Jiin. 24

Yus Israer shuarja̱i̱ chícham najanamu

1Yus Muisaisan chicharuk “Ame tura Araun nuyá̱ Natap, Apiú núnisaṉ sataintia Israer shuara uuntri̱ ainia nu yaruakam Uunt Yus pujana nui̱ iwiakarta túram árantak tikishmátrurtarum. 2Aya Muisaisak Uunt Yusai̱ṉkia weankattawai. Antsu chíkichkia weankácharti tura nuiṉkia ni shuari̱sha wákacharti” tímiayi.

3Nuyá̱ Muisais waketki̱ taa Uunt Yusa chichame̱n núnisaṉ ni akupkámuri̱ncha Israer shuaran ashí ujakármiayi. Tura ujakam Israer shuar Muisaisan chicharainiak “Uunt Yus akupea nuka ashí umikiartai” tiármiayi. 4Nuya̱ṉka Muisaiska Uunt Yus timia nuna ashí áarmiayi. Tura kashin káshik nantaki̱ Senái táritkiamuri̱n Israer shuara uuntri̱ tuse ainia nuja̱i̱ métek kayancha tuse irumar Yus áestuatniun najanamiayi. 5Tura Muisais Israernumia̱ natsa pujuarmia nuna taṉku takamtsuk áestuarum núnisaṉ Uunt Yusja̱i̱ aṉkant awajnáiyamusha waaka áishmaṉ yamatskam máarum áestuutarum tusa akupkarmiayi. 6Nuyá̱ Muisais piniṉkia achik taṉkú numpe̱n chíkich piniṉnum yará akankámiayi. Tura chíkich piniṉnumia̱nka Uunt Yus áestutai̱n ukatkamiayi. 7Núnisaṉ chícham najanamu papin Israer shuar ántuiniamunam áujsamiayi. Tura Muisais áujsamtai Israer shuar chicharainiak “Uunt Yus tana nuka tímiatrusrik túrakur umiktatji” tiármiayi. 8Nuna tuíniakui Muisais numpan achik Israer shuaran ukatenak “Ju̱ numpaja̱i̱ Uunt Yus atumji̱a̱i̱ ashí chícham najanamu ju̱i̱ti támaiti” tímiayi. 9Kame Muisaissha Arauncha tura Natap nuyá̱ Apiú núnisaṉ sataintia Israer shuara uuntri̱ armia nusha naint wákarmiayi. 10Tura nui̱ Israer shuara Yusri̱ wajamuri̱ṉkia kaya aya píniunmaṉ saar kiṉkia eṉketka nayaim kíṉkiampatak ajasua ániunam wajan wáinkiarmiayi. 11Túrasha Israer shuara úuntri̱nkia Yuska mácharmiayi. Antsu Yusan wáinkiariat yurumá umararmiayi.

Muisais Senainium

12Nuyá̱ Uunt Yus Muisaisan chicharuk “Wi pujajna ju̱i̱ naint wakam nákarsata. Nui̱ Israer shuar jintintiáwarai tusan Akupkámu Umiktin Chichaman kayanam áaraj ju̱na ámin amastatjai” tímiayi. 13Tutai Muisais ni yaintri̱ Jusuiji̱a̱i̱ wéarmiayi. Tura Muisaiska Uunt Yusa náintri̱n wakamiayi. 14Tura Muisaissha Israer shuara uuntri̱ armia nuna chicharainiak “Átumka ii táamam ju̱i̱ pujú ajatarum. Kame chícham ákuisha Araunja̱i̱ tura Urja̱i̱ iwiaratarum. Warí niṉkia atumji̱a̱i̱ pujuiniatsuk” tímiayi. 15Nuna tinia Muisais nainnium wakamiayi. Túrunamtai yuraṉkim nú naintian amuamiayi. 16Tura Senainium Uunt Yusa kakarmari̱ tara asamtai sais tsawant yuraṉkim amuá ámiayi. Tura siati tsawantinkia Uunt Yus Muisaisan yuraṉminmaya̱ untsukmiayi. 17Nuyá̱ Uunt Yusa winchari̱ kakarmari̱sha Senái naint náṉkatkamunam ji keek wárik aesa mash awajniua núnis kean Israer shuarka wáinkiarmiayi. 18Kame Muisaissha nui̱ yuraṉminiam páchitkia Senainium wakamiayi. Tura nú nainnium waka kuaraintia tsawant tura kuaraintia kashi pujusmiayi.

Currently Selected:

Jiin. 24: jiv

Highlight

Copy