2 Samuelu 5

‘Ua faia Tavita ma Tupu o Isaraelu ma Iuta

(1 No 11.1-9; 14.1-7)

1‘Ua ō mai itū‘āiga uma o Isaraelu ‘iā Tavita i Heperona, ‘ona latou fai mai lea, ‘ua fa‘apea, “Fa‘auta, o i matou o ou ivi ma ou ‘a‘ano i matou nei. 2O anamua fo‘i, ‘ina o fai Saulo ma tupu ‘iā te i matou, o oe lava sa e feta‘ita‘iina‘i ‘iā Isaraelu; na fetalai fo‘i le ALI‘I ‘iā te oe, ‘E te leoleo i lo‘u nu‘u o Isaraelu e fai fo‘i oe ma ta‘ita‘i ‘iā Isaraelu.”#1 Samu 10.1; 18.13; 2 Samu 3.9-10; 7.7-8; Sala 78.71-72; Mata 2.6 3‘Ona ō mai lea o toeaina uma o Isaraelu i le tupu i Heperona; ‘ua osi le feagaiga a i latou ma le tupu o Tavita i Heperona i luma o le ALI‘I, ma latou fa‘au‘u ‘iā Tavita e fai ma tupu ‘iā Isaraelu. 4Sa tolu sefulu o tausaga o Tavita ‘ina ‘ua fai o ia ma tupu; e fa sefulu o tausaga sa fai ai o ia ma tupu.#1 Tu 2.11; 1 No 3.4; 29.27 5Sa fai o ia ma tupu i Heperona ‘iā Iuta i tausaga e fitu ma masina e ono; a ‘ua fai o ia ma tupu i Ierusalema ‘iā Isaraelu uma ‘atoa ma Iuta, i tausaga e tolu sefulu ma le tolu.

6‘Ona ō atu lea o le tupu ma ona tagata i Ierusalema i sa Iepusē o ē sa nonofo i le nu‘u. A ‘ua latou fai mai ‘iā Tavita, ‘ua fa‘apea mai, “‘E te lē sao mai ‘i‘inei, se‘ia mua‘i ‘ave ‘ese i ē tauaso ma ē pipili;” ‘ua fa‘apea i latou, “E lē masao mai Tavita ‘i‘inei.”#Iosu 15.63; Fa‘ama 1.21 7A ‘ua ā‘ea e Tavita le ‘olo o Siona, o le ‘a‘ai a Tavita lea.

8‘Ona fai ane lea o Tavita i lea aso, “O sē fasi i sa Iepusē, ma o‘o atu i le alāvai, ma fasi i ē pipili ma ē tauaso ‘ua ‘inosia lava e Tavita.” O le mea lea ‘ua latou fai ane ai, “O ē tauaso ma ē pipili latou te lē ō mai i le fale.”#5.8 fuai‘upu 8 i le gagana Eperu e lē manino lelei.

9‘Ona nofo ai lea o Tavita i le ‘olo, ‘ua ia fa‘aigoa ai, O le ‘a‘ai a Tavita. ‘Ua ati fa‘ata‘amilo e Tavita, e āfua mai i Milo a e o‘o i totonu. 10‘Ua tupu pea lava le mamalu o Tavita, sa ‘iā te ia fo‘i le ALI‘I le Atua o ‘au.#1 No 11.4-9

11‘Ua ‘auina mai e Hiramo le tupu o Turo le savali ‘iā Tavita, ma na avatu ai la‘au o arasi, ma tufuga, ma tufuga ati fale; ‘ua latou faia le fale mo Tavita. 12‘Ona iloa ai lea e Tavita ‘ua fa‘atumauina o ia e le ALI‘I e fai ma tupu ‘iā Isaraelu, ma ‘ua fa‘amaualugaina lona mālō ‘ona o lona nu‘u o Isaraelu.

13‘Ua toe fai e Tavita o palake ma avā Ierusalema, ‘ina ‘ua alu atu nai Heperona; ‘ua toe fānau fo‘i atali‘i ma afafine o Tavita.#2 Samu 3.2-5; 1 No 3.9 14O igoa nei o ē na fānaua e ia i Ierusalema; o Samua, ma Sopapa, ma Natano, ma Solomona, 15ma Ivara, ma Elisua, ma Nefeku, ma Iafia, 16ma Elisama, ma Eliata, ma Elifaleta.

‘Ua mālō Tavita ‘iā Filisitia

(1 No 14.8-17)

17‘Ua fa‘alogo Filisitia ‘ua fa‘au‘uina Tavita e fai ma tupu ‘iā Isaraelu, ‘ona ō a‘e lea o Filisitia uma e sā‘ili ‘iā Tavita; ‘ua lagona e Tavita, ‘ona alu ifo lea o ia i le ‘olo.#1 Samu 22.4-5; 2 Samu 23.14 18‘Ua ō atu Filisitia, ma salalau i latou i le vanu o sa Rafā. 19‘Ona fesili atu lea o Tavita i le ALI‘I, ‘ua fa‘apea atu, “‘Ou te alu a‘e ‘ea ‘iā Filisitia? ‘E te tu‘uina mai ‘ea i latou i lo‘u lima?”

‘Ona fetalai mai lea o le ALI‘I ‘iā Tavita, “Alu a‘e ia, auā ‘ou te tu‘uina atu lava o Filisitia i lou lima.”

20‘Ua alu atu Tavita i Paala-faresa, ‘ona fasia lea o i latou e Tavita i lea mea; ‘ona fai ane lea o ia, “‘Ua osofia o‘u fili e le ALI‘I i o‘u luma, pei o le oso mai o vai,” o le mea lea na ia fa‘aigoa ai lea mea o Paala-faresa.#5.20 Paalafaresa: mai le gagana Eperu “O le mea na osofia ai e le Ali‘i” #Isai 28.21 21‘Ua latou tu‘ulafoa‘i ai o a latou tupua, ‘ona ‘ave ‘ese ai lea e Tavita ma ona tagata.

22‘Ua toe ō a‘e Filisitia, ma salalau i latou i le vanu o sa Rafā. 23‘Ona fesili atu lea o Tavita i le ALI‘I; ‘ona fetalai mai lea o ia, “‘Aua ‘e te alu a‘e, a ‘ia e fa‘ata‘amilo i o latou tua, ma ia alu atu ‘iā te i latou i tala ane o la‘au o peka. 24‘Ae fa‘alogo i le pāūū o le savali mai i tumutumu o la‘au o peka, ‘ona e fa‘ata‘alise ai lea, auā ‘ua alu atu ai le ALI‘I i ou luma e fasi i le itūtau‘a a Filisitia.”#Fa‘ama 4.14; 2 Tu 7.6 25‘Ona faia lava lea e Tavita, pei ‘ona fetalai mai ai o le ALI‘I ‘iā te ia; ‘ua na fasia Filisitia, e āfua mai i Kepa e o‘o atu i Kasera.#Iosu 10.33

Currently Selected:

2 Samuelu 5: RSCB

Highlight

Copy