Jiin. 12
12
Paskua namper
1Ejiptunam Muisais Araunja̱i̱ pujuinian Uunt Yus chicharainiak 2“Jú̱ nantuka nekapmat náṉkamma nantuiti. Atumíinkia ju̱ nantuja̱i̱ uwikia náṉkamui. 3Ashí Israer shuar iruraram ujainiakum ju̱ nantu tias tsawantin chikichik apa urutmá pamparuit nuja̱i̱ jea aṉkant aṉkant atumí murikrí̱ apujtumsatarum tiartá. 4Tura tí nukap pampaṉchaitkiuṉka murikiu namaṉke̱ amukchamnia asa ni shuari̱ ayamach pujuinia nuna ipiá chikichkiniak irunturar yuáwarti. 5Tura muriksha chípiuksha peṉké tunamárcha áishmaṉ chikichík uwí achíaku enetratarum. 6Tura jú̱ nantutini̱ṉ tsawant katurse jeat tusarum nákastarum. Túrarum nú tsawantinkia kí̱ana ai̱ aṉkant aṉkant Israer shuartiram murik sué̱nam tsupikrum máattarme. 7Nuna numpé̱ achikrum yurumáttarmena nú je̱a̱ wáitiri̱ mái̱ pauri̱n tataṉkri̱ntiuk yakartarum. 8Tura nu káshikia namaṉ weaka iniarámu nuyá̱ yapá nupa̱sha núnisaṉ karin eṉketáchma paṉ najanamu yuátarum. 9Nu namaṉ yúakrumsha páiṉkiarmeka tura eneka yuáwairap. Tura muuke̱sha makui̱sha ampuje̱sha yúakrum aya weaka iniarámuk yuátarum. 10Tura kashin yuamí tusarum ampirá ikiusairap. Ampiniármataiṉkia áesatarum. 11Tura atumí pushirí̱sha entsá entsasrum akachumarum ántsaṉ sapatcha awerarum tura wai̱sha ushukrusrum iwiarnasrum wárichik yurumátarum. Uunt Yusa namperi̱ Paskua tutainti. 12Tuma asamtai nu kashi Ejiptu nuṉkanam naṉkaamaktiatjai. Túran Ejiptunmaya̱ aentsu uchirí̱ iwia̱i̱ri̱n núnisaṉ yajasma ainia núnanuncha mantuawartatjai. Tura aents najanamu yusan Ejiptunmaya̱ aents tikishmátainia nunasha asutiuáwaran emesturartatjai. Wi Uunt Yus asan tajai. 13Wáitiniam numpa yakarma átatna nuja̱i̱ atumniaka nekaattajrume. Nu numpa yakarman wainkianka nákak naṉkaamaktiatjai. Tura Wi Ejiptunmaya̱ aentsun máwartatjana nuiṉkia atumí uchirí̱nkia máchartatjai.
14Ju̱ tsawantka tuke enentáimtutai̱ átatui. Atumí uchirí̱sha, tiraṉki̱sha nuyá̱ tiraṉki̱sha aarma ana nuna umiiniak Uunt Yus enentáimtutai̱ namperan tuke najatin ártatui. 15Siati tsawant paṉ karin eṉketáchma yuáttarme. Yama juarma tsawantiya̱ṉ atumí je̱e̱nkia karin takusairap. Warí yama juarma tsawanta nuyá̱ juarki̱ siati tsawant jeamam paṉ karin eṉketámun yaaksha yúakka Israernumia̱ṉka ji̱i̱ki̱ aju̱i̱miu átatui. 16Emka tsawantin iruntratin átatna áintsaṉ siati tsawantincha Winia enentáimtursatai tusarum iruntiattrume. Tura nú tsawantinkia takakmasairap. Antsu áyatik atumí yurumátniuri̱ iwiaratniunak tsaṉkateajrume. 17Ashí uwitin atumsha paṉka karin eṉketáchma namperi̱ najantiatrumna nui̱ nu tsawantin Wi Ejiptu nuṉkanmaya̱n Israera suntari̱n ji̱i̱rarmajna nu enentáimtittiarme. Tuma asamtai atumí tiraṉki̱sha tuke túrin ártiniaiti. 18Yama naṉkamma nantutin tsawant katursenam kí̱arai̱ juárkirum tsawant paintiúnutin aṉkuantainia ímianai karin eṉketáchma paṉ yuáttarme. 19Kame nu siati tsawantin karin atumí je̱e̱n peṉké atsutniuiti. Tura nu nuṉkanam tuke pujuusha nuyá̱ yajaya̱ aentskesha karinji̱a̱i̱ najanamun yúakka Israer shuarnumia̱ṉka ji̱i̱kmia átatui. 20Tuma asamtai karinji̱a̱i̱ najanamuka peṉké yuáwairap. Tura tui̱ pujuttarum nui̱sha paṉ karin eṉketáchma najanamu yuátarum” tímiayi Uunt Yus.
21Tura Muisaiska Israer shuara uuntri̱ armia nuna irurar chicharainiak “Atumí shuari̱ aṉkant aṉkant murikiu itiar máwar Paskua namperan najanawarti. 22Nuna numpé̱ ichiṉnanam jusarum uruchia ániuja̱i̱ numpa ejamprarum waiti tataṉkri̱ntiuk yakartarum. Tura káshikia chikichkisha ni jé̱e̱ya̱ṉka tsawa̱a̱mam jíinkicharti. 23Warí Uunt Yus Ejiptu aentsun amukí̱ wéak waiti mái̱ pauri̱n tataṉkri̱ntiuk numpaja̱i̱ yakarman wainkiaṉka Uunt Yuska nákak naṉkaamak atumí je̱e̱ṉkia maṉkartinniaka awa̱intiurmashtatrume. 24Nekaatarum, ju̱ akupkámuka átum tura atumí uchirí̱sha tuke enentáimtin ártatui. 25Tura Uunt Yus nuṉkan nekas susattajrume turamiarmena nui̱ jearmesha ju̱ namperka tuke najantiatrume. 26Tura atumí uchirí̱ chichartamainiak ‘¿Warí urukamtai ju̱sha áitkiarum?’ turamainiakuisha 27aya̱krum ‘Ju̱ taṉku majnia ju̱sha peṉké ántrar jú̱tikiatsji. Antsu Uunt Yusna Paskua namperi̱nti. Ejiptunmaya̱ aentsun amukí̱ wéak Israer shuartinkia uwemtikrampramiaji. Nui̱ Israer shuar tsuntsumawar shiir awajsarmiayi’ titiarum” tímiayi. 28Uunt Yus Muisaisan Araunja̱i̱ Israer shuar jú̱nis túrawarti tiarmia núnaka ímiatrusaṉ umikiarmiayi.
Uchi iwia̱i̱ri̱ jákarma
29Kame jú̱nis túrunamiayi. Uunt Yus Ejiptunmaya̱ aentsu uchirí̱ iwia̱i̱ri̱n kashi ajapéantu ai̱ máwarmiayi. Parauṉka uchirí̱ iwia̱i̱ri̱ úunt akuptainiam pujumia nuyá̱ juárkin sepunam pujuarmia nuna uchirí̱ncha tura taṉku eem petsakma armia nunasha ashí mantuawarmiayi. 30Nu túrunamtai Parauṉsha tura ni takarin armia nusha ashí Ejiptunmaya̱ aentssha nú nuṉkanmaṉka uchi iwia̱i̱ri̱ chikichik je̱a̱nmaṉsha iwiaaku juakcha ásarmatai kashi nantarar charaatum ajainiak peṉké kuntuts uur ajarmiayi. 31Nuyá̱ Parauṉ Muisaisan Araunja̱i̱ nu kashi untsukar táarmatai chicharainiak “Wí shuarai̱ya̱ṉka jíintratarum. Ashí Israer shuartirmeka wetarum. Túrarum tímiarmena nútiksarmek atumí Uunt Yusri̱ umirutarum. 32Yamaikia tímiarmena nútiksarmek atumí waakari̱sha murikrí̱sha yaruakrum wetarum. Tura winiasha seatritiarum” Parauṉ tímiayi. 33Kame Ejiptunmaya̱ aentsti ashí jákartatji tusar Israer shuaran ni nuṉke̱ya̱n wárik ji̱i̱rtai tusar wáurtiarmiayi. 34Nuyá̱ Israer shuarsha paṉ najanatin nanekman karin eṉketáchman eṉketái̱niam eṉkeawar ni awaṉkémpri̱ji̱a̱i̱ nukukar yakainium awaṉkekar júkiarmiayi. 35Israer shuarsha Muisais timia tímiatrusaṉ Ejiptunmaya̱ aentsun kurin tura kuít jiruncha, pushincha seawarmiayi. 36Nuyá̱ Israer shuaran waitnentrar seamainia nuna súsarat tusa Uunt Yus Ejiptunmaya̱ aentsun waitnenkartin awajsaram tí nukap súsarmiayi. Nuní̱ túrawarmatai Ejiptunmaya̱ aentsun mash atantrarmiayi.
Israer shuar Ejiptunmaya̱ jiintramu
37Tura Israer shuarsha Ramisés nuṉkanmaya̱ Sukutnum wénak uchinkia nekapmatsuk aya úuntak nekapmaram saisiantu mir náwek wéarmiayi. 38Jíiniar wénak ti untsurí náṉkamas shuaraimiak muriknasha waakari̱ncha tí untsurí yaruakar wéarmiayi. 39Kame Israer shuarsha Ejiptunmaya̱ wárik ji̱i̱ra akupénamu ásar yurumkancha iwiartumkacharmiayi. Tura Ejiptunmaya̱ karin eṉketáchman iwiarkamun júkiarmia nuna páṉkan najankar iniarkarmiayi. 40Tura Israer shuarsha kuatrusiántu traintia uwí Ejiptunmaṉka pujusármiayi. 41Nuyá̱ kuatrusiántu traintia uwí jeamunam nu tsawantini̱ṉ Uunt Yusa shuari̱ Ejiptunmaya̱ṉka mash jíintrarmiayi 42Kame Ejiptunmaya̱ atumín ji̱i̱rmaru asamtai jú̱ kashikia Uunt Yusna átiniaiti. Tura nú kashitin atumsha nuyá̱ atumí uchirí̱sha Uunt Yusan enentáimtusartin áiniawai.
Paskua nájankur umiktin chicham
43Nuyá̱ Uunt Yus Muisaisan Araunja̱i̱ chicharuk “Ju̱i̱ti Paskua namper nájankur umiktin chicham. Yajaya̱ aentska peṉké yúashtiniaiti. 44Antsu ashí iniatai̱ kuitji̱a̱i̱ sumakma ainia nuka túrasha tsupirnakmaitkiuṉka yuatí. Naṉ. 17:10-14 45Antsu yajaya̱ aentssha tura takakmak wekaasha nú Paskua murikiu namanké̱nka yuashti. 46Túrasha chikichkí je̱a̱nmaṉ yunati. Núnisaṉ nu je̱a̱nmaya̱ṉka namaṉka junakchati tura ukunchísha kupirnakchati. 47Kame ashí Israer shuar núnaka túrawartatui. 48Kame yajaya̱ aentssha ámiji̱a̱i̱ pujá asa Uunt Yusa Páskuari̱n najatataj tákuṉka nu aentsnumia̱ ashí áishmaṉ ainia nuka tsupirnakarti. Tura tuke nuṉke̱nniua núnis ajas nampernaka najatati. Antsu tsupirnakchaka núnaka peṉké yuashti. 49Tuma asamtai ashí Israer shuartirmesha núnisaṉ yajaya̱ atumji̱a̱i̱ matsatainia nusha ju̱ akupkámunak umikiartatui” tímiayi. 50Uunt Yus Muisaisan Araunja̱i̱ umiktarum tusa akupkámia núnaka ashí Israer shuarsha tímiatrusaraṉ umirkarmiayi. 51Tura Uunt Yus Israer shuaran nu tsawantai̱k Ejiptunmaya̱nka ni suntarí̱ya nútikias ji̱i̱rarmiayi.
Currently Selected:
Jiin. 12: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
