MAREKO 5

O Jesu ki hagakomaga na mane atataroga

(Mt 8.28-34; Lk 8.26-39)

1Hoi, ngaira ka ata igê na apanena tarê na Rano i Galilea, igê na mako iata na Gerasene. 2Pusina ma i reke so me o Jesu i one tenia na kere haka, ma ta na mane ki râ me vurusia. Ngaia ki hura me tenigi na vaba, ga bêbagi nuni igê. 3Na mane ngekê ki atataroga, ma ki gâga igê na vaba, ga bêbagi nuni igê. I asa vê na enoni, ge girara, vi ge rakua renigi na seni. 4Hagarako ka bani rakugi na êgana ma na rimana, ma na ara ni mateni ngaia ki musigi ma na seni i rimana ma i êgana. Ngaia ki ramo teha ngavê ma ki asa na enoni, vi ge hagamanakoa. 5Na ara ni mateni, na tangiani ma na bungiani, ngaia ki arârâ surigi na vaba, ga bêbagi nuni igê, ma igê na hungani, ma ki ngerengere ki tapitapia so marena renigi na hê.

6Ngaia ki goga hagatê mênga, matena i bâsia o Jesu. Vikana ngaia ki tango me, ki aba so i maana o Jesu, 7ma ki ngere raha, ki vi: “Jesu, go Karena God raha teha! Na ta kanigo katoa tangê? Inê kê tohe pusigo renia God, vi siana ko hagaitangiê!” 8(Ngaia ki tamasi vikana, suria o Jesu ki vi tanga, ki vi: “Ataro era, hura me tenia o vani akê!”)

9Ngekana o Jesu ki hagatea, ki vi: “O ti na atamu?” Na mane ki arami, ki vi: “O rako ka na ataku: igami kami rako teha!” 10Ma ngaia ki ama ni nungia nga o Jesu, ki vivi: “Siana ko paira hura na ataro era tenia na agua ikê.”

11Na totoha raha ni bo ka oga, ka ngêngê hagarangi igê na apanena na kere hungana. 12Na ataro ka nungia o Jesu, ka vi: “Gu paigami hurira na bo, ma kami bêbanu i apeta.” 13Mo Jesu ki vi: “I koro ma.” Hoi, na ataro era ka hura tenia na mane, ma ka banu i apeta na bo. Na totoha hagenani ni bo, na bo na rehagaro gi rua vari, ka tango ka rere igê na apanena na suragina tanga na rano, ma ka tono ka me hato igê.

14Ma na mane, ga bâsurira na bo, ka gava, ma ka hagarongora rârâ na enoni surigi na hinua raha ma surigi na kere hinua sisite. Na enoni ka râ ka bâsia na tarana ngekana. 15Ngaira ka râ i pasina o Jesu, ma ka bâsia na mane, ga hura tenia rako na ataro. Ngaia ki oga so i ngekana, i hagesuru ma ki kahu takotako oto aporo. Ma ngaira hato ka magu. 16Na enoni, ga bâsia, ngaira ka hagarongora na enoni getera renia na mane, i atataroga ma renira na bo. 17Tahema ngaira ka vi tanga o Jesu, ki panigi na hinua iata.

18Matena o Jesu ki tage igê na kere haka, na mane, ga hura tenia na ataro ngegana, ki nungia o Jesu, ki vi: “Nakê be râ henigo.” 19Mo Jesu ki manimani, ma ki vi tanga, ki vi: “Gu aporo i pasimu tangara na ahemata iamu, ma ko hagarongora, renia vi manga i he na Araha ki koro tangago ma ki takuigo.” 20Ngekana na mane ki râ, ma ki râ suria hagenani na Hinua Tangahuru, ma ki hagarongora rârâ na enoni renia na tarana, i katoa o Jesu tanga; ma na enoni hato, ga rongoa, ka konekone teha ngavê.

Na karena o Jairo mo Jesu ki hagakomaga ta na gete

(Mt 9.18-26; Lk 8.40-56)

21O Jesu ki aporo tanga na apanena tarê na rano. Ma i ngekana, hagarangia na rano, na hakuta raha na enoni ka hakuria me. 22Ta na mane, i bâsuria na sukuru i ngekana, na atana ka no Jairo, ngaia ki râ me, ma na matena i bâsia o Jesu, ngaia ki surure i maana, 23ma ki togeaga igê na nunginungiha iana, ki vi: “Ka kareku sisite ki maeha bâraha. U râ me ma ko têbuhia, hanana ge komaga ma ke tahi.” 24Mo Jesu ki râ i pasina, ma ka rako era na enoni ga râ suria, ka hakuria ma ka heparapara renia.

25I pasita na enoni i ngekana ki oga ta na gete, i bani hatamia bâraha na mamasiaganiha, renia i têa na gapugapu raha surigi na harisi tangahuru matarerua, 26henaka ga rako na mane mangata, ga mangatea. Ma na ara ni haga iana ka hato, renia i vurira na mane mangata renigi, hanana vi ge komaga, ma ki mareha. Na mera ki ama ni akê raha ma me tanga. 27Ngaia ki bani rongoa na rongoha renia o Jesu, tahema ngaia ki râ me henira na enoni i murina o Jesu. 28Ngaia ki tako i parongana ki vi: “Manga gê hataria râ ma na tuguni iana, inê kê page komaga.”

29Ngaia ki hataria na tuguni iana o Jesu, ma na gapugapu raha ki parama ma ki hato tenia. 30Ki parama o Jesu ma ki girara, vi na raramohana ki bani tagara noga. Tahema ngaia ki ahoro râ tangara na enoni ma ki vi: “Ti kani hataria na tuguni iaku?” 31Na kariana ka arami, ka vi: “Bâsira na enoni, ga aruruhigo! Hega kanigo hagate ko vi, ‘Ti kani hatariê?’” 32Ma o Jesu ki ama ni bâ tatarê nga renira na enoni, suria i obania, vi bâsia, vi ka ti kani hataria. 33Na gete ki girara so vi komaga. Tahema ngaia ki râ me, i anumanuma ma ki magu, ma ki aba so i maana o Jesu, ma ki visigi na ara ni marâ hato, i bani katogi. 34O Jesu ki vi tanga, ki vi: “Kego, na tongesuriha iamu ki hagakomagago. U râ. Ku mauru koro. Na mera iamu ki hato.”

35Matena i tamasi mênga vikana o Jesu, tani na enoni ka râ me tenia na ruma iana o Jairo, ma ka hagarongoa o Jairo, ka vi: “Ka karemu ki me. Hega kanigo nungia mênga na Araha?”

36O Jesu ki pe tê ringeta, ma ki vi tanga o Jairo, ki vi: “Siana ko tako bâraha, ma ku tongesuriê ma hete!” 37Ma ngaia ki pe obania tani na enoni vi ge arâ suria, nga noga ma o Petero mo vahegoana o Jakobo mo Joane. 38Ngaira ka ata i ruma iata na mane, i bâsuria na ruma ni sukuru, mo Jesu ki bâsira na akêkuha ma ki rongora, ga angiangi ma ka angi maramara. 39Ngaia ki banu ma ki vi tangara na enoni, ki vi: “Na ta kanimu akuria? Mu angisia tanga na ta? Na kare ki mareha, vi ge me; ngaia ki mauru ma!” 40Ma ngaira hato ka rurusia. Ngekana o Jesu ki paira hura tenia na ruma, ma ki obanira ma o vaemana ma kenana na kare ma na kariana gi oru, vi ga bêbanu henia igê na kiboru, i tâ igê na gahuana na kare. 41Ngaia ki here i rimana, ma ki vi tanga, ki vi: “Talita kumi”, na girarana, “Kego, aharaga, gê vi tangago!” 42Ki parama ma ki aharaga, ma ki haganega ki rârâ. (Ngaia ki na harisi tangahuru matarerua iana.) Matena ga bâsia, ngaira ka kone teha ngavê. 43Mo Jesu ki hagapêpura, vi siana ka hagarongoa ta na enoni renia, ma ki vi: “Vatea ke ngê.”

Currently Selected:

MAREKO 5: KCB

Highlight

Copy