Naṉ. 42

Jusée yachi̱ Ejiptunam wénamu

1Ni nuṉke̱n pujus “yurumak Ejiptunam írunui” táman Jakup antuk ni uchirí̱n chicharainiak “Atumsha ¿urukamtai nuamtaksha mái̱ iiniai ajarum? 2Warí, yurumak Ejiptunam írunui táman antukjai. Atumsha nu werirum sumautarum, iisha tsukái jáka̱i̱jⁱ” tímiayi.

3Aparí̱ tutai Jusé yachi̱ tias armia nu yurumak sumautai tusar Ejiptunam wéarmiayi. 4Tura Jusé nekas patái̱ yachi̱ Piṉjiamínian Jakupka akupkatniun tujintkiamiayi jintiá itiurchatan wáinki̱a̱i̱ṉ tusa. 5Kame Kanaannum tsuka asamtai chíkich nuṉkanmaya̱sha súmainiakui Israera uchirí̱sha sumaktai tusar wéarmiayi.

6Tura jeawar Jusesha Ejiptunam akupin ajasuitkui túruna yurumkan niṉki súrakui ni yachi̱sha nui̱ taar nuṉkan antiastatuk tsuntsumpruáwarmiayi. 7Tura Jusesha ni yachi̱n táarun wainiak nekaawariataṉ nékachua áintsaṉ kakanchim chicharainiak “¿Tuya̱mpaitrum atumsha?” tutai “Kanaannumia̱ shuaraitji. Iisha yurumak sumarmaktai tusar taji” tiármiayi.

8Kame yachi̱sha Jusenka nekaacharmiayi tura antsu Juseka niṉkia nekaawarmiayi. 9Nuya̱ṉka Jusé yaunchu mesekrampramia nuna enentáimiar chicharainiak “Átumka ánaṉ taurme. Aents anearpash matsatainia nu nekaatai tusarum taurme” tímiayi. 10Tutai nisha “Atsá, uuntá antsu iisha áyatik yurumak sumarmaktai tusar winiaji. 11Iikia chikichík apanmaya̱ṉ nuamtak yachi̱ṉketji. Tuma asar péṉker shuaraitji. Ánaṉka wekaatatsji” tiármiayi. 12Tutai Jusesha áimiuk “Atsá, nekas átumka ánaṉ wekaarme, anearpash aents matsatainia tusarum taurme” ataksha tiármiayi. 13Tutai aimiainiak “Iisha ame takarniutikia chikichík áishmaṉnumia̱ṉ tuse yachi̱ṉmaitji. Iikia Kanaannumia̱itji. Tura ii yachi̱ iniaṉnamuka ii aparí̱ji̱a̱i̱ juakmai antsu chíkichkia meṉkakaiti” tiármiayi. 14Tuíniakui Jusé chichaak “Túmaitkiurmeka tátsujrumek nekas átumka ánaṉ yujarme. 15Wats ju̱ja̱i̱ nekaatai. Parauṉka chichame̱ja̱i̱ nekas tájarme. Atumí yachi̱ iniaṉnamua nu ju̱i̱ táachkuiṉkia átumka waketkishtatrume. 16Tura nekas tákurminkia atumí yachi̱ iniaṉnamua nuna yaaksha werí utiti. Tura chikichtirmeka ni táamam ju̱i̱ṉ sepunam juáktatrume. Kame wáitrakrumka nuikia ánaṉ wekaamu nekanattarme” tiármiayi.

17Nuna tiar Jusesha menaintiú tsawant sepunam eṉkeawarmiayi. 18Nuyá̱ menaintiú tsawantin chicharainiak “Wikia nekas Yusan ashamakun enentáimtiniaitjiai. Tuma asamtai títiatjarum ju̱ túrakrumka jákashtatrume. 19Nekas péṉker chichawashitrum. Wats chikichik sepunam ju̱i̱ juáktatui. Antsu átumka atumí shuari̱ yurumáwarat tusarum yurumak jurukrum waketkitiarum. 20Tura ataksha winiakrum yátsum ékechia nu itiatárum, nuja̱i̱ nekas chichatairmin nekarattajrume. Nuíchuka mantamnattarme” tiármiayi. Tutai “ayu” tiármiayi. 21Tura nuamtak chichainiak “Nekasaiti yaunchu ii yachi̱ yajauch awajin asar íksarik waitiainiaji. Warí ii yachi̱ wáitnenmai ‘waitnentrurtarum’ takui̱ nu waitnentramkiajⁱ” tunainiarmiayi.

22Tuíniakui Ruwincha chicharainiak “Enta, ai̱ yajauch awajsairap tíchamkiajrum. Támaitiatrum anturtukchamiarme. Yamaikia iistarum. Ni jakamunam ii itiurchat pujuiniaji” tímiayi.

23Kame Juseka Ejiptunmaya̱ chichaman chichaakui chíkich aents Ipríu chichamja̱i̱ iniaṉkatmiayi. Tuma asamtai ni chichainiamun Jusé antimiania nuna nékacharmiayi. 24Tura yachi̱ chichainiamun antuk Jusesha kánasaṉ útmiayi. Tura ataksha katsuntar taa nisha iimmiainiamunam Semiunan iniakmas suntaran chicharuk “Ju̱ áishmaṉ achikiam jiṉkiata” tímiayi. 25Tura ataksha ni suntari̱n chicharainiak “Kustarnum yurumak áimpratarum tura kuítri̱sha kustarnum eṉkeatarum. Túrarum jintiá yúatniusha susatarum” tímiayi. Takui̱ umirkamiayi. 26Túram Jusé yachi̱sha umpururi̱n yurumkan áentskar waketrarmiayi.

27Tura jintiá kánuiniamunam chíkich yachi̱ ni umpururi̱n ayurataj tusa kustari̱n atía iyaj tukamá ni kuitri̱n pátatek eṉketun wainkiamiayi. 28Tura ni yachi̱n chicharainiak “Iimsakua, winia kuítrun awaiṉki̱ eṉketruáwarun kustarun iyaj tukamán wáinkiajná” tímiayi. Nuna tinia iniakmakui chikitcha sapijmiak enentái̱ purushniarar kurainiak “Ju̱sha Yussha itiurtámkatai tusa jú̱tikramajⁱ” tunaim ajarmiayi.

29Tura nuyá̱ Kanaannum aparí̱n jeawar ashí ni túrunamun ujakármiayi. 30Ujainiak “Ejiptunam akupin kakantramuk ‘Átumka ju̱ nuṉkanam mamikmakrum wekaarme’ turammaji. 31Túramkurin ‘Iikia péṉker shuaraitji ánaṉka wekaatsji. 32Tura iikia chikichík aishmaṉnumia̱n tuse yachi̱ṉmaitji antsu chíkichkia meṉkakaiti tura ékechikia Kanaannum ii aparí̱ji̱a̱i̱ juakmai’ timiaji. 33Tura nuya̱ṉka iin chichartamuk ‘Nekasash péṉker shuaraitrum ju̱ja̱i̱ nekaatai, atumí yachi̱ ju̱i̱ sepunam juaktí. Tura ishichik atumí shuari̱ yurumak juruktiarum. 34Tura winiakrum atumí yachi̱ iniaṉnamua nu itiartitiarum. Nuja̱i̱ nékamkuram wekaatsrumna tura nekas péṉker shuaraitrumna nuna nekaattajrume. Tura nui̱ṉkia atumí yachi̱n aṉkant awajsattajai tura átum jú̱ nuṉkanam sumarmaktinniasha tsaṉkatkattajrume’ turammaji” tiármiayi ni aparí̱n.

35Tura nuyá̱ kustari̱n ashiniaj tukamá kuítian eṉketáinian wáinkiarmiayi. Tura aparí̱sha núnisaṉ nisha sapijmiakarmiayi. 36Nuya̱ṉka Jakupsha chicharainiak “Átumka uchirtichu awajtústatrume. Warí Jusesha meṉkaturkachmakia tura íksaṉ yamaisha Semiuncha atsawai. ¡Tura ataksha nuna arant yamaikia Piṉjiamíncha jurutkittiarme! Wíchashitiaj timiá nekas wáitsatniuṉka” tímiayi. 37Tutai Ruwin aparí̱n chicharuk “Wátskea apawá, Piṉjiamínnaka wi iistajai. Tura nekas auka awaṉtukin itiartiatjame. Wats awaiṉki̱ itiachmatainkia uchir jímiar ana nu máwarta” tímiayi. 38Takui̱ Jakupsha chichaak “Uchir Piṉjiamínnaka akupkashtatjai. Warí ni yachi̱ Jusesha jákachukait tura Piṉjiamínchik juatrukchakait. Nékachma jintiá meṉkaakuiṉkia wi úuntan úttin jáakuisha nuka atumniak átatui” tímiayi Jakup.

Currently Selected:

Naṉ. 42: jiv

Highlight

Copy