KI 37
37
Na enoni koro ma na enoni era#Na ki iana o Tavite.
1Siana ko tako renira na enoni era.
Siana ko hengarira na ani ga tanu era.
2Ngaira ka page magahuru,
mangagi na go ga maria.
Ngaira ka page meme,
mangagi na rauga ga mêgu.
3Gu hagêguri togo renia na Araha,
ma ku paronga koro.
Gu tanugi na marâ, ga koro,
hanana go gâga tatara
igê na marê ni suruha.
4Gu vagevagesia na Araha,
ma ngaia ki page vatego na marâ,
go barigigi bâraha.
5Gu hagêguria na Araha renigo.
Gu raruni togo renia,
ma ngaia ki page tamanigo.
6Ngaia ki page katoa na otoha iamu,
ki togatoga manga na arito
igê na ritovagana.
7Gu naasia na matena iana na Araha,
ma ko piringiape.
Siana ko tako renira na enoni
igê na ramana iata.
Siana ko hengarira na enoni,
ga tavoraha maninga
igê na katoha era iata.
8Siana ko mangariaga,
ma siana ko naka na siva.
Siana ko takoha bâraha,
hanana vi go tahitahi tenia na eraha.
9Na enoni, ga hagêguri togo renia na Araha,
ka page nahunia na agua ni suruha.
Ma ngaia ki page paira hura
na enoni, ga erataga, tenia.
10Na enoni era ki sugia ma, vige magahuru.
Go page garira,
ma ki asa, vigu page tarahura.
11Ma na enoni haritagi hete#Mt 5.5.
ka page nahunia na agua ni suruha.
Ngaira ka page vagevagesigi
na ramana ma na marapeha.
12Na enoni era ka harikato renira na enoni koro
ma ka kurukuru rivo tangara.
13Ma na Araha ki rurusira na enoni era,
renia ngaia ki girara,
vi ngaia ki sugi hagaitangira hagetage.
14Na enoni era ka amurigi na tatapa borahu iata,
ma ka rohegi na epage iata.
Ngaira ka nanê, viga nahuira na enoni,
ga matareha ma ka baguru.
Ngaira ka nanê, viga hagamesira na enoni,
ga paronga koro ma oto.
15Ma ngaira hete ka page meme
renigi na tatapa borahu iata mareta,
ma ka page baro na epage iata.
16Na kere nahuninga iata na enoni koro
ka teharigi na ruruguha iata na enoni era.
17Renia na Araha ki page hagamesigi
na raramohata na enoni era.
Ma na enoni, ga koro ma ka oto i maana,
ngaia ki page hagaramonira,
ma ki page anumasira.
18Na Araha ki marupera na enoni matarotaro,
ma ngaira ka page nahunia na agua ni suruha
tare ma tarema.
19Ki asa iata, vige hatamigi na mamasiaganiha
igê na bagabevoani.
Ma igê na matena na magêha raha
ngaira ka page nahunigi na ngêra rako.
20Ma na enoni era hete ka page meme.
Na merongana na Araha ka page magahuru,
mangagi na takani na mahe, ga maugu.
Ngaira ka page magahuru,
mangagi na roboni na gi,
ga aru makaka.
21Ka katora hagaba na enoni era,
ma ki asa, vige barubaru.
Ma na enoni koro hete ka mamahata,
ma ka pe naasigi na baruni.
22Na enoni, ga koro ma ka oto,
na Araha ki page haganahunira
renia na agua ni suruha.
Ma na Araha ki page hagaitangira na ani era,
ma ki page paira hura tenia.
23Na Araha ki bêngenira na enoni
tanga na agua, i tuguhira.
Ngaia ki anumasira na enoni koro,
ga hagakoro obana.
24Naka ma ngaira ka votavota,
i asa iata, vige tâ so tare,
suria na Araha ki page ragera akê.
25Tenia gê sisite mataro me gê gemêa i ngekê,
inê kê pe bâsia noga na Araha,
vige pania na enoni, i tê viteana.
Suria na mêrihaku hagenani
inê kê pe bâsira noga na karena na enoni koro,
vige avarasi ngêra.
26Na enoni koro ki mamahata tare,
ma ki vatera na hagaba na enoni getera,
ma ki ageage renira na karena.
27Gu murisigegi na eraha ma ku paronga koro,
hanana na raraha iamu ki goga tare
igê na agua ni suruha.
28Na Araha ki barigia na otoha,
ma ki asa, vige panira na kariana,
ga toto suria.
Ngaia ki page anumasira tare
na raraha iata na enoni,
ga tê viteana.
Ma na raraha iata na enoni era
ngaia ki page paira hura
tenia na agua ni suruha.
29Ma na enoni, ga tê viteana na Araha,
ka page nahunia na agua ni suruha,
ma ka page oga igê tare ma tarema.
30Na tamasinga iata na enoni koro ka rongo mataha,
ma na vita iata ka koro ma oto tare.
31Na ramata iana God ka nganganihaga igê na aitangihata,
ma ki asa iata, vige page aharêngigi.
32Na enoni era ka hahutugira na enoni koro,
ma ka uhungia, viga nahuira ka meme.
33Ma na Araha ki asa, vige panira tangara na merongata,
hanana vige surira hagaitangira,
matena ga hagatamasira.
34Gu naasia na Araha,
ma ku marupegi na ramata iana.
Ngaia ki page kasigo akê,
suria i page haganahunigo
renia na agua ni suruha.
Ma igo ko page bâsia na Araha,
i page paira hura na enoni era tenia.
35Inê kê bâsia ta na mane,
i pe botage renia na Araha,
ma ki erasira ngavê na enoni.
Ngaia ki hagarahasia marena,
manga na bagapinige raha
igê na hungani i Libanone.
36I muri me inê kê ri i ngekana
ma ngaia ki bani magahuru.
Inê kê bâbâ renia,
ma ki asa, be bâsia.
37Gu bâsira na enoni matarotaro,
ma ku hahutugira na enoni,
ga tê viteana na Araha.
Na enoni, ga haritagi,
ka nahunira na raraha iata.
38Ma na enoni, ga aharêngigi na ramata,
ka page meme ngavê,
ma na raraha iata ka page magahuru hagetage.
39Na Araha ki hagatahira na ani ga matarotaro.
Ngaia ki anumasira
igê na mateni na bagabevoani.
40Ngaia ki tamanira ma ki ramoramo pusira
ma ki hagatahira tenigi na eraha.
Ngaia ki anumasira,
suria ngaira ka gava râ i pasina.
Currently Selected:
KI 37: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
