MATEO 21

O Jesu ki banu i Jerusaleme

(Mk 11.1-11; Lk 19.28-40; Jn 12.12-19)

1Matena ga hagarangia Jerusaleme, ngaira ka ata i Betepage, igê na hungana ni Olive. Ma i ngekana o Jesu ki hagatorangenirerua igê na kariana gi rua, karu nanago. 2Ngaia ki vi tangarerua, ki vi: “Muru arâ igê na hinua ikana. Ma i ngekana igamurua kamuru page tarahua ototo râ nga igê na tonki ma na bêhâgana, ga barorerua. Muru rupasirerua ma kamuru ururerua me. 3Manga ta na enoni, ma ki hagategamurua renia ta na marâ, muru vi tanga, kamuru vivi, ‘Na Araha kani obanirerua.’ Ma ngaia ki page hagamarumungenirerua ototo râ nga tangagamurua.”

4Na tarana ngekê ki voravora me, hanana i hagamonaria na tamasinga iana na poropete, i vi:

5“Hagarongora na Ai ni hinua i Sione, kamu vivi,

‘Bâ, na maneraha iami ki râ me tangagamu.

Ngaia ki haritagi ma ki tagiria na tonki.

Ngaia ki tagiria na bêhâgana, na karena na tonki.’”

6Vikê na kariana gi rua karu nanago, ma karu katogi na marâ, o Jesu i bani visigi tangarerua. 7Ngairerua karu ururerua na tonki ma na bêhâgana, ma karu vatarangenigi na gahu iaterua i geriterua na tonki, mo Jesu ki oga igê. 8Rako era na enoni ka vatarangenigi na gahu iata igê na tara. 9Na enoni hato, ga nanago tarana o Jesu, ma na enoni hato, ga mumuria o Jesu, ka haganega ka ngerengere, ka vivi: “Ge visa raha o Karena Tavite! God ke kasia akê na urusiana na Araha! Ge visia raha God!”

10Matena o Jesu ki banu i Jerusaleme, na enoni hato i hinua raha ka heasiasi me tanga ma ka hagate, ka vi: “O ti ngekana?” 11Ma na enoni ka arami, ka vi: “Na poropete ngekana, o Jesu ni Nasarete i Galilea!”

O Jesu ki râ i Ruma ni Rotu

(Mk 11.15-19; Lk 19.45-48; Jn 2.13-22)

12O Jesu ki banu i Ruma ni Rotu, ma ki tarigenira hura na enoni hato, ga vurivuri ma ka hagavuri igê. Ngaia ki horogi vato na bea iata na mane, ga urisi haga, ma na âgâga iata na enoni, ga hagavuri kuvê. 13Ma ngaia ki vi tangara, ki vi: “Na ruma iaku ki na ruma tanga na nunginungiha, ma igamu kamu tanua ma renia vi na agua tangara na enoni hanago!”

14Na enoni, ga guru, ma na enoni, ga tavi, ka râ me tanga o Jesu i Ruma ni Rotu, ma ngaia ki rikira. 15Na mane ni vogasiha ga teha ma na mane ni hagesuringa ni rotu ka mangariaga, matena ga bâsigi na mena, i tanugi, ma na kare ka ngerengere raha, ka vivi: “Ge visia raha o Karena o Tavite!” 16Vikana ngaira ka vi tanga o Jesu, ka vi: “Go giraragi vari na marâ, ga visigi?”

Mo Jesu ki arami, ki vi: “Mako, gê giraragi. Ma igamu kamu pe girara vari na tamasinga i na Buka Apuna, i vi, ‘Go katora na kere kare ma na ani, ga sususu mênga, hanana ga visigo raha maninga nga?’” 17O Jesu ki panira ma ki hura vê tenia na hinua raha tanga i Betani ma ki mêru i ngekana.

O Jesu ma na apinige na fiki

(Mk 11.12-14, 20-24)

18Igê na tangiana i muri, matena o Jesu ki aporo i Jerusaleme, ngaia ki magê. 19Ngaia ki rigia na apinige na fiki i na akerena na tara. Ngaia ki râ tanga ma ki pe tarahugi na guani, nga noga ma na ahani. Vikana ngaia ki vi tanga na apinige, ki vi: “I hato iamu, vi gu page hungu!” Ma na apinige na fiki ki maria ototo râ nga.

20Na kariana ka rigia ma ka konetenia. Ngaira ka hagate, ka vi: “Tanu hega na apinige na fiki kani hatani maria râ?” 21O Jesu ki arami, ki vi: “Mu rongo! Manga igamu, ma kamu tongesuri gatagata ma kamu pe takotako tugupu i obami, igamu nogami kamu page girara, mu tanua na tarana, gê bani katoa râ i kini renia na apinige na fiki ikê; mareha vi nga noga ma manga ngekê, ma nikâ mu page girara mu bonasia na hungana ikê, kamu vivi, ‘Gu aharaga ma ko kasigo maremu i asi,’ ma ngaia ki têtê viteami. 22Manga igamu, ma kamu tongesuri maninga, igamu kamu page tavoa na ani mavê na marâ, mu nungia, matena mu nunginungi.”

Na hagatenga renia na raramohana o Jesu

(Mk 11.17-33; Lk 20.1-8)

23O Jesu ki aporo i Ruma ni Rotu. Ma na matena i hagesurira na enoni, na mane ni vogasiha ga teha ma na meraha i pasita na Siu ka râ me tanga o Jesu ma ka hagatea, ka vi: “Na ramoha ta kani go nahunigi, ko katogi renigi na tarani vigana? O ti kani vatego renigi na ramoha ngegana?” 24O Jesu ki aramira, ki vi: “Naka, be hagategamu nogaku renia na hagatenga gi tage ma, ma ki manga mu girara, ua, inê kê kahu visia tangagamu na ramoha ta kani gê nahunigi, kê katogi renigi na marâ ngegana. 25O ti kani vatea re o Joane na ramoha, ki hagabatesimo? God se na enoni?”

Ngaira ka haganega ka hehagateri so mareta, ka vi: “Na ta ke visia? Manga igia, ma ka vivi, vi ‘God’, ngaia ki page vi tangagia, ki vivi, ‘Hoi, tanu hega kanimu pe bani tongesuria o Joane?’ 26Ma ki manga igia, ma ka vivi, vi ‘Na enoni’, e, igia ka magutenira na enoni, suria na enoni hato ka tongesuria, vi o Joane ki poropete.” 27Vikê ngaira ka aramia o Jesu, ka vi: “Igami kami pe hagare.” Mo Jesu ki vi tangara, ki vi: “Hoi, inê nikâ, inê kê usi, vi ve visia tangagamu na ramoha gê nahunigi, kê katogi renigi na marâ ngegana.

Na maramaraveta renira o vahemata gi oru

28“Hoita, na ta kamu takusia? Ta na mane ki aparerua o karena gi rua. Ngaia ki râ ma ki vi tanga na mane, i vora hagenago, ki vi: ‘Kareku, i ngekê ko arâ ma ko tagara i mu ni vaini.’ 29Ma ngaia ki arami, ki vi: ‘Nê kê usi!’ Ma hemuri ngaia ki urisi parongana, ma ki râ ki tagara i mu ni vaini. 30Hemuri o vaematerua ki râ nikâ tanga na mane i muri, ma ki vi tanga vikana nikâ. Ma ngaia ki arami, ki vi: ‘Hoita, vaemaku!’ Ma ngaia ki pe râ. 31O ti na hitangiterua kani tê viteana o vaemana?” Ngaira ka arami, ka vi: “Na mane i nago.”

O Jesu ki vi tangara, ki vi: “Be vi tangagamu: na mane tora takesi ma na êrâ ka tê viteana God i nago tarami. 32Renia o Joane Batisita ki râ me, hanana i hagabâsigamu renia na tara i oto, ma igamu kamu usi, vi gamu tongesuria; nga noga ma na mane tora takesi ma na êrâ kaniga tongesuria. Henaka mu bani rigia na tarana ngekê, ma igamu ki mareha vi gamu urisi parongami, hanana vi gamu tongesuria.”

Na maramaraveta renira na enoni ga taharia na mu ni vaini

(Mk 12.1-12; Lk 20.9-19)

33O Jesu ki vi: “Mu rongoa nikâ tani na maramaraveta. Ta na mane ma ki nahunia na mako. Ngaia ki hasi igê na apinige na vaini. Ngaia ki pena rihia. Ngaia ki oparia na kiru, tanga i piringigi na guani na vaini igê na rusi, ma ki torea na bebetehe. Hemuri na enoni tagara ka taharia na mu ni vaini, ma ngaia ki pania na hinua iana ma ki râ i na marê getea. 34Ma na matena ga mata noga na guani na vaini, ngaia ki hagatorangenira na kare vurivuri iana tangara na enoni, ga taharia na mu ni vaini, hanana vi ga meratongani na vaini. 35Na enoni, ga taharia na mu ni vaini, ka ranguira na kare vurivuri iana: ka ramusia tani, ma ka nahuia tani ki me, ma ka arihahunia tani. 36Ngaia ki hagatorangenira nikâ tani na kare vurivuri, ga rako teharira i nago. Ma na mane, ga taharia na mu ni vaini, ka katora vikana nikâ. 37Ma ngaia ki hagatorangenia hagemuri o karena. Ngaia ki vi i obana, ki vi, ‘Inê kê girara, ngaira ka page hanetasia o kareku.’ 38Ma na matena na enoni, ga taharia na mu ni vaini, ka bâsia o karena, ngaira ka hetamatamasi, ka vi, ‘O karena na avanuna na mu ngekana! Nika, ge nahuia, ma ka nahunia igia na mu ni vaini!” 39Vikana ngaira ka ranguia, ma ka kasia hura tenia na mu ni vaini, ma ka nahuia ki me.”

40O Jesu ki hagate, ki vi: “Hoi, matena i arâ me igê na avanuna na mu ni vaini, na ta kani page katoa tangara na enoni, ga taharia na mu ngekê?” 41Ngaira ka arami, ka vi: “Ngaia ki page nanahuira na mane era ngegana, ma na enoni getera ka page taharia nogata na mu ni vaini iana. Ma ngaira ka page metongani renigi na vaini, matena ga matamata na guani.” 42O Jesu ki vi tangara, ki vi: “Mu pe bani tomania vari na marâ na Buka Apuna i visia? Na Buka Apuna ki vi,

‘Na u, ga usitenia na mane, ga torea na ruma,

suria ga vi ma, vi pe koro,

ngaia ki vora na u na rangata na hagêguringa.

Na tauhana na Araha, nga!

Igia ka konetenia teha ngavê.’”

43Mo Jesu ki vi: “Manga ngekê be vi tangagamu: ga page torea vê tenigamu na Arahanga iana God, ma ka page vatera na enoni, ga page taua maninga na viteana God. 44Na anima na enoni i tapasu igê na u ngekê, ngaia ki page babaro agani; manga vi na u, ma ki aihuhuria ta na enoni, na enoni ngekê ki page amenamena.”

45Na mane ni vogasiha ga teha ma na Pariseo ka rongogi na maramaraveta, o Jesu i visigi, ma ngaira ka girara, vi ngaia ki tamasi ririhu renira ngaira. 46Tahema ngaira ka uhungia, vi ga hagatotongoa. Ma ngaira ka magutenira na enoni, suria na enoni ka tongesuria, vi o Jesu ki na poropete.

Currently Selected:

MATEO 21: KCB

Highlight

Copy