Ou te le‘i ‘au‘auna ‘ea ‘iā te oe ‘ona o Rasela? Se a fo‘i le mea ‘ua e fa‘a‘ole‘ole mai ai ‘iā te a‘u?”
26‘Ona fai mai ai lea o Lapana, “E lē fa‘apea le tu i lo matou nu‘u, ‘ona mua‘i avatu le itiiti ‘ae mulimuli le matua. 27‘Ia fa‘a‘atoa ona aso e fitu, ‘ona avatu ai fo‘i lea ‘iā te oe ‘atoa ma lenei, ‘ona o le galuega ‘e te ‘au‘auna mai ai ‘iā te a‘u i isi tausaga e fitu.”
28‘Ua faia lava lea e Iakopo, ‘ua fa‘a‘atoa ona aso e fitu; ‘ona ‘aumai ai lea e ia o lona afafine o Rasela e fai māna avā. 29‘Ua avatu e Lapana i lona afafine o Rasela o lana ‘au‘auna fafine o Pila e fai māna ‘au‘auna. 30‘Ona alu atu ai lea o ia ‘iā Rasela fo‘i, ‘ua sili fo‘i lona alofa ‘iā Rasela i lona alofa ‘iā Lea; ‘ona ‘au‘auna lea o ia ‘iā Lapana i isi tausaga e fitu.
O Fānau a Iakopo
31‘Ua silafia e le ALI‘I ‘ua ‘inosia Lea, ‘ona fa‘agaaufānauina#29.31 fa‘agaaufānauina: po o fanafānau. lea o ia e ia, a o Rasela ‘ua pā ia. 32‘Ona tō ai lea o Lea, ‘ua fānau lana tama tane, ‘ua na fa‘aigoa ‘iā te ia o Reupena;#29.32 Reupena: mai le gagana Eperu “‘ua silafia lo‘u tigā.” auā ‘ua fa‘apea ane, “‘Ua silasila mai le ALI‘I i lo‘u tigā; o lenei, e alofa mai ai la‘u tane ‘iā te a‘u.” 33‘Ua toe tō fo‘i o ia, ‘ua fānau lana tama tane ‘ua fa‘apea ane, “Auā ‘ua fa‘afofoga le ALI‘I ‘ua ‘inosia a‘u, o le mea lea ‘ua na ‘aumai ai ‘iā te a‘u lenei tama fo‘i;” ‘ua ia fa‘aigoa ‘iā te ia o Simeona.#29.33 Simeona: mai le gagana Eperu “fa‘afofoga.” 34‘Ua toe tō o ia, ‘ua fānau lana tama tane, ‘ua fa‘apea o ia, “O lenei, a soso‘o nei o mā loto ma la‘u tane, auā ‘ua ‘ou fānau ‘iā te ia tama tane e to‘atolu,” o le mea lea na ia fa‘aigoa ai ‘iā te ia o Levi.#29.34 Levi: mai le gagana Eperu “soso‘o.” 35‘Ua toe tō fo‘i o ia, ‘ua fānau lana tama tane; ‘ua fa‘apea o ia, “O lenei ‘ou te vivi‘i i le ALI‘I;” o le mea lea ‘ua ia fa‘aigoa ai ‘iā te ia o Iuta,#29.35 Iuta: mai le gagana Eperu “vivi‘i.” ‘ona pā ai lea o ia.
Currently Selected:
Kenese 29: RSCB
Highlight
Share
Copy

Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.