Galuega 27

O le Malaga a Paulo i Roma

1‘Ua tu‘u ‘ina a folau atu i matou i Italia, ‘ona latou tu‘uina atu lea o Paulo ma isi tagata o noanoatia i le ta‘ita‘i o le to‘aselau, o Iulio le igoa, o i le ‘au a Aokuso. 2‘Ona ō a‘e lea o i matou i le va‘a Atamutiu, ma tu‘uva‘a atu, a folau ane i nu‘u o Asia; sa fa‘atasi fo‘i ma i matou o Aritako le Maketonia mai Tesalonia. 3O le taeao fo‘i ‘ua ō a‘e ai i uta i matou i Saitonu. ‘Ua agalelei mai fo‘i Iulio ‘iā Paulo, ma tu‘u atu ‘iā te ia e alu i ana uō e tali i o latou alofa mai. 4‘Ua tu‘uva‘a atu ai fo‘i, ma matou folau fa‘atafatafa ane i Kuperu, ‘ina ‘ua matagi vale. 5‘Ua uma ‘ona folau i le vasa fa‘a-Kilikia, ma fa‘a-Pafulia, ‘ona o‘o lea o i matou i Mura, o i Lukia. 6‘Ua maua ai fo‘i e le ta‘ita‘i o le to‘aselau le va‘a Alesania o le a folau atu i Italia; ‘ua na tu‘u atu i ai i matou.

7‘Ua telegese ‘ona matou folau ‘ua tele aso, na fai a lē o‘o i matou i gātai o Nitoi, ‘ina ‘ua lē mafai i le matagi, ‘ona matou folau atu lea i Kereta, i gātai o Salamone; 8se manū a lē tu‘una lea i tua, ‘ona matou o‘o lea i le mea e igoa o le Ava Matagofie; e latalata i ai le ‘a‘ai o Lasea.

9‘Ua uma aso e tele, ma ‘ua o‘o i ona po e āfatia ai folauga, ‘ua mavae fo‘i po o le anapogi, ‘ona apoapoa‘i atu lea o Paulo ‘iā te i latou, 10‘ua fa‘apea atu, “Ali‘i e, o lo‘u manatu o le a tele le leaga ma māumau o mea i lenei folauga, e lē gata i le uta ma le va‘a, ‘ae ‘atoa ma o tatou ola.” 11A ‘ua usiusita‘i le ta‘ita‘i o le to‘aselau i le tautai ma le ali‘i e ona le va‘a, ‘ae le‘i usiusita‘i i ‘upu a Paulo, 12‘Ua lē lelei fo‘i le taulaga e nonofo ai va‘a i le tausaga e afā ai, ‘ona fai mai lea o le manatu o le to‘atele o tu‘uva‘a atu ai, ma taumafai pe o‘o i Foinie e nofo ai i le tau e afā ai; o le taulaga lea i Kereta, o feagai ma sisifo i le itū i saute, o feagai fo‘i ma sisifo i le itū i matū.

O le Afā ‘ua tō i le Sami

13‘Ua agi mālie mai fo‘i le matagi, sa fa‘apea i latou ‘ua maua lo latou manatu, ‘ona tu‘uva‘a lea, ma folau ane e latalata i Kereta. 14‘Ua lē pipine ‘ona pesi mai ai o le afā tetele, o Eurokuto le igoa. 15‘Ua ‘avea le va‘a, ma ‘ua lē mafai ‘ona fa‘asaga i le matāmatagi, ‘ona matou tu‘u atu ai lea, ma ‘ua lelea. 16‘Ua lelea fa‘atafatafa ane i le tasi motu itiiti, o Kalauta le igoa, na fai ā lē mafai ‘ona mautāofi e i matou i le tulula; 17‘ua sisi ai i luga o i latou; ‘ona fai lea e i latou ni togafiti, ma saisai ifo le va‘a; ‘ua fefefe fo‘i ne‘i lafoia i le oneone fe‘avea‘i, ‘ona latou tu‘u ifo lea o mea i luga o le fanā, ‘ona lelea ai lea. 18‘Ua matuā felafoa‘iina i matou i le afā, ‘ona lafoa‘i lea e i latou i le taeao le uta; 19o le aso tolu ‘ua matou lafoa‘i ai i o matou lava lima le vao mea na i le va‘a. 20‘Ua tele aso ‘ua lē va‘aia ai le lā po o fetū, ma ‘ua tō ifo le afā tele ‘iā i matou, ‘ona i‘u lea ‘ina ‘ave‘esea uma lava o lo matou fa‘amoemoe i le ola.

21‘Ua leva fo‘i le lē manatu i mea e ‘ai, ‘ona tu atu lea o Paulo ‘iā i latou, ma fai atu, “Ali‘i e, ‘ua tatau pe ana ‘outou usiusita‘i mai ‘iā te a‘u, ma le lē tu‘uva‘a mai i Kereta, ‘ona lē mativa ai lea o ‘outou i lenei leaga ma nei mea ‘ua māumau. 22O lenei fo‘i, ‘ou te apoapoa‘i atu ‘iā te ‘outou ia ‘outou fa‘amalosi; auā e leai so ‘outou ola o māumau, nā o le va‘a. 23Auā sa tu mai ‘iā te a‘u anapō le agelu a le Atua, e ‘ona a‘u, ‘ou te ‘au‘auna i ai, 24‘ua fa‘apea mai, ‘Paulo e, ‘aua ‘e te fefe; e tatau ‘ona e tu i luma o Kaisara; fa‘auta fo‘i, ‘ua foa‘i atu e le Atua ‘iā te oe o i latou uma ‘ua folau ma oe.’ 25O lenei, ali‘i e, ia ‘outou fa‘amalosi; auā ‘ou te fa‘atuatua i le Atua, o le a fa‘apea lava pei ‘ona fetalai mai ai ‘iā te a‘u. 26‘Ae ao ‘ina lafoia o i tatou i le tasi motu.”

27‘Ua o‘o fo‘i i le sefulu ma le fa o po, o lo‘o felafoa‘iina i matou i le vasa Ateria, o le tulua o po ‘ua masalo ai le ‘au va‘a ‘ua latou fa‘alatalata atu i se nu‘u; 28‘ona fuatia ifo lea, ‘ua iloa ai ‘ua luafulu gafa; ‘ua fa‘aitiiti atu, ‘ona toe fuatia ifo lea, ‘ua iloa ai ‘ua sefulu ma le lima gafa. 29‘Ona fefefe lea ne‘i lafoia i se gaoā, ‘ona lafo ifo lea e i latou o taula e fā i le taumuli, ma ‘ua tatalo i latou ‘ina ‘ia ao. 30‘Ua manatu le ‘au va‘a e sōsōla ‘ese i le va‘a, ma ‘ua tu‘uina ifo le tulula i le sami, peiseaī a latou ‘ave ifo ni taula i le taumua. 31‘Ua fai atu Paulo i le ta‘ita‘i o le to‘aselau ma tagata tau, “‘Āfai e lē tumau i latou na i le va‘a, e lē mafai ‘ona fa‘aolaina o ‘outou.” 32‘Ona vavae ‘ese lea e tagata tau o maea o le tulula, ‘ua tu‘u atu ‘ia tafea.

33A o le‘i o‘o i le ao, ‘ua ‘ai‘oi atu ai Paulo ‘iā te i latou uma e ‘a‘ai, ‘ua fa‘apea atu, “O le sefulu ma le fā lenei o aso ‘ua ‘outou fa‘atalitali ai ma le lē mānatunatu lava i mea e ‘ai, ‘ua lē ‘a‘ai fo‘i sina mea. 34O le mea lea ‘ou te ‘ai‘oi atu ai ‘ina ‘ia ‘outou ‘a‘ai; auā e aogā lea tou te ola ai; auā e leai se lauulu o ‘outou ulu e pa‘ū.” 35‘Ua fai atu ia ‘upu, ‘ona tago lea o ia i le areto, ma fa‘afetai atu i le Atua i luma o i latou uma, ‘ona totofi lea e ia, ma āfua ‘ona ‘ai. 36‘Ona fa‘amalosi ai lea o i latou uma lava, ‘ona ‘a‘ai ai lea o i latou. 37E to‘alua selau ma le to‘afitugafulu ma le to‘aono tagata, o i matou uma lava ē nā i le va‘a. 38‘Ua mā‘o‘ona i le mea e ‘ai, ‘ona latou fa‘amāmā lea i le va‘a, ‘ua lafo ifo le saito i le sami.

O le Malepe o le Va‘a

39‘Ua ao, ‘ona lē iloa lea e i latou le igoa o le nu‘u; a ‘ua latou iloa atu le tasi faga oneone, ‘ua latou manatu, pe mafai ‘ona fa‘aoso i ai o le va‘a. 40‘Ona latou sala ‘ese lea o taula, ma tu‘u atu i le sami, ma tatala fusi o foeuli, ‘ua sisi le la taumua i le matagi, ma fa‘asaga i le matāfaga. 41‘Ua lafoa‘i fo‘i i le tolotolo oneone, ‘ona to‘a ai lea o le va‘a, ‘ona pipi‘i mai lea o le taumua, ma ‘ua mausalī lava; a ‘ua malepe le taumuli i le malosi o le galu.

42‘Ua taupule tagata tau ‘ia fasiotia ē ‘ua noanoatia, ne‘i ‘a‘au se tasi ma sola. 43A ‘ua loto le ta‘ita‘i o le to‘aselau e fa‘aola ‘iā Paulo, na vavao atu ai e ia la latou pule; ma ‘ua fai atu i ē ‘ua iloa fe‘ausi e mua‘i feosofi ifo, ma ō atu i uta; 44a o ē totoe, o isi i luga o laupapa, ma nisi i luga o mea sa i le va‘a. ‘Ua i‘u ‘ina sao uma atu ai i uta.

Currently Selected:

Galuega 27: RSCB

Highlight

Copy