Kenese 28

‘Ua Alu Malaga Iakopo i Patanarama ‘ua Fa‘aali mai le Atua ‘iā te ia

1‘Ona vala‘au atu ai lea o Isaako ‘iā Iakopo, ‘ua na fa‘amanuia ‘iā te ia, ma fai atu ‘iā te ia, ‘ua fa‘apea atu i ai, “‘Aua ‘e te fai avā i se fafine o Kanana.#Kene 24.3-6 2Tū ia i luga, ‘inā alu i Patanarama, i le ‘āiga o le tamā o lou tinā, o Petueli ma ‘ia e fai avā ai i se afafine o Lapana le tuagane o lou tinā. 3‘Ia fa‘amanuia ‘iā te oe e le Atua e ona le malosi uma lava, ‘ia uluola oe ‘iā te ia, ‘ia fa‘ato‘ateleina oe e ia ma ‘ia ‘avea oe ma fa‘apotopotoga o nu‘u; 4‘ia na avatu fo‘i ‘iā te oe le manuia o Aperaamo, o oe lava ma au fānau fa‘atasi ma oe; ‘ina ‘ia fai mou tofi le nu‘u ‘ua e āumau ai, na foa‘iina mai ai e le Atua ‘iā Aperaamo.”#Kene 17.4-8 5‘Ua ‘auina atu Iakopo e Isaako; ‘ona alu atu ai lea o ia i Patanarama ‘iā Lapana le atali‘i o Petueli le Suria, le tuagane o Repeka le tinā o Iakopo ma Esau.

‘Ua Toe Faiavā o Esau

6‘Ua iloa e Esau ‘ua fa‘amanuia e Isaako ‘iā Iakopo ma ‘auina atu ‘iā te ia i Patanarama e fai avā ai, o lana fa‘amanuia fo‘i ‘iā te ia na ia fai atu ai ‘iā te ia, ‘ua fa‘apea atu, “‘Aua ‘e te fai avā i se fafine Kanana;” 7ma ‘ua fa‘alogo Iakopo i lona tamā ma lona tinā ma ‘ua alu atu i Patanarama; 8‘ua iloa fo‘i e Esau ‘ua leaga fafine o Kanana i le manatu o lona tamā o Isaako;#Kene 26.35 9‘ona alu ai lea o Esau ‘iā Isamaeli ma fai avā ‘iā Maalata le afafine o Isamaeli, le atali‘i o Aperaamo, le tuafafine fo‘i o Nepaiota e fa‘aopoopoina ai i avā na ‘iā te ia.

O le Miti a Iakopo i Peteli

10‘Ona tu‘ua lea e Iakopo o Peresepa, ‘ae alu i Karana. 11‘Ua o‘o i le tasi mea,#28.11 tasi mea: po o le ‘ele‘ele pa‘ia. ‘ua moe ai auā ‘ua goto le lā; ‘ua ia ‘ave fo‘i ni ma‘a nai lea mea ‘ua fai mōna aluga, ‘ua ta‘oto ai i lea mea. 12‘Ua fai lana miti; fa‘auta fo‘i, o le apefa‘i ‘ua fa‘atūina i le ‘ele‘ele, ‘ua o‘o lona i‘u i le lagi; fa‘auta fo‘i, o agelu a le Atua ‘ua a‘ea‘e ma ifoifo ai.#Ioane 1.51 13Fa‘auta fo‘i, ‘ua tu ai le ALI‘I i ona luga, ‘ua fetalai mai, “O a‘u o le ALI‘I le Atua o Aperaamo lou tamā, ma le Atua o Isaako, o le fanua ‘e te ta‘oto ai ‘ou te avatu ai ‘iā te oe ma au fānau.#Kene 13.14-15 14E ‘avea fo‘i lau fānau pei o le efuefu o le ‘ele‘ele, e fa‘asalalauina solo fo‘i oe i sisifo, ma sasa‘e, ma le itū i matū, ‘atoa ma le itū i saute,#28.14 itū i saute: O le fa‘aliliuga tuai; itū i toga. o oe fo‘i ma au fānau e manuia ai ‘āiga uma o le lalolagi.#Kene 12.3; 22.18 15Fa‘auta fo‘i, ‘ou te i ai ‘iā te oe, ‘ou te tausi fo‘i ‘iā te oe i mea uma ‘e te alu i ai, ‘ou te toe fa‘afoisia mai oe i le nu‘u nei; auā ‘ou te lē tu‘ua oe, se‘ia ‘ou faia le mea ‘ua ‘ou fai atu ai ‘iā te oe.”

16‘Ona ala lea o Iakopo na moe, ‘ua ia fa‘apea “E moni lava e i ai le ALI‘I i le mea nei ‘ae ‘ou te le‘i iloa.” 17‘Ua fefe ai o ia, ‘ua fa‘apea, “O le mea mata‘utia lava lenei, e lē se mea ‘ese lenei, na o le fale lava o le Atua, o le faitoto‘a lava lenei o le lagi.”

18‘Ua tula‘i Iakopo i le taeao lava, ‘ua tago i le ma‘a na ia aluga ai, ‘ua fa‘atūina ai ma fa‘ailoga, ‘ua liligi ifo i ona luga le suāu‘u. 19‘Ua ia fa‘aigoa lea mea o Peteli,#28.19 Peteli: mai le gagana Eperu “o le fale o le Atua.” sa mua‘i fa‘aigoaina lea ‘a‘ai o Lusa. 20‘Ona faia lea e Iakopo lana tautō, ‘ua fa‘apea atu, “‘Āfai e ‘iā te a‘u le Atua ma tausi ‘iā te a‘u i lenei ala ‘ou te alu ai, ma foa‘i mai mea e ‘ai ‘ou te ‘ai ai ma ‘ofu ‘ou te ‘ofu ai, 21‘ina ‘ia ‘ou toe fo‘i ma le manuia i le ‘āiga o lo‘u tamā, ‘ona fai ai lea o le ALI‘I mo‘u Atua.#Teu 26.17; Fa‘ama 11.31; 2 Samu 15.8 22O lenei ma‘a fo‘i, ‘ua ‘ou fa‘atūina ma fa‘ailoga, e fai lea ma fale o le Atua; o mea uma fo‘i ‘e te foa‘i mai ‘iā te a‘u ‘ou te avatu lava ‘iā te oe mea e sefulua‘i.”

Currently Selected:

Kenese 28: RSCB

Highlight

Copy