PILIPI 4

Na hagaotonga

1Goaku igê na tongesuriha, inê kê takuigamu bâraha, ma kê angisigamu bâraha, suria gê pe oga henigamu. Igamu kamu hagakoro obaku bâraha, ma inê kê age ngavê renigamu! Hoita, goaku igê na tongesuriha, igê na marâ, gê bani visigi, ki tuguhigamu, vigamu nganganihaga igê na mêriha na tongesuriha, ma kamu obâbahaku henia na Araha.

2Evotia ma Sinetike, inê kê kanukanugamurua, kamuru obâbahaku, manga i marisita na enoni, ga tongesuria na Araha. 3Ma kê kanukanugo nikâ, tamaku koro. Inê kê obanigo, gu tamanirerua na gete ngegana, suria ngairerua karu bani tagara bâraha heniê igê na taroheniana na Taroha Koro, henia o Kelemente, ma henira na tamaku hato getera mi tage tagara. Ngaira ka nahunia na morana na mêriha, God ki vatera.

4I ararigamu vigamu vagevage tare, matena mu obâbahaku henia na Araha. Be visia nikâ: mu vagevage.

5Mu piringiape tangara na enoni hato. Na Araha ki sugi râ me. 6Siana kamu tako bâraha renia ta na marâ, ma i na ara ni matena mu nunginungi, mu nungia God renigi na marâ, ga ararigamu, ma kamu visia koro tare i na ara ni matena mu nungia. 7Na marapeha, God i vategamu ki anumasigi na mêrihami hagenani, renia mu obahaku henia o Kirisito Jesu. Na marapeha ngekana ki asa hagetage na enoni, vi ge rongogirara, suria i raha teha ngavê.

8Hoita, goaku igê na tongesuriha, be hagahatongia na tamasinga iaku. Mu nahuni takoha tare renigi na marâ, ga koro, ma na enoni ka visigamu koro renigi. Ngaigi ka na marâ, ga monari, ma ka koro, ma ka oto i maana God, ma i maata na enoni, ma ka matarotaro, ma na marâ, ga hagakoro obata na enoni, ma ka hagakorora. 9Mu katogi na marâ, gê bani hagesurigamu renigi, ma na marâ, gê bani tamasi tangagamu renigi, ma na marâ, mu bani bâsiê, gê katogi. Ma ki page gâga henigamu tare God, i vategia na marapeha.

O Paulo ki visira koro na enoni ga tamania

10Oi, inê kê vagevage teha ngavê, suria gê obahaku henia na Araha. I arihu me era noga igamu kamu girara nikâ, mu hagabângenia, vi igamu kamu obania bâraha, vi gamu tamaniê. Inê kê pe vi, vi gamu tamaniê râ ma, ma ki hato. Ma kê vi hete, vi i asa tangagamu, vi gamu hagabângenia. 11Inê kê vi vikê, mareha suria vi inê kê matareha renia na haga, renia i aresuriê ma, matena gê nahunia, se gê pe nahunia. 12Inê kê girara, gê matareha, ma kê girara, gê ruruguha. Inê kê girara na tarana ngekana. I aresuriê, vigê masumasu, se vigê magê, se vigê ruruguha, se vigê matareha i na agua mavê, ma i na ani mavê na matena. 13Henaka vi na ta, inê kê ramoramo, suria o Kirisito ki hagaramoniê.

14Hoi, i koro era, mu tamaniê tenigi na mamasiaganiha iaku. 15Igamu nga, na Ai ni Pilipi, kanimu girara bâkoro, vi igamu nga ka na haku na enoni, ga tongesuri, mu tamaniê, matena gê pania i Masetonia, ma kê ateate moramora renia na Taroha Koro. Igamu getegamu ma kanimu tamaniê renigi na haga. 16Matena gê oga i Tesalonika, ma kê pe nahunia rârâ ta na marâ, vi ve mauri renia, igamu kamu hagaguhigi tangê na marâ, gê obanigi, mareha vi hagetage ma. 17Mareha vi suria inê kê obania, vi gê tavogi na votovoto, ma suria hete gê obania i raharaha nga na korohami. 18Hoi, be vi tangagamu: na ara ni marâ, mu vateê, ka bani tarahuê, ma kê visigamu koro renigi. I teha renigi na obaniha iaku. O Epaporotito ki bani tagarenigi tangê na votovoto hato iami. Tahema, i ngekê, inê kê nahunigi na ara ni marâ, gê obanigi. Na votovoto iami ngegana ka manga na marâ, i sigini koro, ga susu tanga God renia, manga na vogasiha, i araria God, ma ki hagakoro obana. 19Ma God, gê tagara tanga, ngaia ki page vategamu na marâ hato, mu obanigi, renia o Kirisito Jesu, suria ngaia ki ruruguha teha, ma ki mamahata teha, suria ngaia ki God. 20Ge visia raha God Vaemaka tare ma tare ma. Monari.

Na hagahatongina na leta

21Inê kê hagamauru koro tangagamu hato, na kariana God, mu tongesuria o Kirisito Jesu. Na goaka igê na tongesuriha, ga oga heniê, ka hagamauru koro tangagamu. 22Ngaira hato na kariana God, ga oga ikê, ka hagamauru koro tangagamu, henira na enoni, ga tagara i ruma raha iana na Gavumane i teha.

23Inê kê nunginungi, hanana na Araha o Jesu Kirisito ke takuigamu, ma ke korokoro tangagamu hato.

Currently Selected:

PILIPI 4: KCB

Highlight

Copy