KI 35
35
Avarasia na Araha#Na ki iana o Tavite.
1Araha, gu urapusira na merongaku,
ma ku meraheariha na ani ga merongasiê.
2Gu migirâ me na bêata ma na tarure,
ma ku tamaniê.
3Gu têa akê na ora ma na mata,
ma ku hagabungira na ani ga tavogeniê.
Gu suru me tangê,
vi igo ko hagatahiê.
4Araha, gu teharira ma ku hagamakira na ani,
ga uhungia, viga nahuiê, kê meme.
Na ani ga harikato reniê
gu hagaporosira,
ma ku katora ke bubununuga.
5Gu katora ka mangagi na momo,
na roga ki rogatenigi,
suria na angero iamu ki tarigenira.
6Matena na angero iamu ki tavogenira,
gu katogi na tara iata,
ka rotoroto ma ka matari.
7Inê kê pe erasia ta na marâ,
ma ngaira ka naka na tu tangê.
Inê kê pe erasia ta na marâ,
ma ngaira ka sutasuta kariê.
8I koro na mera ki hagageparira
ma ka tutu hete ngaira
ma ka votavota hete nikâ igê na suta.
9Ma inê be vagevagesia na Araha,
ma be obakoro, renia i hagatahiê.
10Igê na mêrihaku hagenani
inê be vi vikê tanga na Araha:
“Ti ki maratoramu?
Igo ko anumasira na ani ga mameaga
tenira na ani ga ramoramo.
Igo ko hagatahira na ani ga matareha
tenira na ani ga hagamamasiagara.”
11Na enoni era ka hagatoraiê
ma ka hagatugupuniê.
12Ngaira ka barugi na korohaku renigi na marâ era,
ma inê kê anumanuma bâraha ngavê.
13Ma na matena ngaira ka maeha,
inê kê mesira ma kê harihari.
Inê kê bêtu ma kê nunginungi bâraha,
14tagenana manga gê mesia na tamaku se na goaku.
Inê kê bêtu ma kê angiangi maramara,
tagenana manga na enoni, i mesia kenana.
15Ma na matena ga tarahuê inê na mamasiaganiha,
ngaira ka vagevage ma reniê,
ma ka hakuhaku me ka rurusiê.
Na enoni mahuara nikâ ka tatahuruê,
ma ka ama ni nahuiê nga.
16Ngaira ka meêmarabe,
manga vi inê ki tuku na êgaku,
ma ka bâbâ hemarisi reniê.
17I arihu manga i he, Araha,
ma ko page gagêmaga?
Gu hagatahiê tenira na ani ga meêmarabe.
Gu hagatahiê tenira na o vasiga ngegana.
18Matena ga hakuhaku me na kariamu tanga na hagarahenga,
inê be visigo koro
ma be visigo raha i maata ngaira hato.
19Araha, siana na merongaku ka makimaki teniê.#Ps 69.4; Jn 15.25
Siana ka tehariê na enoni ni hagaparunga ngegana.
Siana na enoni, ga kikiteniê purua ma,
ka hagakokohara tangê
igê na mamasiaganiha iaku.
20Ngaira ka pe tamasi haritagi,
ma ka torahurira bâraha hete
na enoni, ga têa na marapeha.
21Ngaira ka hagatoraiê,
ka ngiriê, ka vivi: “E vego!
Igami kami bâsigo re mamaami!”
22Ma igo, Araha, ko bani girara.
Tahema siana ko munimuni ma,
ma siana ko arisiê, Araha.
23Gu gagêmaga, Araha, ma ku tamaniê.
God iaku, gu rohe pusiê.
24Igo ko koro ma oto, Araha.
Gu rohe pusiê, be matarotaro.
I era ma na merongaku ka makimaki teniê.
25Siana ngaira ka tamasi so mareta,
ka vi, vi ngaira ka tehariê,
ma inê kê so renira.
26Na enoni ka hagakokohara tangê
igê na mamasiaganiha iaku.
Araha, gu teharira ma ku hagamakira,
ma ku katora ke anumanuma.
Na enoni, ga hagarahasira mareta tangê,
gu kasira so ma ku hagamakira.
27Na enoni i na apanena iaku, ga rohe pusiê,
ka ngerengere ma ka vagevage.
Ngaira ka ama ni vivi nga,
vi na Araha ki raramohaga hunia.
Ngaia ki obakoro,
renia na kariana i teha.
28Ma inê be tarohenigi na suriha oto iamu,
ma be kasigo akê
i na ara ni tangiani ma na tangiani.
Currently Selected:
KI 35: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
