Naṉ. 43

Piṉjiamín Ejiptunam junakmia

1Kame nu arant ashí nuṉkanam tsukamnaki̱ wémiayi. 2Tuma asamtai Ejiptunmaya̱ sumakar itiar yuamu amukámtai Jakupka uchirí̱n chicharainiak “Ataksha werum yurumak ishichkisha sumautarum” tímiayi. 3Takui̱ Jutá aya̱k “Túrasha apawá, nú akupin nekas paant chichartamuk ‘Atumí yachi̱ iniaṉnamu ju̱i̱ itiaachkurmeka peṉké iirainirap’ turammaji. 4Tuma asamtai Piṉjiamín akupeakminkia antsu nuikia weri sumauttaji. 5Túrasha iiji̱a̱i̱ wétin tsaṉkateachkumni̱ṉkia wéchattaji. Nú aishmaṉ iin chichartamuk ‘Atumí yachi̱ ékechia nu ju̱i̱ itiaachkurmeka táirap’ turamchamkajⁱ” tímiayi Jutá.

6Nuya̱ṉka Israer aya̱k “¿Urukamtai nú aishmaṉsha ‘Ii yachi̱ ékech awai’ timiarum? Núja̱i̱ṉkiu wíniaka imiá waitkiarákarum” tímiayi. 7Takui̱ áiniak “Kame timiá aninmakrin ‘¿Ya shuaraitrum. Tura atumí aparí̱sha iwiaakuak. Yatsumsha chikitcha áwak?’ túramkurin iikia ni anintramkuri̱n ái̱kmaji. Antsu áutsuk yátsum itiatárum turamtajia tíchamji” tiármiayi. 8Nuyá̱ Jutá ni aparí̱n Israeran chicharuk “Iwiaaku ártái tákumka uchi akupkata. Auka, wi wainkiatjai. Wari akupeakmiṉkia yurumak sumakar iisha tura ii uchirí̱sha tura amesha tsukái jákashtatji. 9Wats nekaska wi aya̱tjai. Wariṉkish ákuiṉkia núnaka wi iistajai. Tura apawá, awaiṉkin itiaachmatai̱ṉkia winiak chíchamka antumtikrú pujutin atá. 10Wats yamaikia wéartai. Warí chícham pujurchakrikia jimiará weri tamai ajainiaji” tímiayi.

11Takui̱ ni aparí̱ chicharainiak “Kame chíkich túramniaka atsá asamtai aya̱tarum. Tura wéakrum jú̱ nuṉkanmaya̱ tí peṉker ainia nu takurtiarum. Yakamatai tsuak pársamusha míshkisha kuṉkuincha mira tsuaksha tura naampsha nuyá̱ wa̱a̱ksha takurtiarum. 12Núnisaṉ sumaktin kuitcha núkap júakrum tura awaṉtuktin kuitcha patasrum ímia ni súsatniuka mamikmasrum jukitiarum. Kame kajinmatki̱ eṉketramacharmashi. 13Wátsek atumí yachi̱ Piṉjiamín aya̱krum ataksha nú akupniui̱ wetarum. 14Kame Ashí Tujintkiachu Yus nú akupniun waitneṉkratai enentáin susati. Nisha waitnentramar Semiunnasha aṉkant awajsati tura Piṉjiamínniasha awaiṉki̱ péṉkernak akupkati. Kame uchirtichu juáktiniaitkiunka uchirtichu juaktajai” tímiayi.

15Jakupka nuna tinia iniaisamtai uchirí̱sha ántrar súsatniuncha tura awaiṉkitin kuítniasha nuyá̱ sumaktin kuítniasha tura Piṉjiamínian júkiar Ejiptunam Jusen nákak jeariármiayi. 16Tura Juseka Piṉjiamínian wainiak ni je̱e̱n takarniu úuntri̱n chicharuk “Jú̱ aishmaṉ winia je̱a̱rui̱ júkiarta. Túram waaka maam iwiarata ju̱ tsawant tutupin ai̱ nisha wiji̱a̱i̱ yurumáwarat” tímiayi.

17Takarniu úuntri̱sha Jusé timia nuja̱i̱ métek umireak nin yaruakmiayi. 18Tura nisha Jusé je̱e̱n juíniam nekamawar sapijmiainiak “Ju̱ka nuik kuit eṉketu wainkiamaj nui̱ kasamkaruiti turamas ju̱i̱ achirmak ii umpururi̱ncha ashí atantramar iinkia iniatai̱ awajtámsatai tusa je̱e̱n itiarmaji” tiármiayi.

19Tuma ásar je̱á̱ wá̱i̱tsuk Jusé takarniúri̱ úuntri̱n áujainiak 20“Uuntá, emka táarmajnia nui̱sha nekas yurumak sumarmaktai tusar táarmaji. 21Tura wakettsar jintiá kánakur ii kustari̱ atirar iyaj tukamar ashí ii kustari̱i̱n pátatek kuit menakcha eṉketáinia wáinkiarmaji. Tura nu kuitkia awaiṉkitiai tusar itiaji. 22Tura ataksha yurumak sumaktin kuitcha itiaji. Tura ii kustari̱i̱ncha kuítniasha yátsuk eṉketramamajⁱ” tiármiayi.

23Tuíniakui takarniu uuntri̱ chicharainiak “Atsá, nú peṉker enentáimsatarum, sapijmiakairap. Atumí Yusri̱ tura atumí aparí̱ Yusri̱ya nu, kuítniaka eṉketramachmashuram. Kame ímia wíkichuk nú kuitniaka achikmaj” tímiayi. Tinia takarniu úuntri̱sha Semiunan sepunmaya̱ ji̱i̱ki̱ ni pujuarmia nui̱ jukimiayi. 24Nuyá̱ Jusé je̱e̱n awayá̱war ni nawe̱n nijiararat tusa entsan súsarmiayi tura ni umpururi̱ncha ayurtuawarmiayi. 25Tura Juseja̱i̱ tutupin ai̱ yurumátin ujakma ásar ántar súsatniun takurka armia nuna iwiartur nákarmiayi.

26Nuyá̱ Jusé je̱e̱n támatai ántrar súsatin itiarmian súsarmiayi túrawar nijia̱i̱ji̱a̱i̱ nuṉkan antiastatuk tsuntsumpruáwarmiayi. 27Jusesha aniniak “¿Atumsha péṉkerak pujarum? Tura atumí aparí̱sha úuntchiti tímiarmena nusha ¿péṉkerak pujá. Túkek iwiaaka?” tímiayi. 28Tutai nisha tsuntsumpruáwar “Ee, ii aparí̱ shiir enentáimturmana nusha péṉker pujawai. Tuke iwiaakui” tiármiayi.

29Nuna antuk Jusé íimiaj tukamá nekas ni patai̱chiri̱n Piṉjiamínian wainiak “¿Jú̱kait atumí yachi̱ ékech awai turutmiarmena nua?” Nuyá̱ Piṉjiamínian chicharuk “Yus yaintmakti umpá” tímiayi. 30Jusé nuna tinia tura Piṉjiamínian iis ti warak enentáimias útmin nekapeak wárik ni kanutairi̱i̱n wayá̱ útmiayi. 31Tura katsuntar entsaja̱i̱ jaupmi jiinkí̱ “yurumáwartai” tímiayi.

32Jusenka niisháa ayurawarmiayi. Núnisaṉ ni yachi̱ncha tura untsurí Ejiptunmaya̱ aents Juseja̱i̱ yurumátin armia nunashá súsarmiayi. Kame Ejiptunmaya̱ṉka Israer shuarja̱i̱ iruntrar yurumátniuka mui̱jmiai̱ asamtai túrawarmiayi. 33Juseka ni yachi̱n iwia̱i̱ri̱n emka apujtan naṉkama iniaṉnamunam ejé ekentrámiayi. Túramtai “¿Ausha itiurtamakua ju̱ni̱sha eketmarajⁱ tusa?” mái̱ iniai ajarmiayi. 34Tura Juseka ímia niṉki yurumkanka súsarmiayi antsu Piṉjiamínnaka chíkich yachi̱ armia nuja̱i̱ naṉkaamas tí nukap susamiayi. Kame jú̱nis Jusesha ni yachi̱ji̱a̱i̱ irunar shiir waras yurumá umar iniaṉkasmiayi.

Currently Selected:

Naṉ. 43: jiv

Highlight

Copy