NUNGINUNGIHA IANA O MANASE 1
1
Na nunginungiha
1Araha raramohaga hunigo, God iata na êvarimami,
God iata o Abarahamo, o Isako mo Jakobo,
God iata na raraha iata, ga hagakoro obamu.
2Igo ko hagavoragi na ano ma na vavearo
ma na ara ni marâ hato henigi na bâkorohani igê.
3Igo ko bonasia na asi ma ngaia ki tê viteamu
ma ki pe vunu ahaharê.
Igo ko nakagi na rutuni na asi
ka oga tonge igê na atohani,
suria igo ko raramohaga hunigo
ma ki rongo raha na atamu.
4Matena go hagabângenia na raramohamu raha,
na ara ni marâ hato go hagavorara, ka tatata.
5Na bâbâhamu raha ki hagamamagutaga ngavê
ma na mangariaganiha iamu
ki nahuira ngavê na enoni tasi.
6Na takoruguana go surua ki raha teha,
hanana vigami aitangisia se vigami hagararingenia.
7Igo ko Araha raha teha ngavê.
I mareha rârâ tani vige maratoramu.
Igo ko piringiape, ko haritagi ma ko hetaki.
Matena mi mamasiaga meni na bagaparongamami,
igo ko hagamahagagami.
Araha, igê na korohamu ma na takoruguana iamu
igo ko surugi na bonoteniha ni tasi ma na tahinga
tangara na ani ga angitenigi na bagatauhata
ma ka urisi parongata.
8Igo nga Araha ka na God iata na enoni ga hagakoro obamu.
Igo ko pe hagaitangira o Abarahamo, o Isako mo Jakobo
meni na bagaparongata,
suria ngaira ka pe murisigego.
Ma tangê inê na enoni tasi
igo ko hagaitangiê meni na tasi iaku.
9Na tasi iaku ka rako teharigi na one i one.
Ngaigi ki rako teha ngavê, Araha, rako teha ngavê!
Inê kê bani bagatauhaku me teha ngavê.
Tahema ki pe arariê, vi ve ahaukê be maatigo.
10Na higahigani na tasi iaku ka piringi menamenariê.
Inê kê tukuê so renia na seni na aiani i higeê.
Inê kê pe manava taraku rârâ,
suria gê hagamangarigo.
Inê kê hagêrasigi na nunuta na ataro i na ara ni agua.
Inê kê katogi na tarani go usitenigi ngavê.
11Ma i ngekê inê kê tangahuriê
kê susure ma kê tubê so i ano,
ma kê nungigo, hanana vigo takotako rugu reniê.
12Araha, inê kê tasi, ma kê haritohego.
Inê kê ranganigi na bagatauhaku.
13Araha, inê kê nungigo ma kê avarasigo.
Gu bonotenigi na tasi iaku ma na bagatauhaku.
Siana ko hagamesiê renigi na bagaparongaku.
Siana ko mangariaga tare tangê,
se vigu ama ni nakagi nga na hagaitangiha tangê.
Siana ko suriê kê arâ igê na agua iata na enoni ga me,
suria igo Araha, ko bonotenigi na tasi
iata na ani ga angitenigi maninga.
14Gu takuiê, ku korokoro tangê ma ku hagatahiê,
henaka vi ga pe arari tangê.
15Ma hemuri inê be ama ni hagarahasigo nga
suria na ogaha hagenani iaku.
Na ara ni marâ hato ga tonga na raramohata i vavearo
ka kirigo ka hagarahasigo.
Na bâbâhamu raha ki asa vige page hato.
Monari!
Currently Selected:
NUNGINUNGIHA IANA O MANASE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific