MATEO 15

Na tauhata na enoni i nago

(Mk 7.1-13)

1Ma hemuri tani na Pariseo ma na mane ni hagesuringa na rotu ka râ me tenia i Jerusaleme tanga o Jesu, ma ka hagatea, ka vi: 2“Tanu hega na kariamu kaniga pe râ suria na hagesuringa, na êvarika ga hagatarêngenia tangagia? Ngaira ka pe tanani maninga i nago na rimata ma ke kahu ngêngê!”

3O Jesu ki arami, ki vi: “Ma ki hega igamu nogami kanimu pe râ suria na ramata iana God, ma kamu râ suria ma na hagesuringa iami maremi? 4Renia God ki vi, ‘Kenamu ma vaemamu ko takuirerua,’ ma nikâ, ‘Manga ta na enoni, ma ki visia bera o vaemana se kenana, ka nanahuia nga ki meme.’ 5Ma na hagesuringa iami ki vi: manga ta na enoni, ma ki nahunia ta na marâ, hanana vi tamania o vaemana se kenana renia, ma ki visia, vi na marâ ngekana ki na anina God, 6i manga ngekana, igamu kamu visia, vi na enoni i koro ma vi pe takuia o vaemana. Igê na tarana ngekana igamu kamu pe râ suria na tamasinga iana God, hanana vi gamu arâ suria ma na hagesuringa iami maremi. 7Igamu kamu hagahagaparu! O Isaia na poropete ki vi monari renigamu, ki vi:

8‘God ki vi na enoni ngegê ka vi, vi ngaira ka rahesiê,

ma hete ga tamasi i harata ma

ma igê na aitangihata

ngaira ki asa ngavê vige takusiê.

9Ngaira ka rahesiê purua ma,

renia ngaira ka râ suria na hagesuringa

renigi na ramata iata na enoni,

ma ka vi ma, vi na ramata iana God.’”

Na marâ na enoni ka era renigi

(Mk 7.14-23)

10Mo Jesu ki unira me haku na enoni, ma ki vi tangara, ki vi: “Mu rongo ma kamu karinga maninga! 11I asa na enoni, vi ge era renia na marâ, i bêbanu i harana; ma na enoni ki era hete renia na marâ i huhura me tenia na harana.”

12Ma na kariana ka râ me tanga, ka vi: “Go girara, na Pariseo ka mangariaga renia na tarana, go visia?” 13O Jesu ki arami, ki vi: “Na ara ni apinige hato, God Vaemaku i pe hasigi, ka page ragaraga râ! 14Siana ki marâ na apemi renira! Ngaira ki guru na maata! Ma ki manga na mane, i guru, ma ki urua ta na mane, i guru nogana, ngairerua karu votavota igê na kiru.” 15O Petero ki tamasi, ki vi: “Gu visia me na girarana na maramaraveta ngekana.”

16O Jesu ki vi tangara, ki vi: “I hega, mu pe girara nogami? 17Mu pe rongogirara vari? Na ani mavê na marâ, i bêbanu i harana na enoni, ki arâ igê na bahurina, ma hemuri ki huhura i boromarena. 18Ma na marâ, ga huhura me tenia na harana na enoni, ka arâ me tenia na aitangihana, ma na enoni ki era renigi na marâ ngegana. 19Tenia na aitangihana ka arâ me na takoha era, ga katoa na enoni, ki nahunahu enoni, ki gamogamo, ki katogi na tarani getegi ga era, ki hanago, ki hagahagaparu, ki tamasi erasia na enoni. 20Na tarani ngegana kaniga katogi na enoni, ki aera. Ma ki manga na enoni, ma ki pe tanani i nago na rimana, matena i ngêngê, na tarana ngekana ki pe katoa na enoni, ke aera.”

Na tongesuriha iana ta na gete

(Mk 7.24-30)

21O Jesu ki pania na agua ngekana, ma ki râ vê i na apanena hagarangirerua na hinua raha i Taire me Sitone. 22Ma ta na gete ni Kanani, i goga i ngekana, ki râ me tanga, ma ki ngere, ki vi: “Araha, Karena o Tavite, gu takiê! Ka kareku ki atataroga, ma na tarana vikana ki era ngavê tanga.”

23Mo Jesu ki pe aramia rârâ. Na kariana ka arâ tanga o Jesu ma ka nungia nga, ka vi: “Gu naka vê ke râ! Suria ngaia ki mumurigia ma ki ngerigia!” 24Mo Jesu ki arami, ki vi: “Inê ka hagatorangeniê, hanana vi gê hagatahira ma na enoni i pasita na ai ni Isiraele, ga tasi mangara na sipi, ga tarupe.”

25Matena na gete ki rongo vikana, ngaia ki guru me ma ki aba so i maana o Jesu, ma ki vi: “Araha, gu tamaniê!” 26O Jesu ki arami, ki vi: “I pe arari, vi ge tavogi na ngêra iata na kare, ma ke kasikasi tangara na o.”

27Na gete ki arami, ki vi: “Mako, Araha! Ma na o ka ngaugi na apigani na ngêra, ga votavota so tenia na bea iata na avanuta.” 28Vikê o Jesu ki aramia, ki vi: “Igo ki na gete go tongesuri gatagata! I voravora me tangago na marâ, go obania.” Ma igê nga na matena ngekana ka karena ki komaga aporo.

O Jesu ki rikira rako na enoni

29O Jesu ki pania na agua ngekana, ma ki ritare i one igê na Rano ni Galilea. Ngaia ki tagere igê na kere hungana, ma ki oga so igê. 30Rako era na enoni ka arâ me tanga. Ngaira ka merarâ me na enoni ga tavi, ma na enoni i guru na maata, na enoni i era na êgata, na enoni ga bi, ma rako era na enoni getera, ga maeha. Ngaira ka kasira so i maana o Jesu. Ma ngaia ki rikira. 31Na enoni ka konekone bâraha, matena ga bâsira na enoni ga bi, ga tamasi, ma ka komaga aporo na enoni, i era na êgata; ma na enoni, ga tavi, ka arârâ; ma ki marava aporo na maata na enoni, ga guru. Ngaira ka visia raha na God iata na Isiraelita.

O Jesu ki hagangêra tani na rehagaro na enoni

(Mk 8.1-10)

32O Jesu ki unira me na kariana, ma ki vi: “Inê kê takuira bâraha na enoni igê, suria ngaira ka bani oga heniê surigi noga na tangiani gi oru, ma i na matena ngekê ki hato na ngêra tenira. Inê kê usi, vi ve hagatorangenira aporo magamagêta, i era ma ka memega i tara tangagi na hinua iata.” 33Na kariana ka hagatea, ka vi: “Se, ma i he kaniga page tarahua igê na ngêra, i ararira na hakuta raha na enoni ngegê? Na manihê kani ikê!”

34O Jesu ki hagatera, ki vi: “Gi hita na guani na bereti i pasimi?” Ngaira ka arami, ka vi: “Gi pi, ma tani na kere siare nikâ.”

35O Jesu ki bonasira na hakuta na enoni, ka oga so hatara i ano. 36Ma hemuri ngaia ki têgi na guani gi pi na bereti ma na siare. Ngaia ki rahesia God, ki pipigi na bereti, ma ki vatera na kariana, ma na kariana ka vutungira na enoni renigi. 37Na enoni hato ka ngê masu. Ma na kariana ka hagavunusigi na heni gi pi renigi na ngêra, ga hagahitagi na enoni. 38Na mane hato, ga ngê, ka vora na rehagaro gi he, ma na gete ma na kare ka pe tomanira banu me.

39Ma hemuri o Jesu ki hagatorangenira aporo vê na enoni, ma ki tage igê na kere haka, ki râ tanga na apanena i Magatana.

Currently Selected:

MATEO 15: KCB

Highlight

Copy