Galuega 28

‘Ua Alofaina Paulo e le Nu‘u o Melita

1‘Ua sao atu i latou, ‘ona iloa lea o Melita le igoa o le motu. 2‘Ua ma‘eu lava le alolofa mai o le nu‘u ‘ese ‘iā i matou; auā ‘ua latou tafu le afi, ma talia mai i matou uma lava, ‘ona o le timuga na tō ifo, ma le malūlū. 3‘Ua fa‘aputu e Paulo le ‘avegāfafie, a fa‘ae‘e i le afi, ‘ona sau ai lea o le gata uogo ‘ona o le vevela, ma pipi‘i i lona lima. 4‘Ua va‘ai mai le nu‘u ‘ese i le mea fe‘ai o tautau ifo i lona lima, ‘ona fetautalatala‘i lea o i latou, “O le fasioti tagata lava lenā, e ui lava ‘ina ‘ua sao o ia mai le sami, ‘ae lē mafai i le to‘asā ‘ona ola o ia.” 5A ‘ua lūlū atu e ia le mea fe‘ai i le afi, ‘ua lē lagona se leaga. 6‘Ua fa‘atali i latou fa‘i e fulafula, pe pa‘ū i lalo ma lipiola; a ‘ua leva ‘ona latou fa‘atali, ma ‘ua iloa atu ‘ua lē o‘o se mea leaga ‘iā te ia, ‘ona liliu lea o latou manatu, ‘ua fa‘apea ane, o se atua lava ia.

7‘Ua latalata i lenei mea fanua o le ali‘i o le motu, o Popilio le igoa; ‘ua na talia i matou, ‘ua matou api i lona fale, ‘ua agalelei mai o ia i aso e tolu. 8‘Ua ta‘oto fo‘i le tamā o Popilio i le ma‘i vevela ma le sana toto; ‘ua alu atu Paulo ‘iā te ia, ma ‘ua tatalo, ‘ona fa‘ae‘e lea e ia o ona lima i luga ‘iā te ia, ‘ua fa‘amālōlō ai ‘iā te ia. 9‘Ua faia fo‘i lenei mea, ‘ona ō mai ai lea o ē na mama‘i uma lava i le motu, ma ‘ua fa‘amālōlōina. 10‘Ua latou alolofa mai fo‘i ‘iā i matou i mea lelei e tele; ‘ua o‘o ‘ina a matou tu‘uva‘a atu, ‘ua fa‘ae‘e o i latou i luga o le va‘a o mea e aogā.

Mai Melita i Roma

11‘Ua mavae masina e tolu, ‘ona matou tu‘uva‘a atu lea i le va‘a Alesania, sa i le motu i le tausaga e afā ai, o lona fa‘ailoga o Seukuroi. 12‘Ua ō a‘e i uta i Surakusa, ‘ona matou nonofo ai lea i aso e tolu. 13‘Ona folau fa‘atafatafa ane ai lea, ‘ua o‘o i gātai o Rekiu; ‘ua mavae ai fo‘i le aso e tasi i le agi mai ai le matagi, ‘ona o‘o lea o i matou i le aso lua i Puteoli. 14‘Ua iloa ai ni o matou uso, ‘ua pulutia ai i matou e nonofo ma i latou i aso e fitu; ‘ona ō atu lea o i matou i Roma. 15‘Ua lagona le tala ‘iā i matou e le ‘au uso o i ai, ‘ona latou ō mai lea e fa‘afetaia‘i mai ‘iā i matou, ‘ua o‘o mai lava i Apio Foro, ma Fale Fa‘atau e Tolu; ‘ua va‘ai atu Paulo ‘iā te i latou, ‘ona fa‘afetai lea i le Atua, ma loto tele ai.

Paulo i Roma

16‘Ua o‘o i matou i Roma, ‘ona tu‘u atu lea ia Paulo e nofo i lona lava fale ma se tagata tau e leoleo ‘iā te ia.

17‘Ua mavae aso e tolu, ‘ona fa‘apotopoto mai lea e Paulo o ali‘i o Iutaia; ‘ua potopoto mai, ‘ona fai atu lea o ia ‘iā te i latou, “Sema e, le ‘au uso e, e ui lava ‘ina ‘ou le‘i faia se mea fa‘alētatau i le nu‘u ma le tu o tatou tamā, na tu‘uina atu a‘u o fusifusia mai Ierusalema i lima o Roma; 18‘ua fa‘amasino mai i latou ‘iā te a‘u, ‘ona loto lea e tu‘uina mai a‘u e alu, auā ‘ua leai sa‘u amio e tatau ‘ona ‘ou oti ai. 19A ‘ua fa‘atu‘i‘ese mai Iutaia, ‘ona lē matāofia lea o la‘u vala‘au ‘iā Kaisara; ‘ae lē o ‘iā te a‘u se mea e momoli ai lo‘u nu‘u.#Galu 25.11 20O le mea lea ‘ua ‘ou ‘a‘ami atu ai ‘iā te ‘outou, se‘i tatou feiloa‘i ma fetautalatala‘i auā ‘ona o le fa‘amoemoe o Isaraelu ‘ua fusifusia ai a‘u i lenei filifili u‘amea.”

21‘Ona fai mai lea o i latou ‘iā te ia, “‘Ua matou lē maua ni tusi mai Iutaia ‘iā te oe, e le‘i sau fo‘i se tasi o tatou uso e tala mai pe fai mai se mea leaga o ‘iā te oe. 22A o lo matou mana‘o nei, se‘i fa‘alogo atu ‘iā te oe i lau tāofi; auā ‘ua iloa e i matou ‘ua tala‘eseina lenā lotu i nu‘u uma lava.”

23O le aso na tu‘u e i latou, ‘ua ō mai ai tagata e to‘atele ‘iā te ia i lana api; ‘ua fa‘amatala atu e ia ma molitino atu i le mālō o le Atua ‘iā te i latou, ma pulunaunau atu ‘iā te i latou i mea ‘iā Iesu, mai le tulafono a Mose ‘atoa ma le ‘au perofeta, e āfua i le taeao e o‘o i le afiafi. 24‘Ua talitonu fo‘i nisi i ‘upu ‘ua fai atu, a ‘ua lē talia e nisi. 25‘Ua tāofi ‘ese‘ese i latou, ‘ona ō ‘ese lea, a ‘ua uma ‘ona fai atu e Paulo le ‘upu e tasi, “‘Ua lelei lava le ‘upu na fetalai mai ai le Agaga Pa‘ia e le perofeta o Isaia i o tatou tamā, 26‘ua fa‘apea mai,

‘‘Inā alu ia i lenā nu‘u, ma fai atu,

o la ‘outou fa‘alogo e fa‘alogo ai ‘outou, ‘ae lē lagona;

o la ‘outou va‘ai fo‘i e va‘ai ai ‘outou, ‘ae lē iloa.

27Auā ‘ua mafiafia le loto o lenā nu‘u,

ma ‘ua fa‘alogo gatā o latou taliga i fa‘alogo,

‘ua moei‘ini o latou mata;

ne‘i va‘ai o latou mata,

ma fa‘alogo o latou taliga,

ma lagona o latou loto,

ma liliuina i latou,

ma ou fa‘amālōlōina i latou.’

28O lenei, ia iloa e ‘outou ‘ua molia le olataga mai le Atua i nu‘u ‘ese, latou te fa‘alogo ai lava.”#28.28 O nisi fa‘aliliuga e fa‘aopoopo i ai le fuai‘upu 29: ‘Ua mavae atu ana ‘upu nei, ‘ona ō ‘ese lea o tagata Iutaia, ‘ua tele ai lo latou fefīnaua‘i.

30‘Ua nofo fo‘i Paulo i tausaga ‘atoa e lua i lona fale e totogi, ‘ua na talia uma lava ē na ulufale ‘iā te ia. 31‘Ua tala‘i le mālō o le Atua, ma a‘oa‘o atu i mea a le Ali‘i o Iesu Keriso ma le fa‘amalosi lava e le‘i vaoia.

Currently Selected:

Galuega 28: RSCB

Highlight

Copy