Jiin. 10

Uchu asutkiaka titikriátsja̱i̱

1Uunt Yus Muisaisan chicharuk “Parauṉ pujamunam wetá. Wi nin tura ni takarniúri̱miak aents túrachminia nuna iniaktustaj tusan ántichu awajsarjai. 2Kame atumí uchirí̱sha tura atumí tiraṉki̱sha, Wi Ejiptunmaya̱ aentsun túramiaj nu ujakmintrum tusan tura Wi nin, aents túrachminian iniaktusarmajna nu nekaarum nuiṉkia Wi Úunt Yusaitjiana nu nekaraku tusan túramjai” tímiayi. 3Nuya̱ṉka Muisais Araunja̱i̱ Parauṉ pujamunam wéar chicharainiak “Uunt Yus Israer shuara Yusri̱ chichartamuk ‘Winí̱ péejchach ajastin ¿túkek nakitki̱ wétatam? Kame Wi shuar wéar shiir awajtúsarat tsaṉkatkarta. 4Tura akupénachkumni̱ṉkia Wi kashin ame nuṉkemínkia aya titikriátsak awajsattajai. 5Tura titikriáts ashí nuṉkanam tu̱a̱kar nuṉkancha mash nukuk wáinkiachmin ajastatui. Túruna micha kákek árak ashí emesrachma juaku ainia nuna tura numi arakma irunainia nunasha titikriáts yuáwar mash amukártatui. 6Núnisaṉ ame je̱e̱mincha nuyá̱ ame takartámin ainia nuna je̱e̱ncha tura ashí Ejiptu aentsu je̱e̱ncha piákartatui. Atumí aparí̱ tura apachrí̱sha yaunchu pujuarmia nusha peṉké wáinchatai yamái atumji̱a̱i̱ túrunattawai’ túramui” tu ti Muisais ikiuak áyantasaṉ Parauṉ pujamunmaya̱ jiinkimiayi. 7Nui̱ṉkia Parauṉka takarniúri̱ nin chicharainiak “¿Urutáik ju̱ áishmaṉsha iincha itiurchat awajtámtsuksha iniaitiámsatajⁱ? ¿Ju̱ aentssha akuprarta ni Uunt Yusri̱n tikishmátuwarat? ¿Warí Ejiptu nuṉka emesnaka nuka nékatsmek?” tiármiayi.

8Nuna tuíniakui Parauṉ ataksha Muisaisan Araunja̱i̱ untsuk itiar chicharainiak “Yamaikia werum atumí Uunt Yusri̱ tikishmátutarum. Tura wéartatna nusha ¿ya ainia?” tímiayi. 9Tutai Muisais aya̱k “Ashí ii úuntrimiak uchirtiuk nawantri̱ntiuk núnisaṉ ii murikrí̱sha waakasha yaruakar wéartatji. Warí nuja̱i̱ ii Uunt Yusri̱ uunt namper najatatai tusar júkiartatji” tiármiayi. 10Nuna tuíniakui Parauṉ chicharainiak “Warí átum yajauch enentáimmiaka tí paantaiti. Tuma ai̱sha wi atumín uchirtiuk weku tusan tsaṉkateakuisha atumniaka Uunt Yus iirmasarti. 11Warí nuninkia túrashtatjai. Antsu aya áishmaṉtirmek werum Yus shiir awajutarum nuní̱ túratai ¿tusarmechuk átumka wakerarum?” Tura nuya̱ṉka Parauṉka takarniúri̱ Muisaisan Araunja̱i̱ ji̱i̱ki̱ aju̱i̱niarmiayi.

12Nuna túramtai Uunt Yus Muisaisan chicharuk “Muisaisá, ame uwejém Ejiptu nuṉkanmaani̱ takuitia. Túrawakmin titikriáts kaunak Ejiptunam micha kákek mash emeskachma ainia nuna ashí amukarti” tímiayi. 13Nu tutai Muisais ni wái̱ri̱n Ejiptunmaani̱ iwiaiṉkiamtai Uunt Yus nasen etsa̱ jintiainmaani̱ya̱ nu tsawantin tsawai̱sha káshisha násenmamtikiamiayi. Tura kashin tsawa̱a̱k nase etsa̱ jintiainmaani̱ya̱ násentuk titikriátsan ikiankamiayi. 14Túram titikriáts ti kaunak ashí Ejiptunka anetak tuwaimiayi. Kame yaunchu túmashtain tura ukunmasha túrunashtinian nui̱ túrunamiayi. 15Tura titikriátcha Ejiptunam ti piak nuṉkasha tee ajasmiayi. Tura numí nere̱ncha nuke̱ncha nupa̱ncha micha kákekamia nui̱ juákaru wajainiaṉka mash yua amukármiayi. Kame Ejiptu nuṉkanmaṉka kampunniunmasha ajanmasha chikichkisha núke̱nniuka juákcharmiayi. 16Nuya̱ṉka nu túrunamtai Muisaisnasha tura Araunnasha wárikmas Parauṉ untsuk chicharainiak “Atumí Uunt Yusri̱i̱ncha tura atumíincha tunaan túrajai. 17Túrasha jú̱keka waitneasrum winia tunaar tsaṉkurturtarum. Ju̱ titikriáts jakamnia awajta ju̱na ashíakarat atumí Uunt Yusri̱ seatritiarum” tímiayi. 18Tutai Muisais Parauṉ pujamunmaya̱ jiinkí̱ Uunt Yusan seamiayi. 19Túramtai Uunt Yus etsa̱ akatainmaani̱ya̱ ti kakaram násenmamtikiamiayi. Túram nase titikriátsan umpuí Kapantin Nayantsanam utsamiayi. Túramu ásar Ejiptunmaṉka chikichik titikriátskesha juákcharmiayi. 20Túrasha Uunt Yus Parauṉkan ántichu awajsam Israer shuaran akupkacharmiayi.

Nuiwi asutkiaka kashi ajasma

21Nuiṉkia ataksha Uunt Yus Muisaisan chicharuk “Uwejém nayaimpinmaani̱ takuitia. Túrawakmin Ejiptunmaṉka kiritin tee antiṉminia ajasat” tímiayi. 22Tutai Muisais uwejé̱n nayaimpinmaani̱ takuimtai Ejiptunmaṉka wainmakchamnia menaintiú tsawant tee ajasmiayi. 23Nu túrunamtai nui̱ pujuarmia nu aentska chikichji̱a̱i̱ wainniairatniuncha tujintkiarmiayi ántsaṉ menaintiú tsawant nuiṉ wekaatsuk pujusármiayi. Antsu Israer shuar matsatmanumka tsáapniniuyayi. 24Nuyá̱ Parauṉ Muisaisan untsuk chicharuk “Yamaikia atumí Uunt Yusri̱ tikishmátutarum tura wéakrum atumí uchirí̱ṉkia yaruaktarum antsu waakarmeka tura murikrumsha ikiuktiarum” tímiayi. 25Nuní̱ tutai Muisais Parauṉkan chicharuk “Warí ii Uunt Yusri̱ shiir awajeakur takamtsuk áestuatniuka nui̱ṉkia ame amastatme. 26Antsu ii waakari̱ṉkia mash yaruaktatji tura nanchikchiri̱ṉsha peṉké ikiukchattaji, waaka júajnia ju̱ja̱i̱ ii Uunt Yusri̱ áestakur shiir awajsattaji. Túrasha ímianai jearsha warí taṉkuja̱i̱ntsuk Uunt Yus shiir awajsatajⁱ nékatsji” tímiayi. 27Túrasha Uunt Yus Parauṉkan ántichu awajsamu asa Israer shuar wéartinian suritkiarmiayi. 28Nú arant Parauṉ Muisaisan chicharuk “Wini̱ya̱ṉka jiinkí̱ wetá túrasha anearta atakka tarutip. Tame íirkumka jakattame.” 29Tutai Muisais aya̱k “Ayu, ame túrutu asakmin atakka waketkin íishtatjame” tímiayi.

Currently Selected:

Jiin. 10: jiv

Highlight

Copy