Jiin. 5

Muisaissha Arauncha Parauṉja̱i̱ chichainiamu

1Nuyá̱ ukunam Muisaissha ni yachi̱ Araunja̱i̱ úunt akupin Parauṉ pujamunam wéarmiayi. Tura chicharainiak “Uunt Yus Israer shuara Yusri̱ chichartamuk ‘Wí shuar kampuntin atsú nuṉkanam wéar Winia shiir awajtuiniak namperan najatruawarat wétinian tsaṉkatkarti’ túramui” tiármiayi.

2Tutai Parauṉsha áimiuk “Uunt Yus tárumna nusha ¿yátsukait wi ni chichame̱n anturkan Israer shuaran wetarum tusa iniaitincha? Núnisaṉ Úunt Yusnasha wikia peṉké nékatsjai. Tuma asan Israer shuarnasha akuprashtatjai” tímiayi. 3Takui̱ nisha chicharainiak “Israer shuara Yusri̱ taruttrammaji. Tuma asamtai kampuntin atsunum menaintiú tsawant jeá weri ii Uunt Yusri̱ taṉku maar áestuatin tsaṉkamkata. Kame nu túrachkurni̱ṉkia suṉkurja̱i̱ nuíchuka mesetja̱i̱ṉsha amutmaktatji.” 4Tutai Ejiptunmaya̱ úunt akupin chichaak “Muisaisá tura Arauná, ¿urukamtia aents ni takatrí̱ji̱a̱i̱ pujuinia nú tsuriṉtarum? Tákamtak waketkirum takakmautarum” tímiayi. 5Nu arant Parauṉ chichaak “Takakmau ainia nu aents ti untsurí a̱i̱ṉ takat kuákchamnia átum itit awajearme” tímiayi. 6Nuya̱ṉka nu tsawantini̱ṉ Parauṉ takata íinian tura iniamniuncha chicharainiak 7“Yamaikia Israer shuarka trikiu nuke̱n nuwe̱ja̱i̱ pachimiak je̱a̱ je̱a̱mtain najanat tusarum itiari susairap, antsu niṉki wéar juuk ikianiarti. 8Núnisaṉ nuik je̱a̱ je̱a̱mtain nuwe̱ja̱i̱ najaniarma ímiatrusrumek ementsuk najanmamtikiatarum. Kame nakimiainiak ‘Weri ii Yusri̱ taṉku maar áestutai̱’ tusar kakaram chichamprumainiawai. 9Kame Israer shuarka takat núkap susarum tí kakaram takamtiksatarum. Wáitruiniak tuinia nu anturkairap” tímiayi.

10Tura takata iin tura iniamniusha Israer shuaran chicharainiak “Uunt Parauṉ chichaak yamaikia trikiu nuké̱ susairap túramprume. 11Yamaikia atumek werum tuyá̱ wainkiattarum nuyá̱ júukrum ikiantiarum tura nuwe̱ iniarka najanattarmena nuka ementsuk ímiatrusrumek najantiatrume” tiármiayi. 12Tutai Israer shuarka ashí Ejiptunam tsakiṉmakar trikiu nuké̱ utsaṉka ikiukmian juktai tusar wéarmiayi. 13Tura takata iniamin kakaram útsuiniak “Trikiu nuké̱ ii súam ashí tsawantin najanmiarumna ímiatrusrumek najantiarum” tiármiayi. 14Tura Israer shuar takakmainiakui iistarum tusar Parauṉka takatrí̱n iniamin Israer shuaran anaik apujsarmia nuna asutíniak “¿Urukamtai yamaikia tura ya̱u̱sha nuwe iniarkámu nuik najanmiarumna timianú untsurí najankachuram?” tiármiayi.

15Nú turuiniam Israer shuar takatan iniamin armia nu Parauṉkan weriar chicharainiak “¿Urukamtai ámin takarin árincha imiá wáitkiakratam? 16Warí trikiu nuke̱ncha amainiachiat ‘je̱a̱ je̱a̱mtin nuwe̱ pachimpramu najankatarum’ turamainiaji. Túrasha nekaska ame shuarum makunmin ainiai̱ ame takartámin ti asutiámu áiniawai” tiármiayi. 17Nuna tuíniakui Parauṉ aya̱k “Átumka peṉké nákitrume. Nekas naki asarum ‘Uunt Yus taṉku maar áestuar shiir awajutai’ tárume. 18Túrasha trikiu nuke̱ncha amaschartatui. Yamaik waketkirum takakmautarum. Túmaitkiuisha nuweja̱i̱ je̱a̱ je̱a̱mtai nuik najanmiarum tímiatrusrumek najantiatrume” tímiayi. 19Nuyá̱ Israer shuar takatan iniamin armia nusha “nuweja̱i̱ je̱a̱ je̱a̱mtai nuik najamiarumna tímiatrusrumek yamaisha najanattarme” tutai tí kuntuts enentáimprarmiayi. 20Israer shuar takata iniamin armia nu Parauṉka je̱e̱ya̱ jiiniainiaj tukamá Muisais Araunja̱i̱ nákainiak wajainian wáinkiar 21chicharainiak “Uunt Yusak atumniaka iirmasarti tura sumamtikramawarti. Warí Parauṉ tura ni takarniúri̱ íismaka peṉké kajermai awajkartusurme. Tura yamaikia puya̱ja̱i̱ mantamnatniua núnisar pujuiniaji” tiármiayi.

Uunt Yus túratta nu paant ujakma

22Nu tutai Muisais Uunt Yusan chicharuk “Uuntá, ¿urukamtai ame shuarum wáitkiainiam túrasha urukamtai akuptúkmam? 23Warí ame náarmin pachisan Parauṉkan chichastaj tusan tarimiajna ímianiaṉ ame shuarumin nu arant tí waitkiainiawai. Túruiniak amé shuarum aṉkant awajsachume” tímiayi.

Currently Selected:

Jiin. 5: jiv

Highlight

Copy