MATEO 22
22
Na maramaraveta renia na ngêra na hagataku
(Lk 14.13-24)
1O Jesu ki tamasi maramaraveta nikâ tangara na enoni. 2Ngaia ki vi: “Na Arahanga iana God ki manga na maneraha, i hagarêa na magotoha na hagataku tanga o karena. 3Ngaia ki hagatorangenira na kariana, ka râ ma ka guhira na enoni, i bani harora. Ma ngaira na enoni ka usi, vi ge râ me. 4Ngekana ngaia ki hagatorangenira nikâ tani na kariana, ma ki vi tangara, ki vi: ‘Mu vi tangara na enoni, gê bani harora, kamu vivi, vi na magotoha iaku ki bani nanê. Na puruka ni ngauha iaku ma na bêhâgata ka bani nahuira, ma na ara ni marâ ka bani nanê. Mu râ me tanga na ngêra na hagataku!’ 5Ma na enoni, ga bani harora, ka usi, ma ka bari suri ma na marâ iata. Tani ki râ i mu iana. Ma tani ki bâsuria na sitoa iana. 6Ma tani nikâ ka ranguira na kariana, ma ka ramusira ma ka nahuira ka me. 7Na maneraha ki mangariaga bâraha ma ki hagatorangenira na mane ni me iana, ka nahuira na enoni, ga nahuira na kariana, ma ka hagasuhia na hinua raha iata. 8Ma hemuri ngaia ki unira me na kariana, ma ki vi, ‘Na magotoha iaku tanga na hagataku ki nanê. Ma na enoni, gê bani harora, ki pe ararira, suria ngaira ka era. 9Vikana mu arâ i tara raha, ma kamu guhira na enoni hato, mu tarahura igê.’ 10Hoi, na kariana ka râ ma ka hagahakura na enoni hato, ga tarahura: na ani ga koro ma na ani ga era. Ma na oha, ga hagataku igê, ki vunu mamasuaga ngavê renira na enoni.
11“Na maneraha ki banu igê na oha, hanana i bâsira na enoni, i guhira. Ma ngaia ki bâsia ta na enoni, i pe tuguni renia na gahu, hanana vi ge marisina na hagataku. 12Na maneraha ki hagatea, ki vi: ‘Bamane, igo ko pe tuguni renia na gahu, hanana vi ge marisina na hagataku. Hega go banu me ikê?’ Ma na mane ki muni. 13Ma na maneraha ki vi tangara na kariana, ki vi, ‘Mu rakugi na rimana ma na êgana, ma kamu kasia hura i metara igê na roto hono. Ma i ngekana ngaia ki page angiangi ma ka page hengaki igê na rivona, renia i era na obana.’” 14Mo Jesu ki vi: “Ga guhira na ani ga rako, ma ka atera ma na ani, ga pe rako.”
Na hagatenga renia na vuriha ni takesi
(Mk 12.13-17; Lk 20.20-26)
15Na Pariseo ki râ ka hekarigi, renia vi manga i he kaniga uhungia o Jesu renigi na hagatenga. 16Ma hemuri ngaira ka hagatorangenira tani na kariata ma tani na kariana o Herote tanga o Jesu. Ngaira ka vi: “Araha, igami kami girara, igo ki mareha, vi gu hagahagaparu. Igo ko hagesurira bâkoro na enoni renigi na marâ, God i obanira na enoni, vi ga katogi, renia i pe marâ na apemu renigi na tamasinga iata na enoni, suria na parongamu ki tagenana ma tangara na ara ni enoni. 17Hoi, gu visia me tangagami na takotako iamu. I koro ma vari, surigi na Ramata iaka i na Buka Apuna, vi ga vuria na takesi tanga na Gavumane i Roma, se mareha?”
18O Jesu ki bani girara, vi ngaira ka obania, vi ga hagabekasia. Vikê ngaia ki vi: “Mu bagasusuka! Tanu hega kanimu uhungiê? 19Mu hagabâsiê renia na maana na haga, mu vuria takesi renia!” Ngaira ka hagabângenia tanga na maana na haga. 20Ma ngaia ki hagatera, ki vi: “Ti ka na nununa ma na atana igê na haga ikê?” 21Ngaira ka arami, ka vi: “Na anina na Gavumane i Roma!”
Ngekana o Jesu ki vi tangara, ki vi: “Hoita, mu vatea na Gavumane na anina na Gavumane, ma kamu vatea God na anina God.” 22Matena ngaira ka rongo vikê, ngaira ka konekone ma ka râ ahoro vê tenia.
Na hagatenga renia na mauriha aporo
(Mk 12.18-27; Lk 20.27-40)
23Igê na tangiana ngekana tani na Satuseo ka râ me tanga o Jesu. (Ngaira ka na enoni, ga vi, vi na enoni, ga me, ki asa, vi ge mêri aporo.) 24Ngaira ka vi: “Araha, o Moise ki hagesurigia, vi, ‘Manga na mane, ma ki pe apara kare ma ki meme, ki tuguhia o goana, vi auragia na gete, i me tenia, hanana vi garu apara kare tanga na mane, i me akana. 25Hoi, i nago i pasimami ka oga o vahegoata gi pi. Na mane i nago ki êragi, ma ngaia ki pe apara kare ma ki me. Ma ngekana o vesina ki êragia kehana i nâ. 26Na ruata na mane ki tagenana ma nika, i pe apara kare henia kehana, ma ki tagenana ma nikâ na oruta na mane ma ngaira hato o vahegoata gi pi. 27Ma hemuri na gete akana ki me. 28Hoi, igê na tangiana, ga mauri aporo igê na enoni, ga me, o ti kani kaniana? Suria ngaira hato kaniga bani êragia!”
29O Jesu ki aramira, ki vi: “Mu beka ngavê! Renia i hega? Suria igamu kamu pe girara na Buka Apuna, ma kamu pe girara, vi God ki raramohaga hunia. 30Suria na enoni, ga me, matena ga mauri aporo, ngaira ka mangara na angero i pasina God, ma ngaira na mane ma na gete ka pe êragi. 31Hoi, renia na mauriha aporo iata na enoni, ga me: mu pe bani tomania vari na marâ, God ki bani visia tangagamu i na Buka Apuna? Ngaia ki vi vikê: 32‘Inê nga kani na God iana o Abaramo, na God iana o Isako ma na God iana o Jakobo.’ Ki vivi, ngaia ki na God iata na enoni, ga mauri, ma ki mareha vê, vi na God iata na enoni, ga me.”
33Matena na enoni ka rongo vikana, ngaira ka konetenia ngavê na hagesuringa iana.
Na ramata na ani i teha
(Mk 12.28-34; Lk 10.25-28)
34Matena na Pariseo ka rongoa, vi o Jesu ki hagamunira na Satuseo, ngaira ka haku me. 35Ma na hitangita ki uhungia o Jesu renia na hagatenga. Ngaia ki na mane ni hagesuringa ni rotu. 36Ma ngaia ki hagatea o Jesu, ki vi: “Araha, na ani ta na ramata kani teha igê na Buka na Ramata?”
37O Jesu ki arami, ki vi: “Ki tuguhigo, go takuia na Araha God iamu i maurihamu hagenani.” 38Na ramata ngekê ki teha ma ki raha ngavê. 39Na ruata na ramata, i raha ngavê, ngaia ki manga ikê: ‘Ki tuguhigo, go takuira na enoni getera manga igo maremu.’ 40Na ramata gi rua ngegê ka na hunani na ara ni ramata hato iana o Moise ma na hagesuringa iata na poropete.”
Na hagatenga renia na Mesaia
(Mk 12.35-37; Lk 20.41-44)
41Matena na Pariseo ka haku me, o Jesu ki hagatera, ki vi: 42“Na ta ka na takotako iami renia na Mesaia? Na raraha iana o ti akana?” Ngaira ka arami, ka vi: “Na raraha iana o Tavite.”
43O Jesu ki hagate, ki vi: “Hoi, hega na Higona Apu kani hagatakusia o Tavite, ki visia o karena vi Araha? Suria o Tavite ki vi,
44‘Na Araha ki vi tanga na Araha iaku:
Gu oga so i otoku,
be vatego na arahanga
ma be nakago ku êguga
renira na merongamu.’
45Hoi, o Tavite ki visia vi Araha, ma ki tanu hega na Mesaia ki no karena o Tavite?”
46I asa vê ta na enoni, vi ge aramia o Jesu. Ma tenia i ngekana ki mareha rârâ ta na enoni, vi ge hagatea nikâ o Jesu.
Currently Selected:
MATEO 22: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
