Jiin. 2

Muisais akiiniamu

1Tura áishmaṉ Riwí weanmaya̱ Riwí weanmaya̱nak nuwa̱n nuatkamiayi. 2Túram ajapruk uchin áishmaṉkan takusmiayi. Tura nu uchisha tí shiirmachiyayi. Tuma asamtai ni je̱e̱n menaintiú nantu u̱u̱k takakuyayi. 3Tura núkap tsawant ú̱kchamnia asamtai sukun najatar entsa utuawa̱i̱ tusa sekatramiayi. Nuna tura uchin eṉkea nukuk Niru entsá tsukintri̱n karis irunmanum u̱u̱k inianásmiayi. 4Túramtai ni umai̱sha urukatin tusa íkian wajas ii wajatmiayi.

5Nuyá̱ úkunmaṉ Parauṉka nawantri̱ Niru entsanam mautaj tusa wémiayi. Tura ni takarniúri̱ nuwa̱ armia nuka entsá yantam wekainiai̱ Parauṉka nawantri̱ íimiaj tukamá karisnum súkua ánin nanatun wainkiamiayi. Tura Parauṉka nawantri̱ ni takarniúri̱n utitiá tusa akupkámiayi. 6Tura itiamtai urak iyaj tukamá uchi uutu eṉketun wainiak waitnentar “Ju̱sha Israer shuara uchirí̱nchukait” tímiayi. 7Nui̱ṉkia uchi umái̱ Parauṉka nawantri̱n tarí chicharuk “¿Ju̱ uchin amuntsa tsakatmartinian Israernumia̱ nuwa̱n e̱a̱tkan uturtiatjamek?” tímiayi. 8Tutai Parauṉka nawantri̱ chichaak “Ee, uturtitia” takui̱ nuwa̱chisha uchí nukurí̱i̱niak werí uturmiayi. 9Tura Parauṉka nawantri̱ nu nuwa̱n chicharuk “Ju̱ uchi tsakatmatrurta. Tura uchi tsakatmartinniumsha páchitsuk akiktajme” tímiayi. Tutai nui̱ṉkia uchí nukurí̱sha jukí̱ tsakatmarmiayi. 10Nuya̱ṉka uchi tsakarmatai Parauṉka nawantri̱n itiarmiayi. Túramtai ni uchirí̱ya núnis awajás chichaak “Warí entsaya̱ júsachmakaj” tusa uchí náari̱ṉkia Muisais anaikiamiayi.

Muisais Parauṉkai̱ya̱ pisarma

11Tura ukunam Muisais uunt ajas ni shuari̱ pujuarmia nuna iyutaj tusa werí ti kakaram takainiak wáitsar pujuinian wáinkiarmiayi. Nui̱ Muisais ni shuari̱n Ejiptunmaya̱ aents katsumeamun wainkiamiayi. 12Nuna wainiak Muisais ashí íimiar aents peṉké atsakui Ejiptunmaya̱ aentsun mámiayi. Tura maa náikminiam nui̱ṉ yutur ikiukmiayi. 13Nuyá̱ kashin ataksha Muisais jiinkí̱ Israer shuar nuamtak máninian wainkiamiayi. Tura katsumkartan chicharuk “¿Urukamtai nuamtaketiatrumsha mániarum?” tímiayi. 14Nu tutai Israer shuar Muisaisan aya̱k “¿Amincha ya ii uuntri̱ tura sumamtikin atá tusasha anaitiámkama, nu turuttinia. Ejiptunmaya̱ aents mámamna áitkiasmek winiasha mantuataj túruttsumek?” tímiayi. Tu chicharam nekas nekaracharukait tu enentáimias Muisaiska sapijmiakmiayi. 15Tura Parauṉsha Muisais túramun nekáa mátaj tusa e̱a̱miayi. Nu túram Muisaiska Parauṉkai̱ya̱ pisar Matian nuṉkanam wémiayi. Tura nui̱ jeá taurma yumirmatnum pujusmiayi.

Muisais Matiannum pujusma

16Kame Matiannumia̱ najankamu yusna takarin ni nawantri̱ siati armia nu ni aparí̱ murikrí̱n yaruakar murik átainiam entsan yarakar aartai tusar wéarmiayi. 17Tumai̱ chíkich murikiu wáinin armia nu káunkar iiya aartai tusar nuwa̱chin suritkiar akupénakui Muisais ayamprúkam ni murikrí̱n entsan árarmiayi. 18Tura Reuer ni nawantri̱ tí warik waketkiar táarmatai “¿Urukamtai yamaikia imiá wariksha táurmea?” tímiayi. 19Tutai ni nawantri̱ aimiainiak “Iiṉkia chíkich murikiu wáinin kajertamak ji̱i̱ki̱ akuptámkataj turamainian Ejiptunmaya̱ aents ayamprutmakji. Núnisaṉ entsa shikiktinniasha nuyá̱ ii murikrí̱n áartinniasha yaintmakji” tiármiayi. 20Tuíniakui nisha nawantri̱n chicharainiak “Nú aishmaṉsha ¿tui̱ pujá. Urukamtai ikiukniuram. Wariṉkísha yuat? Untsuktarum” tímiayi.

21Kame Muisaiska Reuer je̱e̱n untsukam jeá nui̱ pujusmiayi. Tura Reuersha ni nawantri̱n Sépuran Muisaisan susamiayi. 22Nuyá̱ Muisaisa nuwe̱sha ajapruk uchin takusmiayi. Tura nu uchi náari̱nkia Jirsun anaikiamiayi. Tura chichaak “Warí wikia yajá nuṉkanam wekáa asan írarchakaitiaj” tusa tu anaikiamiayi.

23Túrasha núkap uwí naṉkaamasu ai̱ ukunam Ejiptunmaya̱ úunt akupin jakamiayi. Tura jaka ai̱ṉ Israer shuar tuke emetamu pujuarmia núnisaṉ wáitias pujuiniak Yusan seawarmiayi. Tura Israer shuar wáitiainiak útainiamu Yusai̱ jeamiayi. 24Tura Yus antuk Aprajámja̱i̱ Isakja̱i̱sha tura Jakupja̱i̱sha chichaman najanamia nuna enentáimturmiayi. 25Tura Yus Israer shuaran iis ni wáitiarmia nuna nekaamiayi.

Currently Selected:

Jiin. 2: jiv

Highlight

Copy