Jiin. 22

Chikichnan emestukmatai iwiaratin akupkámu

1-4 Waakan kasamkaṉka kuatru nuíchuka seṉku awena waaka kuítri̱ji̱a̱i̱ métek awaṉtuktiniaiti. Kasa chikicha je̱e̱n kashi kasamú pujá mantamnaṉka asutniátin atsawai antsu tsawái̱ maaṉka asutniámniaiti. Kasa chikichnan kasarkaṉka iwiaratniuiti. Tura warirí̱ takakchaka kasamka asa niṉki surunkatniuiti.

5 Waaka péṉker wáinkiachma chikicha nuṉke̱e̱n nuíchuka ajanam wayá̱ chikichnan yuámtaiṉkia ni nuṉke̱ya̱n nuíchuka ajarí̱ya̱n peṉkeri̱ya̱ nuja̱i̱ akiktatui.

6 Shuar chikicha nuṉke̱e̱n jinia akáa warirí̱n áestukka emeskamunam táamtsuk akiktiniaiti.

7-9 Aents chikichan kuítri̱n nuíchuka wariṉsha ikiursatjame tusa achikkiá níyaiti péṉker wáinkiatniuka. Antsu kasamnakmataiṉkia chichamprinnium wéartiniaiti. Tura chichamprin yana makutta nuka nérenniun akíak wariṉsha meṉkakana nuna kuitri̱ urutmait nuja̱i̱ métek ataksha patas akiktiniaiti.

10-15 Kame taṉku ántrarik ikiamsamusha núja̱i̱nchuka kuítji̱a̱i̱ṉsha ikiamsamu wariṉkish urukamtaiṉkia itiurkatniuit núnaka akupkámu chichamnum awai.

16Yaaksha nuwa̱ áishmaṉja̱i̱ tsaniṉchan niji̱a̱i̱ pujusiat anaṉkaṉka nuatnaikiatniun akiktinia nuja̱i̱ métek ni aparí̱n akik niṉki nuatkatniuiti. 17Tura nuwá̱ aparí̱ nawantri̱n suritkiamka nú aishmaṉ nuatkachiat akikmaktinia nuja̱i̱ métek akikmaktiniaiti. 18Nuwa̱ uwishin ainia nuka iwiaaku pujustin tsaṉkatnakchati. 19Yaaksha yajasmaja̱i̱ tsanirmaka waitnennatsuk mantamnati. 20Uunt Yusan taṉkun maa áestutsuk najankamu yusan súakka mantamna amukatniuiti. 21Núnismek yajaya̱ aents ainia nusha wáitkiasaip. Warí atumsha Ejiptunmaṉka írar pujumiarme. 22Waje̱ksha tura mitiaikiaksha yajauch awajeakum wáitkiasaip. 23Warí yajauch awajeakum wáitkiam seateakuiṉkia ti nekas ni seatmari̱n anturkattajai. 24Tura ti kajekan puya̱ja̱i̱ amuktatjarme. Túramtai atumí nuwe̱sha waje̱makartatui nuyá̱ atumí uchirí̱sha mitiaikiamkartatui.

25Núnisaṉ wí shuar kuítri̱ncha ainia nu ikiasrumsha kuitia ikiamin ikiauṉkattsa enentáimtin ainia nuja̱i̱ métek patasam awaṉturkitia tiirap. 26Ame írutramuram wariṉkísha ikiatmak pushiri̱n ikiukmiataiṉkia étsa̱ka akattsa̱i̱ṉ awaṉtuktia. 27Warí ni esekmatai̱ri̱sha tura entsatái̱ri̱sha núchikchakait. Nu arantcha ¿wariji̱a̱i̱ṉ kanarat? Warí wikia waitnenkartichukaitiaj, tuma asan seatkuiṉkia anturkattajai.

28Sumamtikin ainia nusha yajauchiji̱a̱i̱ yumiṉkraip. Tura amé shuara akupniúsha yajauch chicharkaip.

29Ame arakrum emka juukma nu tura uwa yumiri̱sha wárik itiata. Núnismek uchiram iwia̱i̱ri̱ya̱ nusha surusta. 30Nuja̱i̱ métek waakarminiusha murikrumniasha emka petsakma siati tsawant ni nukurí̱n pujusmatai uchu tsawantinkia surusta.

31Átumka akankar imiatkincha wi shuar awajsamu asarum kampunniunmaya̱ yajasma taṉkun esaimtaiṉkia yuáwairap antsu ya̱wá̱ susatarum.

Currently Selected:

Jiin. 22: jiv

Highlight

Copy