1 Pit. 1
1
1Wisha ju̱ papin aajna nu Pítruitjiai. Wisha Jesukrístu akatrámurintjiai. Israer shuar Yus shuar árumna nuna atumín aṉkant aṉkant tsakiṉmakarum chíkich chíkich nuṉkanam matsatrumna nuna áatjarme. Púntunmasha Karaseanmasha Kapatúseanmasha Ásianmasha Pitinianmasha pujarmena nuna áatjarme. 2Yaunchu Apa Yus uwemtikrataj timia núnisaṉ achikmaitrume. Tura Winia ajasat tusa ni Wakaní̱ji̱a̱i̱ akantámkamiarme. Umirtukat tusa nuna túramiayi. Tura Jesukrístu numpe̱ tsakiri̱ji̱a̱i̱ atumí enentái̱n chamir awajtúrmasmiarme. Wats, Yus tuke waitnentramar ti shiir awajtámsarat tusan wakerajrume.
Shiir enentáimsar pujustin
3Wats, Yus ii Uuntri̱ Jesukrístu Aparí̱ ana nuna naari̱ shiir awajsatai. Yussha ti waitnentrama asa atak akiiniatniun suramsaitji. Jesukrístu jakamunmaya̱ nantakin asamtai iikia atak akiiniar tuke iwiaaku pujustiniaitiajnia nu arutramji. 4Tura nayaimpiniam ikiurtámsamu ana nuna achikmintrum tusa Yus wakerawai. Nu ikiurtámsamu meserchamnia amuukachminiaiti. Tura nusha yajauchichuiti. 5Yus nekas enentáimta asakrumin ni kakarmari̱ji̱a̱i̱ wearmarme. Tura tuke uwemtikrampratniun nuṉka amúamunam paant iniakmastatna nu achikmintrum tusa tuke tsawant ni kakarmari̱ji̱a̱i̱ wáitmarme.
6Nu enentáimsarum wararme. Kame ju̱ nuṉkanam pujakrum itiurchat wáinkiashtarmeash. Tura ju̱ nuṉkanam pujustin ishichkichukait. Ukunam péṉker pujustaj tu enentáimsarum wararme. 7Enentáimsatarum. Shuar kurin wakerana núnisaṉ atumniasha umirtukat tusa Yus wakerutmarme. Aents kurin jinium unuiniawai aya kúrik juákat tusar. Kurin ti wakeruinia ásar amukámnia ai̱ṉ túruiniawai. Atumsha itiurchat wainkiarmena nuja̱i̱ Yusan nekas enentáimtusartimpiash tusa nekapsamuitrume. Nu enentáimtamu kuriji̱a̱i̱ naṉkaamas péṉkeraiti. Ukunam Jesukrístu támatai Yuska atumín “péṉker túraitrume” turamtajtsa wakerittiawai. Tura “Ashí shuar nuna nekaawar winia náarun uunt awajsarat” tusa túrutmattarme. Nu tuma asamtai ju̱ nuṉkanam itiurchat wáintrumna nuja̱i̱ nekapsamuitrume.
8Jesukrístu wáinchaitiatrum anearme. Tura yamái wáinchiatrumek nekas enentáimtarme. Tuma asarum ti wararme. Nu warastin nayaimpiniam warastatjinia núniskete, nuka paant títin jeatsji. 9Íimiatarum. Uwemtikrurat tusarum Yus umirkachurmek. Nu uwempratin wainiu asarum wararme.
Krístuja̱i̱ uwempratniuiti yaunchu timia
10-11Yus aentsun waitnenta asa uwemtikrataj tusa tuke wakerimiayi. Núnaka Yúsnan etserin etseriarmiayi. Kristu Wakaní̱ ni enentái̱n pujuriarmia nu túruntsa̱i̱ṉ Kristu wáitsatniuri̱n jintíarmiayi. Tura ukunam ni ti shiir pujustintri̱ncha etseriarmiayi. Túrasha tú áishmaṉkait Kristu tutai tura urutíak túrunat tusar nu etserin émamkesar anintrúsarmiayi. 12Tura ni pujuiniai̱ṉkia túrunashtinian antsu ti ukunam ii pujajnia ju̱i̱ túrunatniun Yus nekaamtikiamiayi. Núnaka Yusa shiir chichame̱n ujatmákarmia nú shuar nekaprutmarme. Nú shuar Yusa Wakaní̱ nayaimpinmaya̱ akupkámu ana nuna nekatairi̱ji̱a̱i̱ ujatmákurme. Maa, nu uwempratniun tájana nuna nayaimpinmaya̱ suntar nekaatai tusar wakeruiniawai túrasha tujintiainiawai.
Péṉker wekasatin
13Tuma asamtai péṉker enentáimsarum tura péṉker íimiasrum wekasatarum. Tura Jesukrístu ukunam wantiniak waitnentramprattana nu yawe̱tsuk nákastarum. 14Umin uchia áintsarmek yaunchu nékachu asarum wakerimiarmena nu iniaisarum Yus umirin atarum. 15Ashí túramurmiji̱a̱i̱ timiá peṉker wekasatarum. Yus untsurmakuana nu, péṉker asamtai átumka ni shuari̱ asarum péṉker wekasatarum. 16“Wi péṉker asamtai atumsha péṉker wekasatarum” Riw. 11:44; 19:2; 20:7 Yus tana nu ni Papirí̱i̱n áarchamukait.
17“Yus winia Aparuiti” tárumna nu aneartarum. Ashí aentsu túrutairi̱n métek Yus nekaattawai. Nu neka asarum ju̱ nuṉkanam pujarmena ju̱i̱ Yus ashamkatarum. 18Warí, antra wekasatniun atumí uuntri̱ jintintramarmena nuyá̱ Yus uwemtikramprarme. Túrasha kurisha kuitcha amukámnia ainia nuja̱i̱ uwemtikrachmaitrume. 19Antsu Kristu numpe̱ ti shiira nuja̱i̱ uwemtikramuitrume. Nu nékarme. Yaunchu shuar tunáa túrakui Yus chichaak “Murik yajauchichu tunamárcha máarum Yus sútai̱niam ikiustarum. Nuna numpe̱n wainkian atumí tunaari̱n tsaṉkurattajai” tíniuyayi. Núnisaṉ Kristu iin jarutramka asa ii tunaarí̱nia̱ uwemtikrampraitji. 20Nuṉkan nájantsuk aentsun jaruktinian Krístun anaikiamiayi Yus. Tura wárik akupkachmiayi. Antsu yamái tsawantin átum pujarmin péṉker pujusúk tusa wakerak atumín jarutramkat tusa Krístun akupkámiayi. 21Niji̱a̱i̱ átumka Yus umiirume. Yuska Krístun jakamunmaya̱n iniantki̱ naṉkamantu awajsámiayi. Yus nekas enentáimtakrum aya péṉkernak túrawai titiarum tusa túraiti. 22Yus nekas tana nuna Yusa Wakaní̱ yáintmakui umirka asarum atumí wakaní̱n péṉker ajasuitrume. Yus shuarja̱i̱ yajauch enentáimtunaitsuk mái̱ anenai ajatai tusarum tura asarum nekas shiir enentáimtunaisrum mái̱ anenai ajatarum. 23Nekaatarum. Yusa chichame̱ umirka asarum atak akiiniaitrum nuka ju̱ nuṉkanmaya̱nchuiti. Antsu Yusa chichame̱ iwiaaku tuke amukachmin ana nú chichamja̱i̱ tuke iwiaaku átiniaitrume.
24Ju̱ aya̱sh tuke pujuschamniaiti. Yusa Papirí̱i̱n jú̱nis áarmaiti
“Ashí aentsti nupa̱a̱ ániuitji.
Ii péṉkeri̱sha kuku̱jia ániuiti.
Nupa̱ wárik kaawai.
Kuku̱jsha núnisaṉ wárik iniaawai.
25 Tura Yusa chichame̱sha tuke amuukachminiaiti.” Isa. 40:6-8
Nu chichamja̱i̱ uwempramnia asamtai atumín etsernakuiti.
Currently Selected:
1 Pit. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
