MATEO 16

Na Pariseo ma na Satuseo ka obania na mena

(Mk 8.11-13; Lk 12.54-56)

1Tani na Pariseo ma na Satuseo ka arâ me tanga o Jesu. Ngaira ka obania, vi ga uhungia. Vikê ngaira ka nungia, vi katoa na mena, hanana vi hagatanga monari tangara, renia vi God kani tamania. 2Mo Jesu ki arami, ki vi: “Matena i susu noga na arito, igamu kamu vivi, ‘I gomaha ki page arito bâkoro, suria i sivosivoga na vavearo.’ 3Ma igê na mahogotana igamu kamu vivi, ‘I ngekê ki rangi, suria na vavearo ki sivosivoga ma ki rotoroto.’ Matena mu rigia na vavearo, igamu kamu girara, mu aitangisia na girarana na vavearo; ma igamu kamu pe girara, vigamu aitangisigi na girarani na mateni i ngegê.” 4Mo Jesu ki vi nikâ: “Igamu i ngekê kamu era ngavê, ma kamu pe tê viteana God! Mu obania na mena teniê iê? I asa vê! Nga noga ma na mena renia o Jona.” Ma ngekana ngaia ki panira so ki arâ tenira.

Na isiti na Pariseo ma na Satuseo

(Mk 8.14-21)

5Matena na kariana ka tage tarê igê na rano, ngaira ka bonotenia, vi ge toregi na bereti. 6O Jesu ki vi tangara, ki vi: “Mu bâsigamu! Mu hinarua na isiti iata na Pariseo ma na Satuseo.” 7Ngaira ka haganega ka hetamatamasi so mareta, ka vi: “Ngaia ki vi vikê, suria igia ka pe toregi na bereti.”

8O Jesu ki girara na marâ, ngaira ga hetamatamasi renia ngekana. Tahema ngaia ki hagatera, ki vi: “Tanu hega kani mu hetamatamasi so maremi, renia vi gamu pe nahunigi na bereti? Mu bagahagêguri!” 9I mênga, vi gamu rongorongogirara vari? Mu pe takusia vari nga na matena, gê pipigi igê na guani gi rua na bereti tangara na rehagaro gi rima na mane? Gi hita na heni nga gamu hagavunusigi? 10Ma ki hega na guani gi pi na bereti tangara na rehagaro gi he na mane? Gi hita na heni nga gamu hagavunusigi? 11Tanu hega kanimu pe rongogirara, vi inê kê pe tamasi renia na bereti? Mu hinarua na isiti iata na Pariseo ma na Satuseo!”

12Ma hemuri na kariana ka kahu rongogirara, vi ngaia ki pe bonasira, vi ge hinarua na isiti tanga na bereti, ma ki bonasira, vi ga hinarua hete na hagesuringa iata na Pariseo ma na Satuseo.

Na tamasinga iana o Petero renia o Jesu

(Mk 8.27-30; Lk 9.18-21)

13O Jesu ki râ i na apanena hagarangia na hinua i Sesarea Pilipi. Ma i ngekana ngaia ki hagatera igê na kariana, ki vi: “Na enoni ka visia, vi o ti ka no Karena Enoni?” 14Ngaira ka arami, ka vi: “Tani ka visia, vi o Joane Batisita. Tani ka visia, vi o Elia, ma tani nikâ ka visia, vi o Jeremia se ta na hitangita na poropete.”

15Ngaia ki hagatera, ki vi: “Megamu nogami, mu visiê, vi o ti kani inê?” 16O Simone Petero ki arami, ki vi: “Igo ki na Mesaia, o Karena God mamauri.”

17O Jesu ki arami, ki vi: “Simone, karena o Joane, igo ko babarisi ngavê! I mareha rârâ ta na enoni, vi ge hagarongogo renia na tamasinga mora vikana, ma God Vaemaku marena hete kani vatego na monariha ngekana. 18Manga ngekê, inê be vi tangago: igo ki na hê, Petero, ma igê na hê ngekê inê kê page torea igê na rotu iaku. Ma na mera ma Satana ki asa, vi garu page ramo teharia. 19Inê kê page vatego na ramoha, hanana go katora na enoni, ka têtê viteana God. Na marâ, go page manimanigi, God ki page manimanigi nogana; ma na marâ, go page hagamarumungenigi, God ki page hagamarumungenigi nogana.”

20Mo Jesu ki hagapêpura na kariana, vi siana ka hagarongoa ta na enoni renia, vi ngaia ki na Mesaia.

O Jesu ki tamasi renigi na mamasiaganiha ma na mera iana

(Mk 8.31, 9.1; Lk 9.22-27)

21Haganega tenia na matena i ngekê, o Jesu ki haganega, ki tamasi mataha tangara na kariana, ki vi: “I tuguhiê, gê arâ i Jerusaleme, ma na meraha ma na mane ni vogasiha ga teha ma na mane ni hagesuringa ni rotu ka page hagamamasiaga apeku ngavê. Ngaira ka page nahuiê kê meme. Ma igê na oruta na tangiana inê kê page mauri aporo.”

22Mo Petero ki unia me o Jesu ma ki haganega ki ramonia, ki vi: “E, siana, Araha! God siana ki katokato vikana! Siana hagetage ki voravora me tangago na tarana ngekana!” 23O Jesu ki maatia o Petero ma ki vi tanga, ki vi: “Gu râ vê teniê, Satana! Igo ko urabarasia na tara iaku. Na takotako iamu ki pe râ suria na katoha iana God, ma ki râ surigi ma na takotako iata na enoni!”

24Mo Jesu ki vi tangara na kariana, ki vi: “Manga ta na enoni, ma ki obania, vi voravora renia na kariaku, ki tuguhia, siana ki takusia so ma marena, ma ki torea hete na kuruse na mamasiaganiha iana, ma ki takuê. 25Renia i manga na enoni, ma ki obania, vi hagatahia na maurihana marena, ngaia ki page hagatasia. Ma ki manga na enoni, ma ki meme reniê inê, ngaia ki hagatahia na maurihana. 26Ata ni vi ma: i manga na enoni, ma ki nahunia na maveta hagenani, ki hega, na nahuninga ki girara i tamania, matena i meme? Mareha vê! I mareha ngavê ta na marâ, hanana vi na enoni ke vuria aporo renia na maurihana. 27Renia o Karena Enoni ki page arâ me henira na angero iana manga na Araha raha maratorana o Vaemana, ma igê na matena ngekana ngaia ki page vurira igê na ara ni enoni ararigi na parongata. 28Mu rongo! Gê vi tangagamu: ikê ka oga tani na enoni, ga page mauri rârâ, mataro me ka bâsia o Karena Enoni, i ramataga.

Currently Selected:

MATEO 16: KCB

Highlight

Copy