Naṉ. 41

Parauṉ mesekrampramun Jusé paant awajtúsma

1Jimiará uwí naṉkaamasu ai̱ Parauṉ mesekrampramiayi. Tura mesekranam Niru yantamén wajái̱ 2entsaya̱ siati waaka péṉker jaeram jíintrarmai. Túrunawar entsá supichik sa̱a̱k irunmia nuna yuarmai. 3Nuna tumai̱ ukunmaani̱ chíkich siati waaka yajauch watsakaru entsaya̱ jíintrar káunkar péṉker wajarma nui̱ tíjiu̱ch wajasármai. 4Nuyá̱ waaka yajauch watsakaru arma nu péṉker waaka jaeram siati arma nuna yuínian wainkiamai.

Tura Parauṉ shintiar 5atak kanaksha nuya̱sha mesekrampramai. Mesekramuk chikichík shanumaṉ siati sha péṉker tuyu̱rkar péemprar ti nerekárun wainmiai. 6Tura nuna úkuri̱i̱ni̱ chíkich siati sha etsa̱ jintiainmaya̱ mayai̱ tsue̱r áeskamua núnin uchich nerekarmai. 7Áeskamua ánin uchich arma nu siati sha péṉker arma nuna yúawarmai.

Tura Parauṉ kuraat shintiar mesekranmanchukait tú enentáimpramiayi. 8Tura kashin káshik ti itiurchat enentáimiar Ejiptunmaya̱ nekamin tura mesekran neka armia nunasha untsukarmiayi. Tura káunkarmatai Parauṉ ni mesekrampramuri̱n ujakármiayi, túrasha neka armia nusha ni mesekrampramuri̱n nekarachar ujaktinian tujintkiarmiayi. 9Nui̱ṉkia wíniun sukartinia uuntri̱ Parauṉkan chicharuk “Aj, yajauch túramurun yama enentáimpraj ju̱na ujaktájme. 10Uuntá, páṉkan najatramniu úuntri̱sha tura winiasha kajerkartukam suntara uuntri̱ je̱e̱n sepunam eṉkekratamame. 11Tura nu kashi páṉkan najanniu úuntri̱sha niisháa mesekrampramai tura wisha wisháa mesekrampramjai. Aṉkant aṉkant mesekrasha nusháa nusháa túrunatniuyayi. 12Tura nui̱ sepunam Israer shuar natsa suntara uuntri̱ iniatairi̱ iiji̱a̱i̱ pujumai. Nú aishmaṉ ii mesekrampramu ujakam warí mesekrait nuna ashí ujatmákmaji. 13¡Tura ni timia nuja̱i̱ métek túrunamai! Tura wikia ataksha winia takatrun naṉkamamjai tura chikichnaka kajemtikrar máwarmai” tímiayi.

14Nuna takui̱ nuya̱ṉka Jusé sepunmaya̱ ji̱i̱ki̱ itiatárum tusa Parauṉ akupkarmiayi. Túram wárik jí̱i̱kiarmiayi. Jí̱i̱kim Jusesha susuri̱n tsupir pushiri̱n yapajmiáma Parauṉkai̱ wémiayi. 15Tura jearim Parauṉ Jusen chicharuk “Mesekramprajai túrasha ¿warí mesekrakit? ujatkatin atsawai. Antsu ámin mesekrampramun nekáa táman anturkajme” tímiayi. 16Tutai Jusé chichaak “Kame wikia jeatsjai antsu Yusak núnaka ujatmákminiaiti. Tuma asa ámin waitnentramak ¿warí mesekrait? nuna uuntá, ujatmáktatui.” Tú ái̱kmiayi. 17Tutai Parauṉ Jusen chicharuk “Wi mesekranam Niru yantamén wajái̱ 18entsaya̱ siati waaka péṉker tura shíirmach jaeram jíintrar entsá yantamén sa̱a̱k wajainian yuiniá. 19Tura chíkich siati waaka watsararu úkunchik jíintrara tura wikia waaka tímiau watsararu úkunchik áinian ju̱i̱ Ejiptunmasha wáinchaitiaj. 20Nú siati waaka watsararu siati jaerman emka jíintrara nuna yuáwara. 21Nuna yúawarsha mash amukariat yukartuachua núnisaṉ tuke úkunchik ainia. Nui̱ shintiaraj. 22Tura atak mesekramkun chikichík shanumaṉ siati sha tí peṉker úuntan nerekárun wáiniaj. 23Tura nuna úkuri̱n chíkich siati sha káakaru mayai̱ tsue̱r etsa̱ jintiainmaani̱ya̱ umpuam esakárun wáiniaj. 24Nú siati sha saṉkut ainia nuna yuinia. Tú mesekrampran ti neka ainia nu ujakármasha ¿warí mesekrait? nunasha ujatkacharai” tu ujakmiayi Jusen.

25Tutai Jusé Parauṉkan aya̱k “Uuntá, jímiar mesekrampram nuka mái̱ nukete. Yus Ni túrattana nuna iniakturmasai. 26Siati waaka shiir jaeram wáinmena nuka siati uwikiti. Núnisaṉ siati sha úuntan nerekáru wáinmena nusha siati uwikiti. Nú mesekrakete. 27Núnisaṉ siati waaka yajauch watsakaru jiintra nusha siati uwikiti. Tura siati sha etsa̱ jintiainmaya̱ mayai̱ tsue̱r áeskamu wáiniam nusha siati uwikiti. Ju̱ka siati uwí tsuka átatui. 28Wi tájamna ju̱ja̱i̱ métek Yus túrutmattana nuna iniakturmasai, uuntá. 29Siati uwitin ashí Ejiptunam ti taramkattarme. 30Tura nu naṉkaamasmatai ataksha siati uwí ti tsuka átatui. Warí tsukamawar matsamsachmin ajasmatai ju̱i̱ Ejiptunam taramkarmia nunasha enentáimtuschartatui. Árakka tsapaichmin ajastatui. 31Ti tsukamnamtai yaunchu taramkarmia nusha imiata jú̱niktiniuya tunattawai. 32Uuntá, jimiará mesekra ipiatramka asa Yus nekas túrattajai tusa iniakturmasai. Tura nusha wárik uminkiattawai. 33Tuma asamtai Parauṉká, aents ti neka Ejiptunam chichampruktin anaikiata. 34Uuntá, ju̱ túratin péṉker ainti. Uuntri̱ anairarta. Nisha ashí Ejiptunam wéar siati uwitin tí nukap árak átatna nu ashí araknumia̱n séṉkunmaya̱n chikichkiniak ikiustinian itiarti. 35Siati uwitin ame chichammiji̱a̱i̱ tí nukap taramnakmanumia̱ irumnarti. Tura ashí péprunam irumprar ikiusma atí aents yurumáwartin. 36Tura siati uwí tsuka átatna nui̱ Ejiptunmaya̱ aents tsukaja̱i̱ kajinkiara̱i̱ṉ tusar ashí matsatkamunam irumnarti.” Tú timiayi Jusé Parauṉkan.

Jusé Ejiptu nuṉka uuntri̱ awajsamu

37Kame Jusé timian Parauṉsha tura anaikiamuri̱sha nekas péṉker tawai, tu enentáimtusarmiayi. 38Tuma asamtai Parauṉ ni takarniúri̱n chicharainiak “Juseja̱i̱ métek Yusa Wakaní̱ pujurma aents wainkiatjash” tímiayi. 39Tuma asa Jusen chicharuk “Kame ámiji̱a̱i̱ métek chíkichkia atsawai. Aminiak Uunt Yus nekamtikramu asamtai ti nékaitme. 40Nu tuma asamtai ame winia je̱a̱rui̱ akupin ai̱ tusan ánaiyajme. Tura ashí aents ámin umirtamin ártatui. Aya wiki ashí akupin asan ámiji̱a̱i̱ naṉkaamas uunt átatjai. 41Iisiana, ashí Ejiptu nuṉka akupniúri̱ ánaiyajme” tímiayi Parauṉ. 42Nuna tinia Parauṉ ni akupkur awetai̱ aniyun ukuiniak Jusen susamiayi. Nuyá̱ tí peṉker riniu pushí áentsramiayi. Tura nuṉkutai̱ kuriji̱a̱i̱ najanamun anuṉkramiayi. 43Nuyá̱ Parauṉka káruri̱ya̱ uku wininiuya̱ nú karun Jusen susamiayi. Tura Jusé wéamuri̱n aents emki̱ wéar untsumainiak “Jintiaya̱ menastarum” tiarat tusa Parauṉ akupkámiayi. Nú túrunamuja̱i̱ ashí aents Jusé uunt awajsámun nekaawarmiayi. 44Nuyá̱ Parauṉ Jusen chicharuk “Wisha uunt asan tájame ame chichammiji̱a̱i̱nchuka Ejiptunmaya̱ aentska peṉké warinkesha túrachmin áiniawai” tímiayi. 45Tura Parauṉ Jusenka Ejiptunmaya̱ aentsu náari̱n Sapnatpanea anaikiamiayi. Tura Un péprunmaya̱ yúsnan takarin Putipiára nawantri̱ Asenátja̱i̱ Jusenka nuatmamtikiamiayi. Nuní̱ túruna Juseka Ejiptunam akupin ajasmiayi.

46Nuyá̱ Jusé Parauṉkan takartan juárminia nui̱ṉkia traintia uwí takakuyayi. Tura takatan juáruk Parauṉkan áujas ikiuak ashí Ejiptu nuṉkanam wémiayi. 47Nui̱sha árak siati uwí tí peṉker núkap nerekarmiayi. 48Tura nú siati uwitin Juseka júukmanumia̱n ashí achik aṉkant aṉkant pepru tíjiu̱ch armia nui̱ irumkamiayi. 49Tí nukap nekapmarchamnia juukma asamtai nekapmatsuk iniaisámiayi.

50Kame tsuka jeatniuka chikichik uwí taasu ai̱ najankamu yusa takarin Únmaya̱ Putipiára nawantri̱ Asenátai̱ Juseka jimiará uchin yajutmarmiayi. 51Emka uchin Juseka “Yus wi wáitsatniun tura wí shuarnasha kajinmamtikrukniuiti” tú enentáimias Manasés anaikiamiayi. 52Patai̱nkia “Yus wi jú̱ nuṉkanam wáitsamiaj ju̱i̱ uchi yajutmaktinian surusuiti” tú enentáimias Eprain anaikiamiayi.

53Kame Ejiptunam siati uwitin ti taramkarmia nu naṉkaamasmiayi. 54Nu naṉkaamasmatai siati uwí Jusé timia nuja̱i̱ métek tsuka ámiayi. Ashí nuṉkanam tsúkaka ámiayi tura ashí Ejiptunmaṉka yurumkaka ámiayi. 55Tura ukunam Ejiptunmaya̱sha tsukamtemawar Parauṉkai̱ yurumak juukman seatái tusar werú wéarmiayi. Tura jeawarmatai Parauṉ ashí Ejiptunmaya̱n chicharainiak “Jusé werirum seautarum tura ashí ni títiatna nu túratarum” tímiayi.

56Tura ashí Ejiptunam tsukamnaki̱ wéakui irumpramia nuna suruktaj tusa Juseka ikiutai̱n urá wémiayi. 57Tura chíkich nuṉkanmaya̱sha tsukamawar Jusée sumautai tusar Ejiptunam káutiarmiayi.

Currently Selected:

Naṉ. 41: jiv

Highlight

Copy