Ruk. 10

Jesus sataintian akupkarma

1Nuyá̱ ukunam chíkich unuiniamuri̱n Jesus sataintia anaikiarmiayi. Tura jímiar jímiaran apatak émkitiarum tusa ashí péprunam ashí nuṉkanam ni wétin amia nui̱ akupkámiayi. 2Akupeak chicharainiak “Nekas tájarme, Yus Chicham étserkum júuktinia núnisaṉ aents Yus shuar awajsatin ti awai. Tura ¿yaki júukat, aya ishichik takainiasha? Tuma asamtai ni takarniúri̱ akupkat tusarum Nérentin seatarum. 3Wetarum. Átumka murikiua núniniaitrume. Úunt ya̱wa̱ yujamua núninnium tsuumai̱ ámanum akupeajrume. 4Yurumkasha, kuitcha, sapatcha jukirap, shuarja̱i̱ jintiá áujmamsatai tusarum wajasairap. 5Je̱a̱ waya̱krum emka ju̱ titiarum ‘Ju̱ je̱a̱nam pujuinia nuna Yus shiir awajsarti.’ 6Nérentin ‘Ee, nuna wakerajai’ tákuiṉkia túrunattawai. Tura ‘Atsá, wakeratsjai’ tákuiṉkia, ‘nuiṉkia túrunashti’ titiarum. 7Je̱á̱ waya̱ttarmena nú je̱a̱nmaṉ pujustarum. Tura ajampramsattarmena nu yuátarum. Warí, takakmana nu akinkiashtinkiait. Chíkich je̱a̱nam nui̱ werum nui̱ werum ajairap. 8Awa̱intiámawartatna nú peprunam jearmeka ajampramsartatna nu yuátarum. 9Jaa ainia nu tsuartarum. Túrarum ‘Yus ju̱ nuṉkanam akupin ajastin ishichik ajatémsai’ nu peprunmaya̱ shuar titiarum. 10Íksarmek itiaarmachartatna nú peprunam jearum jintiá wajasrum ju̱ titiarum 11‘Yusna nakitra asakrumin, atumí pépruri̱nia̱ nuṉka ii nawe̱n peema japirar akakekji. Túrasha ju̱ paant nekaatarum, Yus ju̱ nuṉkanam akupkatin ishichik ajatémsai.’ 12Yusa nekapsatin tsawantri̱ jeamtai nu peprunmaya̱ shuaran ti asutiáttawai. Yaunchu Sutumanmaya̱ shuaran asutiámia nuja̱i̱ naṉkaamas asutiáttawai. Núnaka paant tájarme” tímiayi.

(Mat. 11:20-24)

13 “Kurasínnumia̱tirmesha aneartarum. Petsaitia péprunmaya̱tirmesha aneartarum. Atumí pépruri̱i̱n aents tujintiamun ti túraitjiai. Warí, yaunchu Tírunmasha, Setunnumsha nu tujintiamu túramuitkuiṉkia yaunchu ni enentái̱n yapaji̱áwara̱a̱yi. Túrawar kúntuts pujutai̱ pushin entsarar yuṉkunim ajakiara̱a̱yi. 14Tura atumsha aents tujintiamu túramu wáiniatrum yapaji̱achu asakrumin Tírunmaya̱ tura Setunnumia̱ aentsja̱i̱ naṉkaamas asutniáttarme. 15Tura atumsha Kapernáumnumia̱tirmesha ‘ti naṉkamantu ajasár nayaimpiniam jeattaji’ tu enentáimtsurmek. Antsu auka jaka wait ajá matsamtai̱niam jeattarme. 16Atumín anturtamainiakka Winiasha anturtuiniawai. Atumín nakitramainiakka Winiasha nakitruiniawai. Tura nú arant Winia nakitrakka Winia akuptúkua nunasha nakitiawai.” Tú áujas Jesus niin akupkarmiayi.

Sataintia unuiniamu waketki̱ taarma

17Ukunam nu sataintia unuiniamu warasar waketki̱ táarmiayi. Tura chichainiak “Uuntá, ame náarmi̱i̱n íwianch ji̱i̱ki̱ akupeam umirtamkamji” tiármiayi. 18Tutai Jesus chichaak “Ee, Wisha nayaimpinmaya̱ peem peetna núnisaṉ iwianchi uuntri̱ Satanásan akaikí̱ iniaan wainkiamjai. 19Atumniaka winia kakarmarun susamjarme. Napi najarmasha titiṉ najarmasha yajauch awajtámsa̱i̱rum tusan tura ii nemasri̱ kakarmari̱ nupetkatniuncha susamjarme. 20Túrasha íwianch umirtamkui nu enentáimsam warasairap. Antsu atumí naari̱ nayaimpiniam aarma aa asamtai warastarum” tímiayi Jesus.

Jesus Yusan áujas warasmiayi

(Mat. 11:25-27; 13:16-17)

21Nuiṉkia ni enentái̱n Yusa Wakaní̱ waramtiksam Jesus ju̱na tímiayi “Aparu, ashí nayaimpiji̱a̱i̱ nuṉka Úuntrinme. Tuma asam ju̱ túrunamu tí unuimiaru enentáimtumainia nuyá̱ ú̱kuitme. Antsu uchichia núnis naṉkamantuchu enentáimtumainia nú shuar paant awajtúsuitme. Ee, Aparu, núnik wakerichmakum. Tuma asamtai shiir enentáimtajme, Aparu. 22Winia Apar ashí surusuiti. Wisha ni Uchirí̱ asamtai Winia nékarui. Tura chíkich Winia nekas nekarainiatsui. Yus Apancha Wiki nékajai. Tura Wi wakeraj nú shuaran winia Aparun paant awajtajai. Nú shuarsha winia Aparun nékainiawai” tímiayi Jesus.

23-24Nuyá̱ ni unuiniamuri̱n iis chicharainiak “Wi tájarme, untsurí Yúsnan etserniusha tura úunt akupniusha átum yamái wáintrum nuna wáinkiatniun wakeruiniayataṉ wáinkiacharmiayi. Tura átum yamái ántarme nuna antuktinian wakeruiniayataṉ antukcharmiayi. Tura Yus achirmáku asakrumin wáintrumna nu tí peṉkeraiti” tímiayi.

Samarianmaya̱ áishmaṉ numpamnan yaiṉma

25Nuyá̱ akupkámun jintinkiartin Jesus warintiak chichakat tusa wajatki̱ werimiayi. Werí iniimiayi “Uuntá, wi tuke iwiaaku átaj takun ¿warinia túratniuitiaj?” tímiayi. 26Tutai Jesus aya̱k “¿Yus Papinium Muisais áarmanum waritia áarmait. Itiur áujeam?” tímiayi. 27Akupkámun jintinkiartin aya̱k “Ju̱na tawai, tuke enentáimjiai Uunt Yus ame Yúsrum nekas takamtsuk enentái̱ji̱a̱i̱ tura ashí ame kakarmarmiji̱a̱i̱ tura ashí ame enentáimtairmiji̱a̱i̱sha aneata. Tura ame aya̱shim aneamna nútiksamek ame írutramurmesha aneata. Núchakait” tímiayi.Muis. 6:5 28Tutai Jesus chichaak “Péṉker aimkiame. Nu túram iwiaaku pujustatme.”

29Tutai akupkámun jintinkiartin ni inintramun kíishtumaktajtsa wakerak “Winia írutramursha ¿ya ainia?” 30Takui̱ Jesus chicharuk “Jerusaréṉnumia̱ jintia Jirikiúnam jeana nú jintianam áishmaṉ wéan kasa áishmaṉ tariar ni warirí̱n tura pushiri̱ncha kasarkarmiayi. Tura awatrar mayái̱ ashirak aju̱a̱ntar ikiukiarmiayi. 31Tura Yúsnan pujurin ukunmaṉ winis nú aishmaṉkan wainiak iikiaṉ iis ikiukmiayi. 32Nuyá̱ ukunam Yúsnan pujurniu yáintri̱sha nu jintianam wesa nú aishmaṉkan wainiak iisan ikiuak wémiayi. 33Tura nuyá̱ Samariamaya̱ áishmaṉsha nu jintianmaṉ wesa nú aishmaṉkan wainiak ní shuarinchunak waitnentramiayi. 34Nuyá̱ nú aishmaṉkan weantuk ni numpamnamuri̱n asuitiji̱a̱i̱ tura wíniuja̱i̱ tsuar jaanchji̱a̱i̱ penuarmiayi. Tura ni kawairi̱i̱n ekenak jukimiayi. Tura írar kanutainiam jukí̱ ejé nu áishmaṉkan péṉker wainkiamiayi. 35Tura kashin tsawa̱rmatai Samarianmaya̱ áishmaṉ weak jimiará kuítian jusa je̱á̱ nérenniuri̱n susamiayi. Susa chichaak ‘Jú̱ aishmaṉ péṉker waitrukta. Tura wi amaajna ju̱ táasmataisha wi wáketkun akiktájme’ tímiayi. 36Kame ámiji̱a̱i̱sha nu menaint ainia nu ¿túa imiá nekas katsumkamun waitnentramia?” tímiayi Jesus. 37Takui̱ akupkámun jintinkiartin chichaak “Katsumkamun waitnentramia nú” takui̱ Jesus chicharuk “Amesha weme núnismek túrata” tímiayi.

Marta tura Marí je̱e̱n Jesus pujusma

38Nuyá̱ Jesus jintiá wesa chíkich péprunam jeamiayi. Nu péprunmaya̱ nuwa̱ naari̱ Marta ni je̱e̱n itiaamiayi. 39Marta kai̱ ámiayi ni naari̱ Marí. Marisha Ni chichame̱n anturkataj tusa Jesusa nawe̱n pujursamiayi. 40Tura Mártaka ni takatrí̱n ti enentáimtak Jesusan weantuk chicharuk “Uunt Jesusá, ¿winia kair takatan winiak íktursainia nu enentáimtsumek? Winia chichamprutkum kaim yaiṉtá turuttia” tímiayi. 41Tutai Jesus chicharuk “Maa Martá, untsurí túratin ana nu ti enentáimsam itit awajtamui. 42Tura aya chikichik nekas túratniuiti. Marikia nekas péṉker ana nuna achikiai. Nusha peṉké jurunkishtatui” tímiayi.

Currently Selected:

Ruk. 10: jiv

Highlight

Copy