MAREKO 4

Na tamasinga maramaraveta renigi na maani na koni

(Mt 13.1-9; Lk 8.4-8)

1Mo Jesu ki haganega ki hagesurira na enoni igê na akerena na rano i Galilea. Ma suria na hakuta raha era na enoni ka hakuria me, o Jesu ki tage igê ta na kere haka ma ki oga so i rarona. Na kere haka ki guru ataha igê na rano, ma na hakuta na enoni ka ura i one i na akerena na rano. 2Ngaia ki tamasigi na tamasinga maramaraveta tangara na enoni, matena ki hagesurira renigi na marâ i rako, ma na matena i hagesurira, ngaia ki vi tangara, ki vi:

3“Mu rongo! Ta na mane ki râ ki tokorenigi na maani na koni. 4Ma na matena i tokorenigi na maani i mu, tani na maani ka vota i tara, ma na manu ka râ me ka ngêgi. 5Tani na maani ka vota igê na mako, i hêga ma ki bêratega. 6Ma na matena i ramo na arito, ngaigi ki mêgu na ahani ma ki hatani me rêrê, renia ga pe so maninga na vagani. 7Tani na maani ka vota i gupuni na tone. Na tone ka vavaka ma ka rubuhigi na maani, ma na maani ki mareha vi ge hungu. 8Ma tani na maani ka vota igê na mako koro, ma ka vavaka, ka akê, ma ka hungu: tani ka rako na guani, tani ka kere rako na gunani, ma tani ka rako ngavê na guani.” 9Mo Jesu ki vi: “Hoita, mu rongo, manga vi gamu girara mu rongorongo!”

Suria i hega ki na tamasinga maramaraveta

(Mt 13.10-17; Lk 8.9-10)

10Matena o Jesu i bani râ panira na hakuta na enoni, tani na enoni, ga bani rongoa o Jesu i tamasi, ngaira ka râ me tanga o Jesu henira na kariana tangahuru gi tage matarerua, ma ka hagatea renigi na girarani na tamasinga maramaraveta. 11O Jesu ki aramira, ki vi: “Igamu kamu bani girara mataha noga na obaniha iana God na Araha; ma na enoni getera, ga oga hura, ngaira ka rongogi na ara ni marâ renigi na tamasinga maramaraveta, 12hanana

‘Ngaira ka bâbâ ma ka pe bâgirara,

ka rongo ma ka pe rongogirara,

renia manga ga rongogirara,

ngaira ka page maatia God vari,

ma ngaia ki page bonotenigi na tasi iata.’”

Na girarana na maramaraveta renigi na maani na koni

(Mt 13.18-23; Lk 8.11-15)

13Mo Jesu ki hagatera, ki vi: “Manga igamu, ma kamu pe rongogirara na tamasinga maramaraveta ngekê, manga i he kani vigamu page rongorongogirara na ani mavê na tamasinga maramaraveta? 14Na mane i tokorenigi na maani na koni, ngaia ki manga na enoni, i tokorenia na taroha iana God. 15Ta na matena na taroha ki votavota i tara: ngaira ka na enoni, ga rongoa na taroha, ma pusina ma ga rongoa, ma Satana ki râ me ki torea vê na taroha panigi na aitangihata. 16Tani na enoni ka manga na maani, ga vota igê na mako, i hêga. Pusina ma ga rongoa na taroha, ma ngaira ka taua ma ka vagevage renia. 17Ma ki asa, vi ge tâ tonge igê na aitangihata ma ngaira ka page kasia. Ngekana pusina ma i tarahura na bagabevoana se na henahuita renia na taroha, ma ngaira ka kasia vê. 18Tani na enoni ka manga na maani, ga vota i gupuni na tone. Ngaira ka na enoni ga rongoa na taroha, 19ma ngaira ka takotako bâraha ma renigi na marâ ni maveta, ma ka vanasigi na ruruguha, ma ka tenigi rako na marâ getigi. Na marâ hato ngegana ka heboroge i obata, ma ka rubuhia na taroha, ma ngaira ki asa vige hungu. 20Ma tani na enoni ka manga na maani, ga vota igê na mako koro. Ngaira ka rongoa na taroha, ma ka têa bâkoro, ma ka hungu: tani ka rako na guani, tani ka kere rako na guani, ma tani ka rako ngavê na guani.”

Na laiti i ruguhana na apira

(Lk 8.16-18)

21Mo Jesu ki hagatera na enoni, ki vi: “Mu takusia vari, vi na enoni ka torea banu me na laiti ma ka naka i ruguhana na apira se i ruguhana na bea? Mareha! Ngaira ka naka na laiti igê na atohana na laiti. 22Na ara ni marâ, ga pinihi, ka page bâsigi, ma na ara ni marâ, ga buhigi, ka page gagatenigi. 23Hoita, mu karinga manga vigamu girara mu rongorongo!”

24Mo Jesu ki vi tangara nikâ, ki vi: “Mu takusia maninga na marâ, mu rongoa. Na marâ, mu katogi tangara na enoni getera, God ki page barugi aporo tangagamu henigi kê tani na marâ getigi. 25Ga page vatea akê nikâ ta na marâ tanga na mane, i bani nahunia noga ta na marâ; ma ki henaka na kere marâ, i sisite, ngaia ka page tavoa tenia na mane, i pe nahunia rârâ ta na marâ.”

Na maramaraveta renigi na maani na koni ga vavaka

26Mo Jesu ki vi nikâ, ki vi: “Na Arahanga iana God ki manga na mane, i tokorenigi na maani na koni igê na mu iana. 27Ngaia ki mêru suria na bungiana, ki rite i mavoraro, ma ki tagarahigi tani na kere marâ suria na tangiana, ma suria na matena ngekana na maani ka vavaka ma ka akê. Ma ngaia ki pe girara, vi tanu hega. 28Na mako ki katogi, ka akê na rauga ma ka hungu: hagenago ka bâgo me na apeni, ma hemuri na ahani, ma hemuri me nikâ na hunguni. 29Bevoana i mêa na mu, na mane ki râ ki reterete, renia ki na matena na harisi.”

Na maramaraveta renia na guana na suga

(Mt 13.31-32; Lk 13.18-19)

30O Jesu ki hagatera na enoni, ki vi: “Na Arahanga iana God ki bâ manga i he? I oga vari tani na maramaraveta, hanana vi ga hagararingenia igê? 31Ngaia ki manga na guana na suga. Na guana ngekê ki sisite era. Ta na mane ki torea ma ki hasia i mu. 32Ma hemuri ki akê ma ki raha era ma ki teharigi tani na apinige getigi. Ma ka bâgo na arani ka arubebe, ma na manu ka râ me ka bea igê ma ka rukuruku i mamarugana.”

33Matena o Jesu ki ateate renia na tarohana tangara na enoni, ngaia ki visigi rako na ani getigi na tamasinga maramaraveta ga manga na ani ngekê. Ngaia ki tamasi tangara ma renigi na marâ, ngaira ka girara ga rongorongogiraragi. 34Matena i tamasi tangara na enoni, ngaia ki tamasi igê na maramaraveta. Ma na matena i goga getea henira na kariana, ngaia ki hagararingenigi na ara ni marâ tangara.

O Jesu ki bonasia ki piova na rano

(Mt 8.23-27; Lk 8.22-25)

35I manurahi igê na tangiana ngekana o Jesu ki vi tangara na kariana, ki vi: “Ge tarê i na apanena tarê na rano.” 36Ngekana na kariana ka panira na hakuta na enoni, ma ka tage igê na kere haka, o Jesu ki bani goga i rarona, ma ka merâ. Ma tani na haka getigi ka tâ i ngekana nikâ. 37Ki parama, ma ki tarêheroga, ma na navo ka akêhia na kere haka, ma na kere haka ki haga ni vunu renia na ve. 38O Jesu ki tâ ki mauru i murina na haka, i bêrunga igê na bêbê. Na kariana ka hagaritea, ka vi: “Araha, go pe takusigami vari? Sugia ma mi meme!”

39O Jesu ki aharaga ma ki bonasia na roga, ki vi: “U manapu!” Ma ngaia ki vi tangagi na navo, ki vi: “Mu piova!” Ki hato na roga ma ki piova ngavê. 40Mo Jesu ki vi tangara na kariana, ki vi: “Hega mu magu bâraha? I mamênga, vi gamu tongesuriê vari?” 41Ma ngaira ka magu era, ma ka haganega ka hetamatamasi, ka vi: “E, vani akini noga? Henaka ma na roga ma na navo nikâ ngaira ka rongoa na tamasinga iana!”

Currently Selected:

MAREKO 4: KCB

Highlight

Copy