Ruk. 15

Jesus murik meṉkakan unuikratma

(Mat. 18:10-14)

1Akupniu kuítri̱n juu tura yajauch shuarsha Jesusan anturkatai tusar tarú wéarmiayi. 2Tuma asamtai Pariséusha tura Israer shuara jintinniuri̱sha Jesusan áujmatainiak “Ju̱sha yajauch túrin shuaran itiaawai tura niji̱a̱i̱ yurumáiniawai” tiármiayi. 3Nuna tuíniakui Jesus ju̱ métektaku chichaman jintintiáwarmiayi 4“Shuar sian murikiun takuschatpiash. Nu siánnumia̱ chikichik meṉkakamtai nuwintia nuíwinkia ni matsatmari̱n ikiuak meṉkaka nuna ti e̱a̱kchattawak. Tura wáintsuk iniaisashtatui. 5Tura wainiak yakai̱nium awaṉkek waras je̱e̱n wáketui. 6Tura je̱e̱n jeá ni amikri̱n tura írutramuri̱ncha ikiaanak ‘Wiji̱a̱i̱ warastarum. Murikiur meṉkaka nuna wainkiajai’ tawai. 7Wats nuwintia nuiwi péṉker shuar akui nayaimpiniam warastin awai. Tura antsu chikichík yajauch shuar ni enentái̱n yapaji̱ámtaiṉkia nú naṉkaamas warastin átatui, tájarme” tímiayi.

Kuit emeṉkákman Jesus unuikratma

8 “Nuyá̱ chíkich enentáimsatai. Nuwa̱ tias kuítian takakna nuna chikichik meṉkakamtai wáinkiataj tusa jinia ekeemak je̱a̱n japimiak émamkes e̱a̱kchattawak. 9Tura wainiak ni amikri̱n tura írutramuri̱ncha ikiaanak ‘Wiji̱a̱i̱ warastarum. Kuit meṉkakamia nuna wainkiajai’ títiatui. 10Núnisaṉ yajauch túrin shuar ni enentái̱n yapaji̱ámtai Yusa suntari̱ matsatmanum ti warastin awai” tímiayi.

Uchi aparí̱i̱n waketkitniun Jesus unuikratma

11Nuyá̱ Jesus ju̱na unuiniamiayi “Áishmaṉ jimiará uchin takakuyi. 12Tura pátatka uchi ni aparí̱n chicharuk ‘Apawá, surustiniaitmena nu yamái surusta.’ Tutai ni aparí̱ ni kuítri̱n jímiapetek nakak uchirí̱n akantsam súsarmai. 13Ishichik tsawant naṉkaamasai̱ pátatka uchi ni warirí̱n irur jukí̱ jeachat chíkich nuṉkanam wemai. Nui̱sha náṉkamas yajauchin túrak kuítri̱n ashí amukmai. 14Ni kuitri̱ ashí amuuka ai̱ṉ nu nuṉkanam ti tsuka amai. Nisha núnisaṉ tsukaja̱i̱ wáittian juárkimiai. 15Túmak takatan e̱a̱ktajtsa nu nuṉkanmaya̱ apachí̱i̱n werimiai. Nu áishmaṉsha kuchi waitrukta tusa akupkámai. 16Uchi ti tsukamak kuchi ukatramun nisha yuátajtsa ti wakerimiai. Túrasha peṉké súcharmai. 17Tumá pujus nuiṉkia enentáimpramai. ‘Winia aparu takarin tí peṉkeran yurumáiniawai. Tura wikia ju̱i̱ tsukarui̱ wáitiajai. 18Wats, aparuí̱ waketkitjiai. Tura aparun chicharkun “Apawá Yúsja̱i̱sha tura ámiji̱a̱i̱sha yajauchin túrajai, titiajai. 19Tuma asan yamaikia ame uchiram áchamniaitjiai. Ame takarniúrmea ántsanak átaj tusan wakerajai” titiajai’ tu enentáimsamai. 20Tura wajaki̱ ni aparí̱i̱n waketkimiai” tímiayi.

“Tura ni aparí̱sha jeachat winian wainiak waitnentramai. Aparí̱ tsékeṉki̱ iṉkiuṉ miniakak mukunamai. 21Nuiṉkia uchirí̱sha chichaak ‘Apawá, Yúsja̱i̱sha ámiji̱a̱i̱sha yajauchin túrajai. Tuma asan ame uchiram áchamniaitjiai’ timiai.

22 Túrasha ni aparí̱ṉkia ni takarniúri̱n chicharuk ‘Ti peṉker pushí itiarum áentsratarum. Tura uwejnum aweetaisha aweemtikiatarum. Tura sapatcha aweemtikiatarum. 23Túrarum waaka yamatskam nuéram ana nu mátarum. Námper nájankur shiir enentáimsar yurumámi. 24Warí, ju̱ winia uchir jakaapitia tu enentáimsamjai. Túrasha iwiaakui. Meṉkakama nuna wainkiajai’ tímiayi. Nuiṉkia ti warasarmai.

25 Tumai̱ iwiá̱i̱ úchikia takatnum pujumai. Tura wáketuk je̱á̱ nuntumas jantsemáiniak túntuiyamun antukmai. 26Nuiṉkia yaintri̱ matsatun chikichkiniak untsuk ‘¿Warimpiait?’ timiai. 27Tura yaintri̱ chichaak ‘Ame yátsum tayi. Túramtai ame apa waaka yamatskam nuéram maatai tawai ame yátsum péṉker tau asamtai’ timiai. 28Tura iwiá̱i̱ uchi kajek waya̱tniun nakitramai. Tuma asamtai ni aparí̱ jiintiuki̱ ‘waya̱ta’ timiai. 29Tura uchisha aparí̱n chicharuk ‘Wisha ámin umirkun untsurí uwí ame takatrumin túraitjiai. Nu nékame. Túrasha winia amikruja̱i̱ námper najanatin chípiuksha peṉké surichuitme. 30Tura ju̱ ame uchiram nuwa̱ja̱i̱ yajauchin túrak ame kuítrumin wasurkania nu támatai waaka nuéram máchumek’ timiai. 31Takui̱ aparí̱ chicharuk ‘Uchiru, ámeka wiji̱a̱i̱ tuke pujame. Tura wi takakjana nusha ashí áminiuiti. 32Tura ame yátsum jákaiti tu enentáimsamiaj nu iwiaakuiti. Meṉkaka nu yamaikia wainkiaji. Tuma asamtai námper najanar waraschatniukaitiajⁱ timiai’” tímiayi.

Currently Selected:

Ruk. 15: jiv

Highlight

Copy