Ruk. 14

Áishmaṉ eak jaan Jesus tsuarma

1Ayampratin tsawantai̱ Pariséu uuntri̱ je̱e̱n Jesus yurumáttsa wémiayi. Tura chíkich Pariséu wariniak túrat tusar ii pujuarmiayi. 2Nui̱ áishmaṉ eak jaa Jesus pujamunam naka pujumiayi. 3Jintinniuncha Pariséuncha Jesus aniasmiayi “¿Warí tárum? ¿Ayampratin tsawantai̱ jaa tsuárminkiait. Tsuárchamniakait?” tímiayi. 4Tura nisha áimtsuk pujuarmiayi. Nuiṉkia jaan antiṉ tsuármiayi. Tura “shiir wetá” tímiayi. 5Nuyá̱ Pariséun chicharuk “Atumí umpururi̱sha, waakari̱sha wa̱a̱ táurmanum akaikí̱ iniamtai ayampratin tsawant ai̱ṉ nú chichamaik júatsrumek” tímiayi. 6Takui̱ áimkiatniun peṉké tujintkiarmiayi.

Nuatnaikiatin nampernum ipiaawarma

7Ipiaamusha peṉkeri̱ pujutai̱nium pujustaitsar ti wakeruiniakui Jesus nuna wainiak ju̱na jintintrámiayi. 8“Nuatnaikiatin nampernum peṉkeri̱ pujutai̱nium pujusaip. Nui̱ pujakminkia chíkich ámiji̱a̱i̱ naṉkaamas peṉkeri̱ táchatpiash. 9Tura ipiatmania nu chichartamuk ‘Chíkich íktusta’ turamchatpiash. Nui̱ṉkia chíkich náṉkatkamu pujutai̱nium wéakum natsa̱a̱rtatme. 10Antsu ipiatmakmin náṉkatkamu pujutai̱nium pujusta. Nuiṉkia ipiatmamnia nu chichartamuk ‘Amikru, ámeka ju̱i̱ peṉkeri̱ pujutai̱nium pujusta’ turamtatui. Nuja̱i̱ chíkich ipiaamu ainia nu ‘nekas peṉkerinti’ turamartatui. 11Iimiata, ‘peṉkerintjiai’ tu enentáimtuma nuka péejchach awajnástatui. Tura ímianchach enentáimtumana nuka waantu ajastiniaiti” tímiayi. 12Nuyá̱ Nin ipiaamua nuna chicharuk “Amesha yurumáití tusam untsuktajtsam wakerakmeka ame amikrumsha tura yatsumsha nuyá̱ ame shuarumsha írutramuram kuítrintin ainia nusha ipiaawaip. Ni ipiaamka ataksha íksaṉ ámin ipiatmashtatuak. Nuja̱i̱ akikma átatme. 13Antsu yurumáití tusam untsuktajtsam wakerakmeka kuítrincha tura wekaicha, shutuapsha nuyá̱ kusurúsha ipiaawarta. 14Nisha akirmáktinian tujintiainiawai. Péṉker shuar nantakiartatna nui̱ akinkiáttame. Nu tuma asamtai warastatme” tímiayi.

Uunt namperan Jesus nekapmá chichasma

15Nu ekentsa yurumtainiam pujuarmia nuyá̱ chikichik Jesus chichaamun antuk Jesusan chicharuk “Yus akupeamunam pachiniak yurumkuṉka ti shiir ainti.” 16Nuna takui̱ Jesus ju̱na jintiamiayi “Áishmaṉ namperan nájanuk untsurí shuaran taartí tusa akatar akupkámai. 17Yurumátin jeamtai ‘Winitiárum, yurumátin jeayi’ tu tiartá tusa ni takarniúri̱n akupkámai. 18Tura winichminiaitji tusar ashí ujakármai. Chíkich chichaak ‘Nuṉkan yamái sumarmakjai. Iyutaj tusa wéakun winishtatjai. Tsaṉkurturti’ timiai. 19Tura chíkich chichaak ‘Wisha tias waakan sumarmakjai. Nekapsattsan wakerajai. Tuma asan winishtatjai. Tsaṉkurturti’ timiai. 20Tura chíkich chichaak ‘Yamái nuatnaikiajai. Tuma asan winishtatjai’ timiai. 21Takarin waketki̱ ni úuntri̱n ashí nuna ujakmai. Nuna antuk nisha kajekmiayi. Tura ni takarniúri̱n timiai ‘Ju̱ péprunam péṉker jintianmasha tura uchich jintiachinmasha weme, kuítrincha tura wekaichasha, shutuapsha, kusurúsha itiaarta.’ 22Nuyá̱ ukunam ni takarniúri̱ taa chicharuk ‘Uuntá, ame turutmiamna nútiksanak túramjai túrasha tuke aṉkant awai’ timiai. 23Tutai ni uuntri̱ chichaak ‘Jintianam weme nuyá̱ chíkich jintiachiniam weme wáinmena nu ashí awayá̱warta. Winia je̱a̱rui̱ piákat tusan wakerajai. 24Emka ipiaawarmajnia nuka peṉké chikichkiksha wini̱ṉkia yurumáchartatui tájarme’” tímiayi.

Kristu nemarsatin yúpichuchichuiti

25Untsurí aents Jesusja̱i̱ irunki̱ wéarmiayi. Nisha nuna apajá̱s iis ju̱na tímiayi 26“Shuar ni aparí̱ncha, ni nukurí̱ncha, nua̱ri̱ncha uchirí̱ncha, yachi̱ncha, umai̱ncha Wiji̱a̱i̱ naṉkaamas enentáimtakka tura shiir pujustinian wakerak Winí̱ winitniun nakitiakka winia unuiniamur ajaschamniaiti.Mat. 10:34-39 27Ni wakeramuri̱n ajakeak ni krusri̱ yanakí̱ nemartatsna nu winia unuiniamur ajaschamniaiti.

28 Je̱a̱ yakí̱ je̱a̱mtaj tusam wakerakmeka kuítian urutmak ajapawaintiaj tusam tura urutmaja̱i̱ṉᵏⁱ amukáintiaj tusam emka enentáimsashtatmek. 29Túrutsuk aya ukura iniaisam amuktin tujintkiakmiṉkia nuna wainiainia nu wishikramainiak ju̱na tiártatui 30‘Iiskua. Nu shuar je̱a̱mtinian naṉkamamai. Túrasha amuktinian tujintkiamai.’

31 Tura úunt akupin chíkich akupniuja̱i̱ mesetan najanashtimpiash. Emka, nisha pujus tias mir suntarja̱i̱ painti mir suntar wininiana nuna nupetkaintjiash tusa enentáimsashtatuak. 32Tujintiakka chíkich akupin jeachat pujanak nawamnaikiatai tusa akatar akupkashtatuak. 33Wats, ‘Kristu unuiniamuri̱ ajastinji̱a̱i̱ wi takakjana ju̱na warí winia itiurtawa’ tu enentáimsatniuitrume. Túrachkurmeka winia unuiniamur ajastin tujintiarme.

Wee michumárka yajauchiti

(Mat. 5:13; Mar. 9:50)

34 Weeka jeaku péṉkeraiti. Tura míchuitkiuṉka ¿itiurak ataksha jeá jeat ati? 35Wee míchuitkiuṉka araatniunmasha yaya̱a̱tsui. Tura tsuatnum ikiusmasha ántraiti. Aya ajapatniukete. Kuishim ákuiṉkia antuktarum” tímiayi.

Currently Selected:

Ruk. 14: jiv

Highlight

Copy