Jiin. 6

1Tutai Uunt Yus Muisaisan chicharuk “Wi yamái Parauṉkan itiurkattaja nu wainkiattame. Winia kakarmarja̱i̱ wetarum tusa iniaitiámsattarme. Winia kakarmarja̱i̱ṉ ni nuṉke̱ni̱a̱ ji̱i̱rmartatrume” tímiayi. 2Nu arant Yus Muisaisan chicharuk “Wikia Úunt Yusaitjiai. 3Wi Aprajáman, Isakan, Jakupan Ashí Tujintkiachu Yus asan wantintiukarmiajai. Túrasha nekas naar Uunt Yus náartiniaitjiana núnaka nekamtikiacharmiajai. 4Tura níji̱a̱i̱sha chichaman nájankun Kanaanan súsatniuitjiarme tiármiajai. Kame nu nuṉkanam írara núnisar wekasarmiayi. 5Núnisaṉ Israer shuar útainian anturkaitjiai, Ejiptunmaya̱ aentsun takarainiak tí waitiainiakui, Wi atumí we̱a̱trí̱ji̱a̱i̱ chichaman najanamiaj nuna enentáimturjai. 6Tuma asamtai Israer shuar jú̱nisam ujakárta. Wikia Úunt Yusaitjiai. Wi, Israer shuaran Ejiptunmaya̱ aents kakaram takamtikiainiak wáitkiainiamunmaya̱ aṉkant awajsartatjai. Winia kakarmarun akupkan tura ti naṉkamantu kakarmarja̱i̱ péṉkera nuna túrakun iniaktustatjana nuja̱i̱ uwemtikiainiakun íksanak Ejiptunmaya̱ṉka ti asutiáwartatjai. 7Wi shuar awajsan atumí Yusri̱ átatjai. Tura Wi atumí Úunt Yusri̱ntjiana nu nekarattarme. Núnisaṉ Ejiptunmaya̱ takamtikiainiak wáitkiainiamunmaya̱ aṉkant awajsartatjana nuja̱i̱ nekarattarme. 8Tura Aprajáman, Isakan, Jakupan uwejrun takurin chicharainiakun ‘Ju̱ nuṉkan nekas súsatniuitjiarme tímiaj nui̱ yaruakan apujsattajrume. Wikia, Úunt Yusaitjiai’ tímiayi. 9Kame Israer shuarsha Muisais núnis ujainiamaitiat ayamtiktsuk takamtikiainiamu ásar jata nekapenak peṉké anturcharmiayi” tímiayi. 10Nuya̱ṉka Uunt Yus Muisaisan chicharuk 11“Ejiptunmaya̱ úunt akupin Parauṉ werim chicharkum ‘Israer shuar ame nuṉkemíya̱ jíintrarat tusam tsaṉkatkarta’ titiá” tímiayi. 12Tutai Muisais Uunt Yusan aya̱k “Israer shuar ishichkisha anturtuiniatsaisha, wi unuushím chichamuncha Parauṉsha itiurak anturtukat” tímiayi.

13Nuya̱ṉka Ejiptunmaya̱n Israer shuaran jí̱i̱rtaj tusa Uunt Yuska Muisaisan Araunja̱i̱ áujsar umiktin chichaman Israer shuar umikiartinniasha tura Ejiptunmaya̱ úunt akupin Parauṉ umiktinniasha súsarmiayi.

14-27 Kame Israer weanmaya̱ uuntri̱ náari̱ṉkia ju̱i̱ aarma áiniawai. Nú shuaran Ejiptunmaya̱n ji̱i̱rtai tusar Ejiptunmaya̱ úunt akupin Parauṉkan chichasáruka Araun Muisaisja̱i̱ ármiayi.

28Ejiptunam Uunt Yus Muisaisan nu tsawantin chicharuk 29“Wi Uunt Yus asan Ejiptunmaya̱ úunt akupin Parauṉkan títiatjana nu mash ujakta” takui̱ 30Muisais Uunt Yusan aya̱k “Wikia unuushím chichawaitjiai. Parauṉsha ¿itiurak anturtukat?” tímiayi.

Currently Selected:

Jiin. 6: jiv

Highlight

Copy