Jiin. 3

Uunt Yus Muisaisan untsuamu

1Ni we̱a̱rí̱ Jitrun, Matiannum najanamu yusa pujurniuya nuna murikrí̱n Muisaiska wáitniuyayi. Tuma asa kampuntin atsú nuṉkan naṉkaiki̱ Uunt Yusa náintri̱n Urep nainnium murikiun yaruaki̱ jeamiayi. 2Nui̱ numi uchich ukat ukatin wajamunam Muisaisan Uunt Yusa suntari̱ ji keamunam ajapén wantintiukmiayi. Tura nu numisha keeayat amuwachun wáinmiayi. 3Nuyá̱ Muisais ni enentáimsaṉ “Wáinchatain ímiaja̱i̱kⁱ wainjiai. ¿Urukamtai keeayatcha timiasha amuichait? Wats, iyutjai” tímiayi.

4Tura íistaj tusa jeartekun Uunt Yus wainiak numi uchich ukat ukatin keamunam Uunt Yus untsúak “Muisaisá, Muisaisá” tutai Muisais Uunt Yusan aya̱k “Ju̱i̱ pujajai” tímiayi. 5Tutai Yus Muisaisan chicharuk “Tímiaja̱i̱ṉkia weankaip, ame wajamna nuka Winia akantúkma núṉkaiti. Tuma asamtai aranturakum ame sapatrum ukuintrata” tímiayi. 6Tura Yus Muisaisan chicharuk “Wikia ame apachrumin Yúsri̱ntjiai, Aprajáman Yúsri̱ntjiai, Isakan Yúsri̱ntjiai tura Jakupan Yúsri̱ntjiai.” Nuna takui̱ Muisaissha Yus íistinian ashamak ni yapi̱n ejakmiayi. 7Túrunamtai Uunt Yus chicharuk “Wí shuar Ejiptunam pujusár wáitiainiak tí kuntuts pujuinian nekas nekaajai tura takatan iniamin wáitkiainiam seatainia nunasha anturkarjai. 8Kame Ejiptunmaya̱ aents Wí aentsun emeta wáitkiainia nuya̱n jí̱i̱kin aṉkant awajsartaj tusan tarajai. Tura nu wáitiainiamunmaya̱ jí̱i̱kin péṉker nuṉka wáṉkaram tépakmanum apujsartatjai. Nu nuṉkanmaṉka tí peṉker nuṉka asamtai ashí arak tsapáu muntsu míshkiji̱a̱i̱ entsa núnis akamunmasha yurumkanka peṉké atsumachartatui. Tura nu nuṉkanmaṉka Kanaan aents, Jet, Amur, Píris, Jep, tura Jípius aentssha matsatainiawai. 9Tura yamaikia Israer shuaran Ejiptunmaya̱ aents ti yajauch awajénam winia untsurainian anturkarjai. Núnisaṉ wáitkiainiamuncha wáiniajai. 10Tuma asamtai Muisaisa Israer shuar Ejiptunmaya̱ ji̱i̱rái tusan yamaikia Parauṉkai̱ akupkáttajme” tímiayi.

11Nu tutai Muisaissha Yusan aya̱k “¿Wisha yáitiaj. Wi Parauṉkai̱ wena Israer shuaran Ejiptunmaya̱n jí̱i̱rminkiaitiaj?” tímiayi. 12Tutai Yus Muisaisan chicharuk “Wetá. Warí Wi ámiji̱a̱i̱ṉkia pujuttajai. Ejiptunmaya̱ wi shuar ji̱i̱ram ju̱ nainnium Winia tikishmátrurtatrume. Nuja̱i̱ nekas Wi akupkámuitmena nu nekaattame” tímiayi. 13Nu tutai Muisais Yusan aya̱k “Wats, enentáimsakia wi Israer shuaran weriaran ‘atumí apachri̱ Yusri̱ winia akuptúkai’ tíchartajash. Takui̱ winia inintiainiak ‘ámin akuptámkainia nuna náari̱sha ¿yait?’ turutainiakuisha ¿warí tiártajak?” 14Tutai Yus Muisaisan aya̱k “WIKIA WÍKITIAJ NUITJIAI. Tuma asamtai Israer shuar ininmainiakuisha ‘WIKIA WÍKITJIAI’ tumamna nu akuptúkai tiartá” tímiayi.

15Tura nu arantcha Yus Muisaisan chicharuk “Israer shuar chicharkum ‘UUNT YUS atumí apachri̱ Yúsri̱ntjiai. Kame Aprajáma Yusri̱, Isaka Yusri̱, tura Jakupa Yusri̱ atumíin akuptúkai’ tiartá. Tura nu naarka tuke átiniaiti. Nú naarja̱i̱ṉ ukunam akiiniawartatna nusha tuke enentáimturin ártiniati.” 16Tura Uunt Yus Muisaisan chicharuk “Wetá, tura Israer shuara uuntri̱ iruram chicharainiakum ‘Uunt Yus atumí apachri̱ Aprajáman, Isakan, Jakupan Yusri̱ winia wantintiurak chichartak Wi aentsun Ejiptunmaya̱ aents warí itiurainia nuna werin wainkiajai. 17Tuma asamtai Ejiptunam wáitkiatai pujuinia nuyá̱ ji̱i̱kiaran Kanaan nuṉkanmaya̱ Jet aents nuyá̱ Amur aentssha Pírissha Jepsha tura Jípius aents pujuinia nuna nuṉké̱ tí peṉker ashí arak tsapáu asamtai muntsu míshkiji̱a̱i̱ entsa núnis akamunmasha peṉké atsumachminnium apujsartatjai’ tíniuitjiai.

18Kame nisha ame táman anturtamkartatui. Tuma asamtai Israer shuara úuntri̱ji̱a̱i̱ Ejiptunmaya̱ akupin werirum chichaarkuram ‘Uunt Yus Israer shuara Yusri̱ taruttrammaji. Tuma asamtai menaintiú tsawant jeá kampuntin atsunum wétin tsaṉkamkata. Warí ii Uunt Yusri̱ murik mantuar áestuatniuitji’ tu titiá. 19Kame támini̱ṉ Ejiptunmaya̱ úunt akupin átum wétinian tsaṉkatramkashtatrume, nuna paant nékajai. Antsu Wi tí tsuumainian iniaktachmaka akuptámkashtatrume. 20Túrasha Winia kakarmarun iniaktustatjai. Túran Wi kakaram asutiakun Ejiptunam ashammai túrattaj nuja̱i̱ jíinkitniun tsaṉkatramkattarme. 21Nuyá̱ Ejiptunmaya̱ aents atumín Israer shuartirmin shiir enentáimturmararat tusan enentáimtikrartatjai. Átum wéakrumin jú̱nik akuptámka̱i̱rum tusan túrattajai. 22Áintsaṉ núwa̱ka Ejiptunmaya̱ nuwa̱n ápatnik tura ni je̱e̱ncha pujuinia nuna seawar kuít jiruja̱i̱ najanamu tura kuriji̱a̱i̱ najanamu ainia nunasha tura entsatái̱n seawarti. Nuja̱i̱ atumí uchirí̱sha atumí nawantri̱sha áentsrattarme. Tura nuní̱ túrarum Ejiptunmaya̱ aents takakainiana nu jurukrum aya jú̱nik ikiuktiatrume” Uunt Yus tímiayi Muisaisan.

Currently Selected:

Jiin. 3: jiv

Highlight

Copy