Jiin. 23

Nekasa nuja̱i̱ métek sumamtikiatin

1Wait chichama nu etserkiní̱ wekainirap tura nékaskechua nuja̱i̱ Yusan enentáimtichu yajauchin túrataj takui̱ atumsha nui̱ pachinkiarum ame wakeramna nuna yaiṉtajme tiirap.

2Átumka untsurí yajauchi túrin ainia nui̱ṉkia pachinkiairap. Núnisrumek jimiará aents tunainiakui untsurí aents nekas túrachun waitruawar makurtaj tuíniakuisha átumka nekasa nu paant titiarum. Túrachkurmeka nekasa nu emeskattarme. 3Kame kuítrincha yajauchin túramtai aya kuítrincha asamtai ‘péṉker túraiti’ tiirap.

4Atumí nemasri̱ waakari̱ nuíchuka umpururi̱ṉsha meṉkaka wáitkiarmeka awaṉtuktiarum. 5Atumí kajertamin ainia nuna umpururi̱ kijin áentskamu iniant tepá wainkiarmesha páchitsuk ikiukírap. Antsu iniantkitiarum. 6Ashí aentsnanun akupkámu chicham nekas níniua nuna súamunka yaaksha atankishtiniaiti. Núnisaṉ takurmakcha nusha sumamtikniunam untsumak nekas níniua núnaka iwiartumartiniaiti. 7Wait chichama nuya̱ṉka éṉkasta. Tura aents umitmákcha péṉkeran túrinkia sumamtikiam máwaip. Warí wikia umitmakua núnaka péṉker túraitme tíchattajai. 8Yajauch túratniunam útsutmak akirmainiamu achikiaip. Warí yajauch túrutruak tusa útsutmak akinkiatniuka péṉker enentáimmian ukusniuiti tura péṉker túruinia nuna ti yajauch awajniuiti. 9Yajaya̱ nu itit awajírap. Warí atumsha Ejiptunam pujumiarum nuiṉkia yajaya̱ áentsuyarme. Tuma asarum ni itiur nekapmamainia nuka nékarme.

Ayampratin tsawant akupkámu umiktin

10Aya sais uwik atumí nuṉke̱n arakmarum juurmaktarum. 11Tura siati uwí jeatana nui̱ṉkia arakmatsuk iniaisatarum. Antsu akintkianka atumíin atsumainia pujuinia nu núnisaṉ kampunniunmaya̱ yajasma yuáwarti tusarum aṉkant iniaisatarum. Uriwiu tura uwa araksha núnisrumek túratarum. 12Aya sais tsawantchik takakmasta tura siati tsawantinkia ayamprata. Ame waakarme̱sha núnisaṉ kawairmesha ayamprarti. Tura iniatai̱ram áishmaṉ ame je̱e̱min akiiniawaru tura irarumsha ayamprar kakaram takakmasarat tusam túrata. 13Tura Wi tájarmena nu ashí umiktarum. Najanamu yus ainia nu seawairap tura náari̱ṉsha peṉké pachitkiairap.

Tuke uwitin námper menaintiú najantin

14Nuyá̱ chikichik uwitin námper menaintiú najatrittiarme. 15Karin eṉketáchma paṉka namperi̱ najanatarum tura Wi tímiajrumna nuja̱i̱ métek karin eṉketáchma paṉ siati tsawant yuátarum. Warí Awip nantutin átumka Ejiptunmaya̱ jíinkin asarum túratarum. Wini̱nkia chikichkisha surustinia nuna júutsukka táchati. 16Núnisrumek ajanam arakma nuna emka neresha tura juukma namperi̱sha najanatarum. Tura atumí takatrí̱ya̱ ashí araka neré juukma uwí amúana nui̱sha námper najanatarum. 17Ashí áishmaṉ chikichik uwitin Uunt Yusai̱ menaintiú weankatin áiniawai.

18Nuyá̱ taṉku máarum áesturkurmesha numpe̱ karin eṉketáchma paṉnum pachimprarum surusairap. Núnisrumek macharí̱sha kashin áestuami tusarum ikiurtusairap. 19Ame nuṉkemín araamu peṉkeri̱ eem juukma júuram Uunt Yusa je̱e̱n jukitia. Chípiuchisha ni nukurí̱ muntsurí̱ji̱a̱i̱ iniarkaip.

Kanaannum waya̱tniun iwiarturuitjarme

20Átum pujustinian iwiarturuitjiarmena nui̱ ejetamtinniaka tura jintiá waitmaktinniasha winia nayaimpinmaya̱ suntarun akupeajai. 21Esettsa enentáimsarum ni chichame̱sha nakittsuk anturkatarum. Antsu niṉkia Winia naarja̱i̱ akupeamu asa atumí yajauch túramurminkia tsaṉkurashtatui. 22Tura nekas ni chichame̱sha umirkurminkia nuyá̱ Wi támasha ashí túrakrumni̱ṉkia Wikia atumí nemase̱ nemasri̱ átatjai tura atumín kajertamainia nuna kajerin átatjai. 23Warí Winia nayaimpinmaya̱ suntar átum wéamunam eem wéak Amur aents tura Jetcha Pírissha Kanaancha Jepsha nuyá̱ Jípius aentsun Wi amukártataj nuna nuṉke̱ni̱ juramkittiarme. 24Tura ní yusri̱sha enentáimtakrum tikishmátrairap núnisaṉ ni túrutairi̱sha túrawairap. Antsu ashí kayaja̱i̱ najankamu yus enentáimtutai̱ ainia nuka tsairarum emestuktarum. 25Antsu Uunt Yus atumí Yusri̱ṉ umirkatarum. Túrakrumni̱ṉkia yurumkancha umartinniasha amastatjarme núnisaṉ Wiki suṉkurnasha tsaṉkatkashtatjarme. 26Tura ame nuṉkemínkia nuwa̱ ashimniusha uchi takuchusha atsuttawai. Ántsaṉ atumí tsawantri̱ jeatsa̱i̱ṉkia jákashtatrume. 27Ame tui̱ jeattam nui̱ṉkia nuyá̱ aentsnaka Wi sápij enentai eṉketán páchim enentáimprartatui. Túran ashí atumí nemasri̱nkia ipisrartatjai. 28Wi ete akuptúkam nuna ashamainiak Jep tura Jet nuyá̱ Kanaan aentska pisarartatui. 29Túrasha atumíya̱ṉka chikichkí uwitinkikia jí̱i̱rchartatjai. Túramtaikia aents atsáa ajasmatai kampunniunmaya̱ yajasma kajen ainia nu pampaṉkar yajauch awajtámairum. 30Átum núṉkentin ajasrum pampamam yáitmataik ji̱i̱ra akupkar ji̱i̱ra akupkar awajtiatjai. 31Tura atumí nuṉke̱ṉka Kapantin Nayantsa nuyá̱ juarki̱ Jiristíu nayantsari̱ya̱ ímianai núnisaṉ kampuntin atsú nuṉkanmaya̱ juarki̱ Yúpratis entsa ímianai tesarnáiyamun iwiarturtatjarme. Nu nuṉkanmaya̱ aentsnaka íktajrume tura nuya̱ṉka átum ji̱i̱rtarum. 32Núnisaṉ niji̱a̱i̱ chícham najanawairap. Nu arantcha ni ántar yusri̱ ainia nusha umirkairap. 33Tura atumí nuṉke̱ncha au aents pujusti tusarum peṉké tsaṉkatkairap. Warí ni najankamu yusri̱ tikishmátkuram Winí̱ tunáa túrattarme. Túmakrum awajirtatrume” tímiayi Uunt Yus.

Currently Selected:

Jiin. 23: jiv

Highlight

Copy