MATEO 14

I me o Joane Batisita

(Mk 6.14-29; Lk 9.7-9)

1I na matena ngekana o Herote, i marungia i Galilea, ki rongo tarohana o Jesu. 2Ngaia ki vi tangara na kariana, ki vi: “Ngaia monari ka no Joane Batisita, i mêri aporo. Tahema na ramoha ngegana ka angaria.”

3O Herote ki bani bonasira na mane ni me iana ka rakua o Joane ma ka hagatotongoa ma ka kasia igê na ruma ni hagaitangiha. Ngaia ki kato vikana suria ka Herotia, ka na gete iana o Pilipo o vesina. 4O Joane Batisita ki ama ni vi nga tanga o Herote, ki vivi: “Igo ki apu tangago, vi gu êragia na gete ngekê!” 5O Herote ki obania, vi nahuia, ma ngaia ki magutenira na Siu, suria ngaira ka takusia, vi o Joane ki na poropete.

6Igê na tangiana iana o Herote i vora igê, ka karena ka Herotia ki mâ tangara na enoni, ga haku tanga na magotoha. O Herote ki koro ngavê na obana. 7Tahema ngaia ki suru tanga, ki vi: “Inê kê tohe, gê page vatego na ani mavê na marâ, go nungia!” 8Ma suria na obaniha iana kenana, tahema ngaia ki nungi, ki vi: “Gu vateê ototo me i ngekê na bêna o Joane Batisita igê na apira!”

9Na maneraha ki hata era na obana, ma suria ngaia ki bani suru, ki tohe i maata na enoni hato, ga magoto, ngaia ki bonasira na mane ni me iana, ka vatea na marâ, i nungia. 10Ngekana na mane ni me ka râ i ruma ni hagaitangiha ma ka retea râ na bêna o Joane. 11Ngaira ka torea me na bêna igê na apira, ma ka vatea na kere gete, ma na kere gete ki torea râ tanga kenana. 12Ma na kariana o Joane ka râ me ka torea na gahuana o Joane ma ka bagia. Ma hemuri ngaira ka râ ma ka hagarongoa o Jesu renia.

O Jesu ki hagangêra tani na rehagaro na enoni

(Mk 6.30-44; Lk 9.10-17; Jn 6.1-14)

13Matena o Jesu ki rongoa na gasuga vikana, ngaia ki tage igê na kere haka ma ki râ pania na agua ngekana, ma ki râ tanga na tênga, ngaia getea. Na enoni ka rongoa, vi râ, ma ngaira ka tavoraha tenigi na hinua iata, ma ka hatare râ suria. 14Matena o Jesu ki goto vê i one, ngaia ki bâsira rako era na enoni, ga bani ata, ka oga karia. Ma ngaia ki takuira nga vê, ma ki rikira na hitangita ga maeha.

15Igê na manurahi na kariana ka râ me tanga o Jesu ma ka vi: “I bungi noga, ma na agua ikê nikâ ki na tênga. Gu hagatorangenira aporo nenuni, ma ku nakara vê, ke râ i hinua ke vuri na ngauha tangara mareta.”

16O Jesu ki arami, ki vi: “Ngaira ki pe ararira, vi ge arâ. Igamu maremi mu hagangêra.” 17Ngaira ka arami, ka vi: “Igami kami nahunigi ma na guani gi rima ma na bereti ma na siare gi rua.”

18O Jesu ki vi: “Mu toregi me ikê tangê!” 19Ngaia ki bonasira na enoni, ka oga so harahara igê na go. Ma hemuri ngaia ki têgi na guani gi rima na bereti ma na siare gi rua. Ngaia ki atakê i vavearo ma ki rahesia God. Ngaia ki pipigi na bereti ma ki vatera na kariana, ma na kariana ka vutungira na enoni renigi. 20Na enoni hato ka ngê masu. Ma hemuri na kariana ka hagavunusigi na heni tangahuru matarerua renigi na ngêra, ga hagahitagi na enoni. 21Na mane hato, ga ngê, ka vora na rehagaro gi rima, ma na gete ma na kere kare ka pe tomanira banu me.

O Jesu ki râ i basina na rano

(Mk 6.45-52; Jn 6.15-21)

22Hemuri o Jesu ki vi tangara na kariana, ka tage igê na kere haka ma ka nanago tarana tanga na apanena tarê na rano. Matena ga râ, ngaia ki hagatorangenira vê na enoni ka aporo. 23Matena i hagatorangenira vê ka râ, ngaia ki tagere getea igê na kere hungana, hanana vi nunginungi. Matena i bungi me, o Jesu, ngaia getea ma, kani oga i ngekana. 24I na matena ngekana na kere haka ki bani gupu râ igê na rano. Na navo ka hitaria bâraha na kere haka, renia i tora i matota na roga.

25Matena i tangi ki arâ, o Jesu ki râ tangara, i râ i basina na rano. 26Matena na kariana ka bâsia, i arâ i basina na rano, ngaira ka magu teha vê. Ngaira ka ngere, suria ga magu, ma ka vi: “E, na ataro!”

27Mo Jesu ki tamasi ototo râ tangara, ki vi: “E, inê nga ngekê! Ke bê! Siana kamu magu!” 28Mo Petero ki tamasi, ki vi: “Araha, manga vi igo monari, hoi, gu bonasiê, be râ vê tangago i basina na rano.”

29O Jesu ki arami, ki vi: “Gu râ me! Ngekana o Petero ki reke so tenia na kere haka, ma ki haganega ki râ i basina na rano tanga o Jesu. 30Matena i rigia na roga, ngaia ki magu, ma ki haganega ki kumu so igê na rano. Ngaia ki ngere, ki vi: “Araha, gu hagatahiê!”

31Mo Jesu ki tagara ototo râ ki têa, ma ki vi: “Go bagahagêguri! Tanu hega kanigo tako tugupu?” 32Ngairerua karu akê aporo igê na kere haka, ma na roga ki so. 33Na kariana, ga oga igê na kere haka, ka bêtuhia o Jesu. Ngaira ka vi: “I monari, igo ki no Karena God!”

O Jesu ki rikira na enoni i Senesarete ga maeha

(Mk 6.53-56)

34Ngaira ka tage tarê igê na rano ma ka goto i Senesarete. 35Na enoni i ngekana ka bâgirara o Jesu. Vikana ngaira ka kasi tamasinga tangara na hinua hato i na apanena i ngekana, hanana vi na enoni ka torera me tanga o Jesu na enoni, ga maeha. 36Ngaira ka nungia, hanana vi hagamarumungenira na enoni, ga maeha, ka hataria na bogona na tuguni iana. Ma na enoni hato, ga hataria, ka komaga aporo renia.

Currently Selected:

MATEO 14: KCB

Highlight

Copy