MAREKO 8

O Jesu ki hagangêra na rehagaro ge he na enoni

(Mt 15.32-39)

1Ma hemuri ta na kakuta na enoni ka haku me nikâ. Bevoana i hato na ngêra tenira, o Jesu ki unira me na kariana, ma ki vi: 2“Inê kê takuira na enoni agê, renia ga bani oga me noga heniê surigi na tangiani gi oru, ma i na matena ikê ki hato na ngêra tenira. 3Manga vi inê, ma kê hagatorangenira aporo magamagêta, ngaira ka page memega i tara, suria tani na hitangita ka râ me hagatê.”

4Na kariana ka hagatea, ka vi: “Ma i he kaniga page tarahugi igê na ngêra, i ararira na enoni hato ngegana, hanana ga hagangêra renigi? Na manihê kani ikê!” 5O Jesu ki hagatera, ki vi: “Gi hita na bereti i pasimi?” Ngaira ka aramia, ka vi: “Gi pi.”

6Ngaia ki vi tangarana hakuta na enoni, ka oga so i ano. Ma ngaia ki têgi na bereti gi pi, ki rahesia God, ki pipigi na bereti, ma ki vatera na kariana, ka vutungira na enoni renigi. Ma na kariana ka kato manga i visia. 7Ma ka oga nikâ tani na kere siare. O Jesu ki rahesia God renigi, ma ki vi tangara na kariana, ka vutungira nikâ na enoni renigi. 8Ngaira hato na enoni ka ngê ma ka ngê masu. Ngaira haku na enoni, ga ngê, ngegê ka vora na rehagaro ge he vari. 9Ma hemuri na kariana ka hagavunusigi na heni gi pi renigi na apigani, ga hita râ. O Jesu ki hagatorangenira vê na enoni ka râ. 10Ma ngaia ma na kariana ka parama ma ka tage igê na kere haka, ma ka râ tanga ta apanena i Talamanuta.

Na Pariseo ka obania na mena

(Mt 16.1-4)

11Tani na Pariseo ka râ me, ma ka haganega ka mehetuguri o Jesu. Ngaira ka obania, vi ga uhungia. Vikê ngaira ka nungia, vi katoa na mena, hanana i hagatanga monari, renia vi God ki tamania. 12O Jesu ki manava so raha, ma ki vi: “Hega igamu na enoni i ngekê kanimu obania na mena? I monari, ve vi tangagamu: na mena ki mareha vi tangagamu igamu!” 13Ngaia ki panira, ki tage aporo igê na kere haka, ma ki haganega ki tarê i na apanena tarê na rano.

Na isiti iata na Pariseo mo Herote

(Mt 16.5-12)

14Na kariana ka bonotenia, vi ge toregi tani na bereti, ma ka nahunia na ani gi tage ma na bereti igê na kere haka. 15O Jesu ki vi tangara, ki vi: “Mu bâsigamu! Ma kamu hinarua na isiti iata na Pariseo ma na isiti iana o Herote.” 16Ngaira ka haganega ka hetamatamasi so mareta, ka vi: “Ngaia ki vi vikê, renia igia ka pe nahunia na bereti.”

17O Jesu ki girara na marâ, ngaira ka hetamatamasi renia. Tahema ngaia ki hagatera, ki vi: “Tanu hega kanimu hetamatamasi renia vi gamu pe nahunia na bereti? Mu pe girara vari? Se mu pe rongogirara vari? Mu bonobonoga vari? 18Ga pe bâbâ na maami? Ga pe rongorongo na karingami? Mu pe takusia vari, 19na matena gê pipigi na bereti gi rima tangara na rehagaro gi rima na enoni? Gi hita na heni kanimu hagavunusigi renigi na apigani, ga hita râ?” Ngaira ka arami ka vi: “Tangahuru matarerua.”

20Mo Jesu ki hagatera, ki vi: “Matena gê pipigi na bereti gi pi tangara na rehagaro ge he, gi hita na heni kanimu hagavunusigi renigi na apigani, ga hita râ?” Ngaira ka arami, ka vi: “Gi pi.” 21Ma ngaia ki hagatera, ki vi: “I hega, i mamênga vari, vi gamu rongorongogirara?”

O Jesu ki hagakomaga na mane i Betesaita i guru na maana

22Ngaira ka ata me i Betesaita, ma tani na enoni i ngekana ka merâ me tanga o Jesu ta na mane, i guru na maana, ma ka nungia, vi hataria. 23O Jesu ki here i rimana na mane, i guru na maana, ma ki urua vê tenia na hinua. Matena i musu hato igê na maana na mane, ngaia ki têbuhia, ma ki hagatea, ki vi: “Igo ko bâsia ta na marâ.” 24Na mane ki ahaukê ma ki vi: “Inê kê bâsira na enoni, ma ngaira ka bâ mangagi na apinige, ga arârâ.”

25Nikâ o Jesu ki têbuhirerua na maana na mane. Ma i ngekana na mane ki ono rapurapu, ma karu marava na maana, ma ki kahu bâbâ aporo. 26Mo Jesu ki hagatorangenia vê i ruma iana, ma ki hagapêpua, ki vi: “Siana ko aporo igê na hinua.”

Na tamasinga iana o Petero renia o Jesu

(Mt 16.13-20; Lk 9.18-21)

27Mo Jesu ma na kariana ka râ vê tangagi na hinua hagarangia i Sesarea Pilipi. Matena ngaira ka arâ i tara, ngaia ki hagatera, ki vi: “Visia me tangê! Manga na enoni, ma ka tamasiê ngaira ka visiê, vi o ti kani inê?” 28Ngaira ka arami, ka vi: “Tani ka visigo, vi o Joane Batisita. Ma tani ka visigo, vi o Elia. Ma tani nikâ ka visigo, vi igo kani tani na hitangita na poropete.” 29Ma ngaia ki hagatera, ki vi: “Megamu? Mu visiê, vi o ti kani inê?” O Petero ki arami, ki vi: “Igo ki na Mesaia.” 30Mo Jesu ki hagapêpura, ki vi: “Siana kamu hagarongoa rârâ ta na enoni reniê.”

O Jesu ki tamasi renigi na mamasiaganiha ma na mera iana

(Mt 16.21-28; Lk 9.22-27)

31Mo Jesu ki haganega ki hagesurira na kariana, ki vi: “O karena enoni ki tuguhia i page hatamia bâraha na mamasiaganiha, ma na meraha ma na mane ni vogasiha ga teha ma na mane ni hagesuringa ni rotu ka page usitenia. Ga page nahuia ki meme, ma igê na oruta na tangiana ngaia ki page mauri aporo.” 32Ngaia ki hagararingenia bâkoro era na tarana ngekê tangara na kariana. Tahema o Petero ki unia me, ma ki haganega ki ramonia. 33Mo Jesu ki ahoro me, ki bâsira na kariana, ma ki ramonia o Petero, ki vi: “Gu râ vê teniê, Satana. Igo ko pe tako suria na takoha iana God, ma igo ko tako suria ma na takoha iata na enoni!”

34Mo Jesu ki unira me na hakuta na enoni ma na kariana. Ma ngaia ki vi tangara, ki vi: “Manga ta na enoni, ma ki obania, vi arâ heniê, ki tuguhia, siana ki takusia so marena. Ngaia ki tuguhia, i torea na kuruse na mamasiaganiha iana, ma ki takuê. 35Suria manga na enoni, ma ki obania, vi hagatahia na mêrihana marena, ngaia ki page hagatasia. Ma ki manga na enoni, ma ki meme reniê inê, ma renia na taroha koro, ngaia ki hagatahia na mêrihana marena. 36Ata ni vi ma: manga na enoni, ma ki nahunia na maveta hagenani, ma ki hagatasia na mêrihana marena, ki hega, na ruruguha ngegê ka girara vari, vi ga tamania? Mareha vê! 37I mareha ngavê ta na marâ, hanana vi na enoni ke vuria aporo na mêrihana marena renia. 38Hoita, manga na enoni, ma ki ngariteniê ma ki ngaritenia na hagesuringa iaku i ngekê, matena na enoni ka pe tongesuria God ma ka era, ngaia o Karena Enoni ki page ngaritenia nogana, matena i page arâ me igê na raramohana o Vaemana henira na angero iana God.”

Currently Selected:

MAREKO 8: KCB

Highlight

Copy