Ruk. 9

Jesus etserkarat tusa akupkarma

(Mat. 10:5-15; Mar. 6:7-13)

1Ni tuse unuiniamuri̱n ikiaanak ni chichame̱ja̱i̱ iwianchrukun enentái̱ya̱n iwianchin ji̱i̱rki̱ akupkatniun tura suṉkurja̱i̱ jaa tsuártinniasha ni kakarmari̱n súsarmiayi. 2“Yus akupin ajastin ujaktarum tura jaa tsuartarum” tinia Jesus akupkarmiayi. 3Nuyá̱ chichaak “Wéakrum áyatik wetarum. Ushukrustincha, u̱yuncha, yurumkasha, kuitcha peṉké jukiirap. Aya chikichík pushí jukitiarum. 4Náṉkamas je̱a̱nam jearum waya̱rmeka nuiṉ pujustarum. Nuiṉ pujusrumek chíkich péprunam wéakrum jíinkitiarum. 5Tura atumín awa̱intiámatniun nakitiana nú péprunmaya̱ jiinkirum nawemíya̱ nuṉka akakekrum ikiuktiarum. Awa̱intiámachma paant ati tusarum nu túratarum” tímiayi.

6Nuyá̱ jíinkiar ashí péprunam uwempratin chichaman ujakiar wéarmiayi tura ashí péprunam jáiniancha tsuákiar wéarmiayi.

Irutis “Jesusan íistaj” timia

(Mat. 14:1-12; Mar. 6:14-29)

7-8Uunt akupin Irutis Jesus túramun antukmiayi. Nu túramun chíkich shuarka “Juaṉ jakamunmaya̱ nantaki̱ túrawai” tu wéarmiayi. Chíkichkia “yaunchu Yúsnan etserin Irías wantiniak túrawai” tu wéarmiayi. Chíkichkia “chíkich yaunchu etserin nantaki̱ túrawai” tiármiayi. Tuma asamtai Irutis peṉké nekaachmiayi. 9Tura chichaak “Wiki, Juaṉka muuke̱ tsupirkatarum, tíchamkaj. Tuma ai̱sha, ¿ju̱ shuar, ni túramuri̱ ashí shuar chichainia nusha yátsukait?” Tu enentáimiuk “íistaj” tímiayi.

Jesus seṉku mir áishmaṉkan ayuramu

(Mat. 14:13-21; Mar. 6:30-44; Jṉ. 6:1-14)

10Atak Jesusa akatrámuri̱ waketki̱ taar ni túramuri̱n Jesusan ujakármiayi. Nui̱ṉkia aents atsamunam Petsaitianam tíjiu̱ch weak nui̱ júkiarmiayi. 11Tura peṉké shuar nuna nekaawar nemariarmiayi. Túram Jesus nin shiir áujsamiayi. Tura Yusa akuptáiri̱ pachis unuiniamiayi. Tura jaa armia nuna tsuararmiayi.

12Tura kí̱akui̱ tuse unuiniamu Jesusan weriar chicharainiak “Uuntá, shuar akupkachminiashit. Tíjiu̱ch péprunmasha, shuarnumkesha wéar ni yurumátniuri̱n sumarmakarti tura kanartintri̱n wáinkiarti. Ju̱i̱ pujajnia ju̱i̱ṉkia peṉké atsawai” tiármiayi. 13Tutai Jesus chicharainiak “Atumsha ayuratarum.” Tutai chichainiak “Iisha aya seṉku paṉ tura namaksha jímiarchik takakji. Warí ju̱ shuar ayuratin aya sumakrisha ejemniaitji” tiármiayi.

14Áishmaṉsha ti untsurí seṉku mir jeá ámiayi. Tura Jesus ni unuiniamuri̱n chicharainak “Seṉkuintia seṉkuintia kanaarum aṉkant aṉkant pujustarum titiarum” tímiayi. 15Túrawarmatai ashí pujusármiayi. 16Nuyá̱ seṉku páṉkan tura jimiará namaknasha Jesus achik yakiini̱ íimias Yusan yumiṉsamiayi. Nuyá̱ ajamsarat tusa ni unuiniamuri̱n súsarmiayi. 17Ashí yurumáwar ejemararmiayi. Tura ampirman tuse chaṉkinnium áimkiarmiayi.

Jesus Yusa anaikiamuri̱nti ujakma

(Mat. 16:13-19; Mar. 8:27-29)

18Jesus ni unuiniamuri̱ji̱a̱i̱ aentsnumia̱ kanakí̱ pujuarmiayi. Jesus Yusan áujsua umik ni unuiniamuri̱n chicharuk “¿Winiasha yaiti turutainiawa?” tímiayi. 19Nisha chichaak “Chíkich Imiakratin Juáṉkaiti turamainiawai. Chikicha Iríasaiti tura chíkichkia yaunchu Yúsnan etserin nantakniua núiti turamainiawai” tiármiayi. 20Tutai “Atumsha ¿yaiti túrutrum?” takui̱ Pítiur chichaak “Ámeka Yusa Anaikiamuri̱, Kristu tutaiya núitme” tímiayi. 21Tutai Jesus “Peṉké etserkairap” tímiayi.

Ni jákatniuri̱n Jesus ujakma

(Mat. 16:20-28; Mar. 8:30—9:1)

22Nuyá̱ Jesus chichaak “Wi Aents Ajasuitjiana ju̱ tí waitsatniuitjiai. Wí shuara uuntri̱ tura Yúsnan pujurniu úuntri̱sha nuyá̱ ni jintinniuri̱sha nakitrurar mantuarwartatui. Túrasha iwiartusarmatai menaintiú tsawant jeamtai nantaktiatjai” tímiayi. 23Nuyá̱ ashí aentsun chicharuk “Shuar Winia nekas nemartustajtsa wakerakka ni wakeramuri̱ṉkia iniaisati. Tuke tsawant ni krusri̱ yanakí̱ nemartusti. 24Kame shuar ju̱ nuṉkanam aya péṉker pujustaj tákuṉka nu shuar uwemtsuk jakattawai. Antsu Winia anentu asa péṉker pujustinniak enentáimtsuna nú shuarka nekas iwiaakman wainkiattawai. 25Iimiata, shuar ashí ju̱ nuṉkanam ana nuna súmakui tura jinium wétin ákuisha ¿itiurak péṉker pujusat? 26Wi Aents Ajasuitjiana ju̱ Winiasha tura winia chichampruncha shuar natsantraitkiuiṉkia winia wincharuja̱i̱ winia Aparu winchari̱ji̱a̱i̱ tura nayaimpinmaya̱ péṉker suntara winchari̱ji̱a̱i̱ atak táakun shuar natsantrurmia nuna Wi natsantrattajai. 27Tura shuar Yusa akuptáiri̱n wáintsuk jákachartatna nu ju̱i̱ pujuiniawai. Nuna nekas tájarme” tímiayi.

Jesus nusháa iira ajasma

(Mat. 17:1-8; Mar. 9:2-8)

28Nuna tuasua amik nuyá̱ chíkich semanatin Yusan áujsataj tusa Jesus nainnium wakamiayi. Pítiur, Jakupu, Juaṉja̱i̱ nemariarmiayi. 29Jesus auju pujus nusháa iira ajattsarmiayi. Ni pushirí̱sha ti puju jíitsumir ajasmiayi. 30Nui̱ṉkia jimiará aishmaṉ Niji̱a̱i̱ chicháa wajarmiayi. Nuka Muisais Iríasja̱i̱ ármiayi. 31Niincha wincha jíitsumir téntakarmiayi. Tura Jesus wáitias Jerusaréṉnum jákatniuri̱n amia nuna áujmatiarmiayi. 32Pítiur ni tsaníakmari̱ji̱a̱i̱ kari̱ ti pujainiai̱ṉ iwiáa pujuarmiayi. Tuma ásar Jesusan tura jimiará aishmaṉja̱i̱ jíitsumir ajas wajainian wáinkiarmiayi. 33Tura nú aishmaṉ Jesusan ikiukí̱ weenai̱ Pítiur Jesusan chicharuk “Uuntá, iisha ti shiir pujatsjik. Menaintiú áakmaktai, Áminiusha, Muisaisnasha, Iríasnasha áakmaktai” tímiayi. Tura Pítrusha enentáimtsuk nuna tímiayi. 34Nuna chicháa pujái̱ yuraṉkim tarí kaput amúawarmiayi. Tura yuraṉkim amuam ti ashamkarmiayi. 35Nuiṉkia yuraṉminmaya̱ chichaamun antukarmiayi “Ju̱ka winia aneamu Uchiruiti. Ni anturkatarum.” 36Chichaamun antasua amikiar Jesus niṉki wajan wáinkiarmiayi. Nuiṉkia tákamtak pujuarmiayi. Tura wáinkiarmia nuna peṉké etserkacharmiayi.

Uchi iwianchrukun Jesus tsuarma

(Mat. 17:14-21; Mar. 9:14-29)

37Kashin tsawantai̱ náinniumia̱ táarmatai ti untsurí shuar Jesus iṉkiuṉtai tusar wéarmiayi. 38Nu shuarnumia̱ chikichik áishmaṉ Jesusan untsuk chicharuk “Uuntá, waitneasam uchir íirtusta. Kame uchirsha jú̱chikiti. 39Íwianch aya aneachma eṉkemturam náṉkamas untsumui. Tura chichichiptu ajas wenunmasha saun kaput apaawai. Íwianch nin tuke yajauch awajás aṉkant awajsatniun nakitiawai. 40Túmakui̱ ame unuiniamurmin iwianchin jí̱i̱rtukit tusan seamjai. Túrasha tujintkiarmai” 41tutai Jesus chichaak “Yus enentáimtichutirmin, tutupnik wekaichatirmin ¿urutmá tsawanttsuk atumji̱a̱i̱ pujustaj. Urutmá katsuntratjatsuk? Uchiram ju̱i̱ itiata” tímiayi.

42Tura uchi winian íwianch nuṉká aju̱a̱nt chichichiptu aepsamiayi. Tura Jesus iwianchin kakantar chicharkamiayi. Tura uchin péṉker awajás ni aparí̱n awaṉtuki̱ susamiayi. 43Tura ashí pujuarmia nu ti enentáimprar “Yuska imiá uuntchakait” tiármiayi.

Jesus ni jákatniuri̱n ataksha ujakma

(Mat. 17:22-23; Mar. 9:30-32)

Jesus túramun ti enentáimtu pujuiniai̱ Jesus ni unuiniamuri̱n chicharainiak 44“Wi tájarmena ju̱ péṉker antuktarum. Winia Aents Ajasu tutain surutkartatui” tímiayi. 45Tura Ni timia nuna unuiniamuri̱ nekaacharmiayi. Nekaawara̱i̱ṉ tusa paantcha awajsámuyayi. Tura wariṉkit tusa anintrústinniasha arantúkarmiayi.

¿Yaki imiá naṉkamantuit?

(Mat. 18:1-5; Mar. 9:33-37)

46Nuyá̱ ni unuiniamuri̱, yaki imiá naṉkamaku ati tusa nuamtak mái̱ tunai ajarmiayi. 47Tura ni enentáimsamuri̱n Jesus nekaamiayi. Tuma asa uchin achik ni pujamunam itiamiayi. 48Itiá chichaak “Winia anentuk ju̱ uchin shiir awajeana nuka Winiasha shiir awajtawai. Tura Winia shiir awajtana nuka Winia akuptana nunasha shiir awajeawai. Kame átum naṉkamantuchu tárumna nu ti nekas naṉkamantuiti” tímiayi.

(Mar. 9:38-40)

49Nuyá̱ Juaṉ chicharuk “Uuntá, shuar ame náarmin pachis iwianchin ji̱i̱ki̱ akupea nu wainkiamji. Tura iin páchitkiachu asamtai nuka suritkiamji.” 50Tutai Jesus chichaak “Antsu suritkiairap. Shuar iin nakitramachkuṉka iin páchitkiawai” tímiayi.

Jesus Jakupuncha Juáṉnasha chicharkarma

51Jesus nayaimpiniam waketkitniuri̱ jeatémamtai enentáimmia ímiatrusaṉ Jerusaréṉnum we wémiayi. 52Wesa kanartinian wáinkiarat tusa akatar émtikiarmiayi. Tura nisha Samarianam jeawarmiayi. 53Tura Samarianmaya̱ aentska Jerusaréṉnum wénan nekaawaru ásar itiaatniun nakitrarmiayi. 54Jesusa unuiniamuri̱ Jakupusha Juaṉsha nuna nekaawar Jesusan chicharainiak “¿Uuntá, Irías yaunchu túramia núnisrik iisha túrat tusam wakeramek. Nayaimpinmaya̱ ji tara Samarianmaya̱ aentsun amukarti, títiatjik?” tiármiayi. 55Tutai Jesus nin iisar kakantar chicharuk “Atumsha atumí enentái̱ urukukit nuka nekamatsrume. 56Wi Aents Ajasu aentsun emesrattsan táchaitjiai. Antsu uwemtikratajtsan táwitjiai” tímiayi. Nuyá̱ chíkich péprunam wéarmiayi.

Jesus nemarsatin

(Mat. 8:19-22)

57Jintiá weenai̱ chíkich áishmaṉ Jesusan chicharuk “Uuntá, tui̱ wétatam nui̱sha nemarsatjame” tímiayi. 58Tutai Jesus chichaak “Ku̱janchmasha ni wá̱a̱ri̱n takaktsuk. Chiṉkisha pasuṉke̱n takaktsuk. Tura Wi Yusa Uchirí̱ntiatan tepesan ayampratniur atsawai” tímiayi. 59Chíkich áishmaṉkan Jesus nemartusta tutai chichaak “Antsu, Uuntá, winia apar jakamtai iwiarsa ikiuakun nemarsatjame. Nu tsaṉkatrukta” tímiayi. 60Tutai Jesus chichaak “Jakaa ainia nu ni shuari̱n iwiarsatniunka enentáimtusarti. Tura ámeka weme Yus akupeamu urukukit nu etserkata” tímiayi. 61Nuyá̱ chikicha chicharuk “Uuntá, nemarsataj tusan wakerajme. Túrasha wí shuaran emka áujsan ikiuweartaj tsaṉkatrukta” 62tutai Jesus chichaak “Shuar pukuayat ukunmaani̱ apajá̱s iimna nu, Yus akupeana nui̱ takaschamniaiti” tímiayi.

Currently Selected:

Ruk. 9: jiv

Highlight

Copy