Jiin. 9

Seṉku asutkiaka taṉkú suṉkuri̱

1Nuyá̱ Uunt Yus Muisaisan chicharuk “Parauṉka je̱e̱n werim chicharkum ‘Israer shuara Uunt Yusri̱ chichartamuk “Wí aentsun Winia náarun shiir awajsarat akuprarti” tawai’ titiá. 2Antsu akuptsuk emetam pujurkumni̱ṉkia 3kawairmesha umpururmesha kamiyurmesha waakarmesha tura murikrumniasha ashí taṉku nuṉkemín nui̱ írunna nunasha ti najamin suṉkuran Uunt Yus aju̱ntrattawai. 4Tura Uunt Yus Israer shuara taṉkuri̱n Ejiptunmaya̱ aentsu taṉkuri̱ji̱a̱i̱ akankattawai. Israer shuara taṉkuri̱nkia chikichkiksha jaka̱i̱ tusa túrattawai” tímiayi. 5Jú̱naka Uunt Yus kashin ju̱ nuṉkanam jú̱nis túrattajai tusa iwiarayi. 6Nuyá̱ kashin Uunt Yusa chichame̱ uminiuk Ejiptunmaya̱ aentsu taṉkuri̱ mash kajinkiarmiayi tura Israer shuara taṉkurí̱ṉkia chikichkiksha peṉké jákacharmiayi. 7Núnisaṉ Parauṉ ni shuari̱n Israer shuara taṉkurí̱sha jákariash nekaatarum tusa akupkámu Israer shuara taṉkuri̱nkia peṉké chikichkiksha jákacharai táman antukiat Parauṉka nú arant enentái̱n ikiatsuár Israer shuaran akupkartinian suritkiarmiayi.

Sais asutkiaka uṉkumu suṉkur

8Uunt Yus Muisaisan Araunnasha chicharainiak “Muisaisá, yuṉkunim atsaiki̱ jukim Parauṉ imiá pujai̱ṉ pujamunam jeam yuṉkunim nayaimpinmaani̱ tsakiṉmakta. 9Túrawakmin nu yuṉkunim ashí Ejiptunam piak aentsnasha tura yajasmancha sáantkar jiintiuram kuchaprukartatui” tímiayi. 10Tímiatrusaṉ umikiar Muisaissha Araunja̱i̱ Parauṉsha íimmianumaṉ wajasar Muisais yuṉkunmin nayaimpinmaani̱ naṉkimiamtai aentsnasha tura yajasmancha sáantkar jiintiuraram kuchaprukarmiayi. 11Kame ashí Ejiptunam kuchaprukarmiayi. Núnisaṉ uwishniusha kuchaprukaru ásar Muisaisai̱ weankatniun peṉké tujintkiarmiayi. 12Túrasha Parauṉka Uunt Yus ántichu awajsamu asa Uunt Yus Muisaisan timia ímiatrusaṉ antukchamiayi.

Siati asutkiaka micha aju̱ntrámu

13Nuyá̱ ataksha Uunt Yus Muisaisan chicharuk “Kashin káshik Parauṉkai̱ weme ujaakum ‘Israer shuara Uunt Yusri̱ chichaak “Wi aentsun aṉkant akupkarti winia tikishmátruwearat tawai titiá. 14Tura nú arant ujaakum yamái enentáimtikrataj tusan ame takartámniurmin núnisnak shuarumin winia asutkiarun akuptúktatjame nekas nekaraku wiji̱a̱i̱ métekka ju̱ nuṉkanmaṉka chíkichkia peṉké atsawai tusan túrattajai. 15Warí Wi ámin ashí shuari̱ntiuk Winia asutkiarja̱i̱ amukuitkiuiṉkia ju̱ nuṉkanmaṉka pujucha̱a̱me. 16Núnisaṉ winia kakarmarun ámin iniaktustajam tusan tura winia naar ashí nuṉkanam etserkamu atí tusan máchuitjiame. 17Túramaitiatmek wi shuar akupratin nakitiakum ¿nu arantak kajeam? 18Nu asamtai nekaata, kashin ju̱ni̱ ai̱ Ejiptunam yama matsamkamunmaya̱ yamaiya̱ tímiaja̱i̱sha peṉké turunachman michan yútumtikiattajai. 19Núnismek ashí ame nuṉkemín irunainiana nunasha tura waakarmincha je̱a̱ utsawarti tusam akupkarta. Túrachmanka shuarnasha yajasmancha micha kákerak amuktatui” Israer shuara Uunt Yusri̱ túramui’ titiá” Uunt Yus tímiayi Muisaisan.

Siati suṉkur Ejiptunam ukanárma

20Parauṉka takarniúri̱ Uunt Yusa chichame̱n ashamiarmia nuka ni iniatairi̱n waakartiuk je̱e̱n awakeararmiayi. 21Túrasha Uunt Yus nekas túrattawai tu enentáimtuscharmia nuka ni iniatairi̱ncha tura waakari̱ncha sá̱a̱kniumaṉ matsamsati tusa pachischarmiayi. 22Nuya̱ṉka Uunt Yus Muisaisan chicharuk “Uwejém yakiní̱ takuitia. Túrawakmin ashí Ejiptu nuṉkanmaṉka aentsnumsha yajasmanmasha tura ajanmasha micha kakerattawai” tímiayi. 23Nu tutai Muisais ni wái̱ri̱n nayaimpinmaani̱ takuimtai Uunt Yus téter awajki̱ michan jiji̱a̱i̱ páchitran Ejiptunam yútumtikiamiayi. 24Tura micha jiji̱a̱i̱ páchitra naṉkaamas uunt tura tí kijin nú weasha Ejiptu nuṉkanam yama matsamkarmia nuya̱sha peṉké naṉkaamaschauyayi. 25Tura micha kákerak Ejiptunam irunmia núnaka aentsnasha taṉkuncha a̱a̱ wajainianka amukmiayi. Núnisaṉ ashí árak nú nuṉkanam irunmia nunasha tura numincha ashí emeskamiayi. 26Antsu Kusen nuṉkanmaṉka Israer shuar pujuarmia nui̱ṉkia míchaka kakekachmiayi. 27Nui̱ṉkia Parauṉ Muisaisan Araunja̱i̱ untsukar chicharainiak “Yamái yajauchin túrajai. Uunt Yuska nekas péṉkeran túriniaiti antsu wi nekaska wí shuarja̱i̱ yajauchitji. 28Yusa chárpiri̱ tura michasha meṉkakarat tusarum Uunt Yus seatarum. Nuiṉkia Israer shuaran nú arant emetkin wéchattajai, antsu wéarti tusan tsaṉkatkartatjai” tímiayi Parauṉ. 29Tutai Muisais Parauṉkan chicharuk “Wi péprunmaya̱ jíinkiunak Uunt Yusai̱ni̱ uwejrun takuittiajai. Túramtai michasha chárpisha meṉkarattawai túrunamtai núṉkaka Uunt Yúsnaiti títiatme. 30Túrasha nékajai, amesha tura takartámniusha Uunt Yusa kakarmari̱ wáiniatrum peṉké ashamkachuitrume” tímiayi.

31Kame micha kaketuk tarach najantai riniu kuku̱jruku tura sewata tuyu̱rka irunmia nunasha mashⁱ emeskamiayi. 32Antsu tríkiuka sentenuja̱i̱ wau tsapachu ásarmatai emeskachmiayi. 33Nuyá̱ Muisais Parauṉkai̱ chichaasua jiinkí̱ tura pépruncha ikiukí̱ Uunt Yusai̱ni̱ mái̱ uwejé̱n takuimiayi. Túrunamtai micha kákeamusha chárpisha setuamiayi. Tura nu nuṉkanmaṉka yúmikia yutuktinian iniaisámiayi. 34Tura yumisha michasha chárpirmasha meṉkakan nekaayat Parauṉka ataksha tunaan túramiayi. Tura ímia ni nuyá̱ ni takarniúri̱miak peṉké ántichu ajasármiayi. 35Tura Parauṉsha nu arant ántichu ajas Uunt Yus Muisaisan yaunchu ujakmia ímiatrusaṉ Israer shuarnaka aṉkant akupratniun tsaṉkamkachmiayi.

Currently Selected:

Jiin. 9: jiv

Highlight

Copy