San. 5
5
Kuítrintin enentáimtikma
1Kuítrinniutiram ju̱ antuktarum. Ti úttiarum. Tí waitsatin asarum ti kakantra úttiarum. 2Kuítrum mash mamukarai tura iwiarmampramurmesha mash tiṉkishap yúkayi. 3Kurirmesha tura kuítrumsha ashí ijiakmamkarai. Ijiakmampramuri̱sha ame péṉkercha túram nuna paant iniakmawai. Tura jinium áesamua áintsaṉ aya̱shmíin ame kuítrum yajauch awajtámsattawai. Amuukatin tsawant jeamunam anearchamame antsu ame kuítrum ikiauṉkamame. 4Ame takat iniararam ementushim akirarmamna nu “akirkati” turamainiawai. Anearta. Ashí Akupin Uunt Yus, nu takartámniu chichame̱n antukai. 5Ashí ju̱ nuṉkanam írunna nu wararsaruitrume. Tuma asarum kapuṉka nuke machararme tura yamaikia mátin tsawant jeayi. 6“Nu shuar tunaiti” tíirum tunaachu tsanumprurum mámarme tura niṉkia surimiakcharmai.
Katsuntratin tura Yus áujsatin
7Nu asamtai yatsuru, nu páchitsuk ii Uuntri̱ Kristu tátin nákastarum. Arakmausha ni arakri̱ péṉker tsapaiti tusa yumi yutuktinian shiir enentáiji̱a̱i̱ nákatsuk. Yútasua umirmatai esatrurmatai júuktatjai tusa nákatsuk. Tura juurmaksha ti waratsuk. 8Núnisaṉ atumsha katsuntsatarum tura yawe̱tkiirap. Kristu tátin yuntumtemayi. 9Yatsuru, nuamtak “ju̱ yajauch túrutui” tunainirap. Tákurminkia Yus iirmastatrume. Níṉkichukait nuna íistin tura anearta nu Yusak tíjiu̱ch wajatramui. 10Yatsuru, yaunchu Yúsnan etserin enentáimpratarum. Tuke ii Uuntri̱ Yus timia nuna shiir etserkarmiayi. Túmaitiat wáitsarmiayi túrasha pachischarmiayi. Núnisrumek enentáimsatarum. 11Itiurchatan katsuntainia nuka nekas shíiraiti, tu enentáimji. Shuar itiurchatan ti katsuntin ámiayi, ni naari̱ Juup. Tura ni itiurchatri̱ naṉkaamasmatai Yus ti núkap kuítri̱n susamiayi.Juup 42:10-17 Nu nékatsrumek. Ii Uuntri̱ Yus ti waitneṉkratchakait.
12Ju̱ ashí naṉkaamas enentáimtustiniaiti, yatsuru. Ame “ee” tákumka nekas titiá. Tura “atsá” tákumka nusha nekas titiá. Nekas chicham chichaachkumni̱ṉkia Yus iirmastatui. Nu asamtai nayaimpisha nuṉkasha ashí írunna nusha páchitsuk aya támena nu tuke nekas atí.
13Wáitiakmeka Yus áujsata. Warakmeka warasam kantamám Yus shiir awajsata. 14Yus shuartiram, shuar jaakka, Yus shuara úuntri̱n untsukti. Tura nisha taartí. Tura Jesusa naari̱ pachikiar asuitiji̱a̱i̱ jaa shuaran ishichik ukatkarti. Túrawar nu shuaran Yusan áujtusarti. 15Tura “Yus nuna nekas anturtamkattaji” tu enentáimsar áujsarti. Túrawarmatai jaa shuar péṉker ajastatui. Yus nin tsuártatui. Tura tunaan tura asa jáakuiṉkia Yus nu tunaan tsaṉkurattawai. 16Nu asamtai atumí tunaarí̱ paant etsertunaiktarum. Túrarum Yus áujtunaistarum atumí tunaarí̱ tsaṉkurnarat tusarum. Péṉker shuar Yusan nekas enentáiji̱a̱i̱ áujeamuri̱ṉkia ti kakarmaiti. 17Yaunchu Yus Chichaman etserin ámiayi, ni naari̱ Irías. Nisha iiji̱a̱i̱ méteketiat yumi yutuka̱i̱ tusa Yusan áujsamtai menaintiú uwí nuyá̱ naṉkaamas yutukchamiayi. 18Ataksha yutukti tu áujsamtai ataksha yutukmiayi tura araksha ataksha tsapainiarmiayi.
19Yatsuru, shuar eseera wekatainmaya̱ kanaakuiṉkia chíkich nin waketkitniun yaiṉtí. 20Shuar tunáa shuaran yajauch wekaan awakeakka jákatniunmaya̱ uwemtikrattawai tura ti untsurí tunaarí̱ tsaṉkurnartatui.
Currently Selected:
San. 5: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
