KOLOSE 1

1Igamirua, inê Paulo, gê aposotolo iana o Kirisito Jesu, suria God ki bani ateê, mo Timoti, na goaka igê na tongesuriha, 2igamirua kamuru sege tangagamu, na kariana God i hinua i Kolose. Igamu ki na goamamirua koro igê na tongesuriha, ma ka tage obahaku henia o Kirisito.

Inê kê nungia God Vaemaka, ki takuigamu, ki tamanigamu, ma ki vategamu na marapeha iana.

O Paulo vi visia koro God

3Na ara ni mateni igami kami nunginungi tangagamu, igami kami visia koro God, o Vaemana na Araha iaka o Kirisito Jesu. 4Renia igami kami bani rongoa, vi igamu kamu tongesuria o Kirisito Jesu, ma kamu takuira na ara ni kariana God. 5Matena i tahamorasigamu na hagesuringa mora, na Taroha Koro, igamu kamu rongogi na marâ koro, mu girara mu naasigi. Tahema na tongesuriha iami, ma na hetakuiha iami ka tonga hunani igê na marâ koro, mu naasigi, ma na marâ koro ngegana God i bani nakagi maninga i pasina tangagamu. 6Na Taroha Koro ki merâ me na koroha tangara na enoni, ma ki râhia na maveta hagenani, tagenana manga i pasimi, haganega tenia na tangiana mu rongoa moramora igê na korohana God tangara na enoni, ma kamu girara moramora na morana na korohana. 7O Epaparasi ki bani hagesurigamu renia na tarana ngekê. Ngaia ki na kariamami koro, ma ki tagara bâkoro tanga o Kirisito. Tahema i tamanigamu. 8Ngaia ki bani hagarongogami renia na hetakuiha, na Higona Apu i bani vategamu renia.

9Tahema igami kami nunginungi tare tangagamu, i haganega tenia na matena mi rongogamu moramora igê. Igami kami nungia God ki vategamu na Higona Apu, hanana vi gamu girara na koroha iana God tangagamu, kamu takotako mataha renia, ma kamu rongorongogirara. 10Ngekana igamu kamu page girara mu mauri igê na tarana, na Araha i obanigamu, vi gamu mauri suria, ma kamu page girara mu tanugi tare na marâ, mu hagakoro obana God renigi. Na mauriha iami ki page tataka renigi na ani mavê na tagaraha koro, ma igamu kamu page aitangisia ngavê God. 11Inê kê nunginungi, hanana God ki hagaramonigamu ngavê, suria ngaia ki raramohaga hunia, hanana mu girara mu gatagata igê na ara ni mamasiaganiha, ma kamu piringiape. 12Kamu vagevage, ma kamu visia koro God Vaemaka, i bani hagakorogamu, hanana mu nahunigi na apaneni iami na marâ, God i bani nakagi vê i pasina tangara na kariana, ga têa na viteana na Araha na marara. 13Ngaia ki bani hagatahigia tenia na raramohana na mengo, ma ki bani toregia maninga tanga na arahanga iana o Karena, i takuia bâraha. 14O Karena ki rupasigia, ma God o Vaemana ki bonotenigi na tasi iaka.

O Kirisito ma na tagaraha iana

15Igia ka pe bâsia God, ma o Kirisito ki hagabâsigia renia God renia ngaia marena. Ngaia ki no Karena God, ma ki teharira na ara ni marâ hato, God i hagavorara. 16Suria God ki katoa o Karena, ki hagavorara na ara ni marâ hato i vavearo ma i ano, na ani ga bâsira, ma na ani, ga pe bâsira, mangara na ataro, ga raramohaga, se ga araha, se ga ramata, se ga hagâto. God ki hagavorara na ara ni marâ hato, ga oga renia o Kirisito, hanana na ara ni marâ hato ngegana ka kasia akê o Kirisito. 17O Kirisito ki bani oga me i nago me tarani na ara ni marâ hato, ma ki bêngenira na ara ni marâ hato, ka tagara haku bâkoro. 18Ngaia ki bêngenia na haku na enoni hato, ga tongesuria, ma na haku na enoni, ga tongesuria, ki manga na apena. Na mêrihana na apena ki haganega i pasina. Ngaia ki no Karena God, i teha ma ki mêri aporo tenira na enoni, ga me, hanana vi ngaia getea ki teharira na ara ni marâ hato. 19Renia God marena ngaia ki obania o Karena, vi maratorana ngaia marena. 20Ma God ki obania, vi o Karena ki hagaporosira tanga ngaia marena na ara ni marâ hato. God ki katoa na marapeha renia o Kirisito, i me igê na kuruse. Ma ngekana ngaia ki hagaporosira na ara ni marâ hato tanga ngaia marena, na ani i ano ma na ani i vavearo.

21I nago igamu kamu hagatê tenia God, ma kamu vora na merongona renigi na tarani ga era, mu tanugi ma kamu takusigi. 22Ma i ngekê, renia o Karena ki me monari, God ki bani katogamu, kamu vora re na kariana, hanana na parongami ka page korokoro, ma ka ototo, ma ka matarotaro i maana. 23I monari, ma ki tuguhigamu, mu gatagata nga, ma kamu nganganihaga igê na tongesuriha, ma siana kamu hagamarumungenira na enoni, ka katogamu, kamu kasia na naasiha i tamasia na Taroha Koro, mu bani rongoa. Na Taroha Koro ngekê inê nga Paulo kanigê tagara tanga. Ma na Taroha Koro ngekê ka bani rongoa na enoni hato i maveta.

Na tagaraha iana o Paulo tanga na rotu

24Ma i ngekê inê kê vagevage renigi na mamasiaganiha tangagamu. Na mamasiaganiha iana o Kirisito i apeku ki mamênga, vi ge arari. Tahema inê kê vagevage, renia gê girara gê hagahatongia ki arari. Na mamasiaganiha iaku ngekê ki na mamasiaganiha tanga na apena o Kirisito: ngaia ki na haku na enoni, ga tongesuri. 25Ma God ki bani ateê, kê tagara tanga na haku na enoni, ga tongesuri, ma ki hagêguriê, kê katoa na tagaraha ngekê, hanana gê tamanigamu. Ngaia ki kasiê, kê tarohenia na tarohana hagenani. 26Na taroha ngekê ki na katoha, God i bani pinihi tenira na enoni hato, haganega me tenia i kere vê noga mataro me i ngekê. Ma i ngekê ngaia ki bani visia mataha tangara na kariana. 27Renia na obaniha iana God ki manga ikê: ngaia ki hagagirarara na kariana renia na katoha pinihi iana. Na katoha pinihi ngekê ki koro teha, ma ki bâkoro era, ma ki tangara na enoni hato i maveta. Ma na katoha pinihi ki manga ikê: o Kirisito ki oga i pasimi, i vi, vi ga page tarahugamu na ara ni marâ koro i pasina God. 28Tahema igami kami tarohenia o Kirisito tangara na enoni hato. Igami kami haganunura, ma kami hagesurira igê na ani ma vê na takotako mataha, God i bani vategami, renia igami kami obanira na enoni hato, vi ga korokoro ngavê nga, ma ka obâbahaku henia o Kirisito i maana God. 29Tahema inê kê tagara raha, ma kê togeaga, renia o Kirisito ki tamaniê renia na raramohana raha hunia, i tagara i pasiku.

Currently Selected:

KOLOSE 1: KCB

Highlight

Copy