Jiin. 1
1
Ejiptunam Israer shuar wáitsamu
1Israer shuar aṉkant aṉkant uchirtiuk ni aparí̱ Jakupja̱i̱ Ejiptunam jeawarmia nuka ju̱ áiniawai, 2Ruwin, Semiun, Riwí, Jutá, 3Isakár, Sapurún, Piṉjiamín, 4Tan, Neptarí, Kaat, tura Aser. 5Kame Jakupu shuari̱ ashí iruram sataintia shuar ármiayi. Antsu Juseka Ejiptu nuṉkanam pujumiayi.
6Nuyá̱ Jusesha tura ni yachi̱sha núnisaṉ nu tsawantin matsamármia nusha ashí amuukarmiayi. 7Tura Israer shuarsha ti pampaṉkar ti kakaram ajasármiayi. Túrunawar Ejiptunmaṉka piákarmiayi.
8Tura nú ukunam Ejiptunam chíkich akupin Jusen nékachu náamkamiayi. Tura nisha ni shuari̱n chicharainiak 9“Iiskua, Israer shuar íiji̱a̱i̱ṉkia naṉkaamas ti untsurí ajasárai tura iiji̱a̱i̱ naṉkaamas kakaram áiniawai. 10Kame yamaikia enentáimpratai. Meset akui nisha ii nemasri̱ji̱a̱i̱ iruntrar iin nupettamkar pisarchartatuak. Nu asamtai ti pampaṉka̱i̱ṉ tusar nekaamainiachuk suritniákarti” tímiayi.
11Nuya̱ṉka Israer shuaran ti kakaram takamtiksarat tusa iniamniun anaikiarmiayi. Tura Parauṉkan yurumak irumtai̱ je̱a̱ je̱a̱mkarum jimiará pepru najanatarum tusar takamtiksarmiayi. Nu pepru náari̱ṉkia Pitiun tura Ramisés ármiayi. 12Kame Israer shuarka tí waitkiainiamaitiat ti untsurí pampaṉkarmiayi. Túmainiakui Ejiptunmaya̱ aentska Israer shuaran ashamiarmiayi.
13Imianú untsurí ajasármatai Ejiptunmaya̱ aents Israer shuaran nuna kakaram takamtikiarmiayi. 14Tura naṉkaamas takamtikiainiak, nuwe pachimkiatniuncha tura iniarkatniuncha, chíkich takat irunmia nunasha mái̱ takamtik awajénam tí waitiarmiayi. 15Núnisaṉ Israernumia̱ṉ jimiará nuwa̱ uchin takumtikin ni naari̱ Sepra tura Púa ármiayi. Nú nuwa̱n Ejiptunmaya̱ akupin chicharainiak 16“Israer nuwa̱ uchin takakuiṉkia átum iistarum. Tura áishmaṉkaitkiuiṉkia mátarum antsu núwa̱itkiuiṉkia máwairap” tiármiayi. 17Túrasha uchin takumtikin armia nuka Yusan ashamainiak akupniu chichame̱nka umirtsuk uchi áishmaṉchincha mácharmiayi. 18Nuna túruiniakui ataksha Ejiptunmaya̱ akupin uchin takumtikniun untsukar chicharainiak “¿Warí urukamtai wi tímiajna nuka umitsuk uchi áishmaṉ máatskesha iniaisarum?” tímiayi. 19Nu tutai uchin takumtikin aimiainiak “Israer nuwa̱ka Ejiptunmaya̱ nuwá̱ ániuchu áiniawai. Antsu apu ásar iikia jeatsrini̱ṉ takusu jear wéaji” tiármiayi. 20Nuna tura ásarmatai uchí takumtikniun Yus yaiṉkiarmiayi. Tura Israer shuarsha pampaṉkar ti kakaram ajasármiayi. 21Tura uchin takumtikin armia nu Yusan ashamkaru ásarmatai Yus nu nuwa̱n yain ni shuari̱ncha ipiampármiayi. 22Nuyá̱ Parauṉ ashí Ejiptunmaya̱ aentsun chicharainiak “Ashí Israer uchi áishmaṉ akiiniainia nuka Niru entsanam ajaptiarum. Antsu nuwa̱ akiiniamtaiṉkia máwairap” tímiayi.
Currently Selected:
Jiin. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
