KI 55
55
Na nunginungi i na mateni na bagabevoani#Na vivita iana o Tavite.
1God, gu karinga na nunginungi iaku.
Siana ko murisigeê.
2Gu karingê ma ku aganariê.
Inê kê ape era renigi na anumanumaha iaku.
3Inê kê magu bâraha,
renia na enoni era ka hagamamasiaga apeku.
Ngaira ka merongasiê ma ka kiteniê,
ma ka mangariaga tangê.
4Inê kê magu bâraha ma kê makomo agani,
suria gê anumanuma, vigê meme.
5Inê kê tata ngavê, suria gê magu.
Inê kê kakahuru renigi na marâ era.
6Manga gê tonga na gagahaku manga na kuvê,
vikê be gaha vê ma be mamaro.
7Inê be gaha hagatê ngavê,
ma be oga tare igê na masusu.
8Inê be hata ni tarahua na agua, gê rukuruku igê
tenigi na roga raha ma na tarêheroga.
9Araha, gu urapusigi na katoha iata na merongaku,
ma ku katora, ka totora hegetigi.
Inê kê bâsira, ga oga sutaga,
ma katogi na perenga i hinua raha.
10Ngaira ka bagaparongata ma ka bagatarihata
igê na tangiani ma na bungiani.
11Na ara ni marâ hato ka tâ i ano.
Igê na mahera ka ramo
na hagaparuana ma na haganunuana.
12Manga na merongaku, ma ki rurusiê,
inê kê pe gagêmaga bâraha renia.
Manga na enoni, i panê tangê, ma ki tamasi erasiê,
inê kê girara gê arigurigu tenia.
13Ma igo hete, na tamaku,
na bamane ma na êraku.
14Igerua karu bani tamasi tararu heri,
ma karu hagarahe haku i Ruma ni Rotu.
15I ararira na merongaku, ge me nga i ngekê!
I ararira, ge so mamêrigata
i pasita na enoni, ga bani me noga.
Na eraha ki tarêhigi na aitangihata
ma i pasita.
16Ma inê kê avarasia God na Araha,
ma ngaia ki page hagatahiê.
17I mavoraro, igê na ritovagana, ma i manurahi
inê kê gegege ma kê hagagege tanga God,
ma ngaia ki page aganariê.
18Inê kê meraheariha na merongaku rako.
Ma God ki page katoê, kê aporo,
kê pe mamari.
19God, i bani araha i nago kere vê noga,
ngaia ki page aganariê inê,
ma ki page teharira ngaira.
Renia ngaira ka usi, vige urisi parongata,
suria ga pe magutenia na Araha.
20Na tamaku i nago ki sugarira na tamana.
Ngaia ki pe hagamonarigi na suruha iana.
21Na tamasinga iana ka rongo koro ngavê,
ma na kiteniha ki goga igê na aitangihana.
Ngaia ki hagamesigi na ringena,
ma na tamasinga iana ka hagamesira na enoni.
22Gu nakagi vê tanga na Araha na anumanumaha iamu,
ma ngaia ki page marupego.
Ngaia ki asa, vige katora na enoni, ga tê viteana,
ke rumakaka, se vige votavota.
23God, igo ko hagamesira rêrê na enoni ngegana,
ga nahu enoni ma ka hagaparu bâraha.
Tangê inê, God Araha,
inê be hagêguri togo renigo.
Currently Selected:
KI 55: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
