MAREKO 7

Na tauhata na ai nago

(Mt 15.1-9)

1Na Pariseo ma tani na mane ni hagesuringa ni rotu ka râ me tenia i Jerusaleme ma ka hakuria o Jesu. 2Ngaira ka bâsira tani na kariana o Jesu, ga ngêngê renigi na rimata “i bera”: ngaia kani ngaira ka pe manuhigi na rimata suria na tauhata na Pariseo ka obania, vi na enoni ka arâ suria.

3Renia na Pariseo ma na Siu getera nikâ ka râ surigi na tauhata na êvarita: ngaira ka manuhigi i nago na rimata suria na tauha, me muri ma ka kahu ngêngê. 4Ma nikâ ngaira ka manuhigi i nago na ngêra, ga vurigi igê na makete, ma hemuri ma ka kahu ngêngê. Ma ngaira ka râ surigi rako na tauhata getigi na êvarita, manga na tauha tanga ga tananigi na kâkâ, apira, kuki ma na bea.

5Tahema na Pariseo ma na mane ni hagesuringa ni rotu ka hagatea o Jesu, ka vi: “Tanu hega na kariamu kaniga pe râ suria na tauhata na êvarika, ma ka ngêngê ma renigi na rimata ‘i bera’?”

6O Jesu ki aramira, ki vi: “O Isaia na poropete ki tamasigamu monari! Mu bagasusuka! Ngaia ki sege, ki vi:

‘God ki vi:

Na enoni ngegana ka rahesiê igê ma na tamasinga iata,

ma ka usi, vi ge râ surigi na ramata iaku.

7Ngaira ka rahesiê purua ma,

renia ga hagesuri renigi na ramata iata na enoni,

ma ka vi ma, vi na ramata iana God.’”

8Mo Jesu ki vi: “Igamu kamu bani kasigi na ramata iana God, ma kamu râ surigi na tauhata na enoni.”

9Mo Jesu ki vi nikâ, ki vi: “Aige! Mu girara bâkoro ngavê hanana vi gamu kasia na ramata iana God, ma kamu arâ surigi na hagesuringa iami maremi! 10Renia o Moise ki ramata, ki vi, ‘Takuirerua o vaemamu ma kenamu’, ma ‘Manga ta na enoni, ma ki visia bera o vaemana se kenana, ka nahuia nga ki meme.’ 11Ma igamu kamu vi, vi i koro ma, vi na enoni ki pe tamania o vaemana se kenana, 12manga vi nahunia ta na marâ, i araria, vi tamania o vaemana se kenana renia, ma ki vi ma, vi na marâ ngekana ki “Koba”, (i vi, na anina God ma). 13Manga ngekana, igamu kamu urusia na hagesuringa iana God renigi na tauha iata na enoni, mu hagatarêngenigi tangara na enoni getera. Ma kamu katogi rako na marâ getigi ga manga na ani ikana.”

Na marâ na enoni ga era renigi

(Mt 15.10-20)

14Mo Jesu ki unira me nikâ na hakuta na enoni, ma ki vi tangara, ki vi: “Igamu hato, mu karingê maninga! 15Na enoni i asa, vi ge era renia na marâ, i bêbanu i rarona na enoni. 16Mu karinga maninga, manga vi gamu girara mu rongorongo!”

17Matena ngaia i bani panira na hakuta na enoni ma ki bani banu i ruma, na kariana ka hagatea renia na maramaraveta ngekana. 18O Jesu ki vi tangara, ki vi: “Igamu kamu bonobonoga mangara na enoni getera! Mu pe rongogirara vari? I asa hage hagetage, vi ge era na enoni renia na marâ, i bêbanu i rarona na enoni, 19renia i mareha, vige banu igê na aitangihana na enoni, ma ki banu hete igê na bahurina, me muri ki hura me i boromarena.” (Manga ngekê o Jesu ki visia vi na ara ni ngêra ki koro ma ga ngêngê.)

20Ngaia ki visia nikâ vi: “Na enoni ki era renia na marâ, i huhura me tenia na enoni. 21Renia tenia na rarona, tenia na aitangihana na enoni ka huhura me igê na takoha era, ga katoa na enoni, ki paronga i era, ki hanago, ki henahu, 22ki gamogamo, ki hagatage, ma ki katogi na ani mavê na marâ era; ki hagahagaparu, ki tanu era, ki hengari, ki visira bera na enoni, ki paroparo, ma ki tanugi tare na marâ, ga pe koro. 23Na ara ni marâ hato ngegana ka huhura me tenia na aitangihana na enoni, ma ka katoa ki era na enoni renigi.”

Na tongesuriha iana ta na gete

(Mt 15.21-28)

24Mo Jesu ki râ, ma ki râ tange na hinua hagarangia na hinua raha i Taire. Ngaia ki banu i ruma, ma ki pe obania, vi ta na enoni ke girara, vi ngaia ki gâga i ngekana. Ma ki bara tanga, vi ge oga pinihi. 25Ki parama ta na gete, ma ki rongoa, vi o Jesu ki gâga i ngekana, ma ngaia ki râ me ma ki aba so i maana. Ka karena ki atataroga. 26Na gete ngekê ngaia ki na mahuara, i pasina kani i Penisia i Siria. Ngaia ki nungia o Jesu, vi paia hura na ataro era tenia ka karena. 27Mo Jesu ki arami, ki vi: “Naka kê hagangêra i nago na kare. I pe arari, vi ge tavogi na ngêra iata na kare ma ke kasikasi tangara na o.”

28Na gete ki arami, ki vi: “Mako, Araha! Ma na o i ruguhana na bea ka ngêgi na apigani na ngêra iata na kare!” 29Vikana o Jesu ki vi tanga, ki vi: “Renia na aramiha koro iamu gu aporo i pasimu; na ataro era ki bani hura tenia ka karemu.” 30Vikana ngaia ki aporo i pasina, ma ki bâsia igê na karena, i tâ igê na bea. Na ataro era ki bani hura monari tenia.

O Jesu ki hagakomaga na mane i bi ma ki pungu na karingana

31O Jesu ki panigi na hinua hagarangia i Taire, ma ki ritare i Sitone tanga na Rano i Galilea, suria na tara i Hinua Tangahuru. 32Tani na enoni ka merâ me na mane, i pungu na karingana ma ki bi, ma ka nungia o Jesu, vi têtêbuhia. 33Vikana o Jesu ki meura râ tenira na enoni, ma ki purenigi na kakêna igê na karingana na mane, ma ngaia ki musu, ma ki hataria na meana renia. 34Mo Jesu ki atakê, ma ki manava so raha, ma ki vi tanga na mane, ki vi: “Epata!”, i vi, “Tahataha!”

35Ki parama, ma karu tahataha na karingana na mane, ma ki marumu na meana, ma ki haganega ki tamasi bâkoro. 36Mo Jesu ki hagapêpura ngaira hato, vi siana ka tamasia rârâ tanga ta na enoni. Ngaia ki hagapêpura bâraha, ma ngaira ka ama ni tamasia ma. 37Ma ngaira hato, ga rongoa, ka konekone bâraha. Ngaira ka vi: “Na ara ni marâ hato i katogi ka koro era! Henaka ma na enoni, i pungu na karingata, ngaira ka kahu rongorongo, ma na enoni, ga bi, ngaira ka kahu tamasi!”

Currently Selected:

MAREKO 7: KCB

Highlight

Copy