2 ESETARASE 16
16
1Igamu, i Babilonia, i Asia, i Esipito ma i Siria, igamu ki asa ngavê vigamu tahi! 2Mu hagesuru nga renigi na gahu na angiha maramara, na tarisigani na gahu, ma na gahu na varehuta na goti. Mu angiangi nga ma kamu angisira na karemi, suria na aruhuruhunga ki sugia ma noga. 3Inê be kuasigamu renigi na hearihatana ma ki bara ta na enoni vige ura hagabarasia. 4Inê be kuasigamu renia na gi ma ki asa ta na enoni vige hunuia. 5Inê be kuasigamu renigi na bagabevoani ma ki bara ta na enoni vige hagabarasigi. 6I hega, ta na enoni vari ki girara vi rêra hagabarasia na laione i magê igê na vapuna, se vige hunuia na gi i tangatanga igê na go maria, 7se vige pariria bê aporo na mage, i hanetania me na mane ramo ni hananiha? 8Manga na Araha God ma ki kasia ki arâ na bagabevoana, ki bara ta na enoni vige okea bê aporo me. 9I asa ta na enoni ge girara vige gavagavatenigi na anguruna na mangariaganiha iana na Araha. 10Matena na Araha ki kasia na marangeia na ara ni enoni ka tatata. Matena i akurua raha, na enoni hato ka magu. 11Matena na Araha ki hagatavatava, na enoni hato ka apuri so i maana. 12Na gatani na maveta ka angingi. Na aripo igê na rutuni na asi ki ramoramo ngavê. Na ega i asi ka heraonge nogata, matena na Araha i hagabângenia na raramohana hahanetaga. 13Ngaia ki manga na mane ramo ni hananiha, i roroa na epage renia na rimana ramo i otona. Na mage iana ka masi ma ka pe atatara rârâ, matena ga gaha ka arâ tanga na agua i maveta ga hitahita igê. 14Ngaia ki bani hanatenigi noga na bagabevoani iana tanga na maveta ma ngaigi ki asa vige atarahigi na agua tange. 15Na gi ki bani tanga ma ki asa vige meme mataro me ki hagamakakagi na gatani na maveta. 16Na bagabevoani ka gaha noga tanga na maveta, ma ki asa ta na enoni vige paririgi bê aporo manga na mage i hanatenia na mane ramo ni hananiha.
17Inê kê hatohato! Inê ki asa be tahi. Ti kani page hagatahiê igê na tangiani ngegana? 18Na mamasiaganiha ka page râ me ma na enoni rako ka page gegege. Na magêha ki page râ me ma na enoni rako ka page mesi magêha. Na hearihatani ka page arâ me ma na enoni ga nahuni ramoha i maveta ka page tatata. Na bagabevoani ka page arâ me ma na enoni hato ka page bubununuga. Na enoni ka page katokato manga i he, matena ga arâ me na bagabevoani? 19Na magêha, na ringa, na bagabevoani ma na mamasiaganiha ka page arâ me, hanana ga hagaitangira ma ka hagaotora na enoni. 20Henaka, ma ngaira ka usi vige murisigegi na tasi iata. Ngaira ka hatani bonotenia râ na hagaitangiha i tarahura. 21I page arâ me na matena, ga gahugahu igê na ngêra. Vikana na enoni ka page takusia, vi na matena ni marapeha ma ni ramana ki bani râ me noga. Ma hete na bagabevoani kaniga page akê me i na ara ni agua: na hearihatani, na magêha ma na bagatatakoana raha. 22Rako na enoni i maveta ka page mesi magêha, ma na ani ga pe mesi magêha, ka page meme igê na hearihatana. 23Ga page kasigi râ na gahuata mangagi na roro ma ki asa vige page hita so tani, hanana vige hagareko parongata na ani ga tahitahi mêngara. Na maveta ki page hihiruga ma na hinua igê ka page ahogehoge. 24I mareha rârâ ta na enoni vige hitahita so, hanana vige tagara i mu se vige hasihasi. 25Na apinige ni ngêra ka page hunguhungu, ma ki mareha ta na enoni vige hitahita so, hanana vige husihusi. 26Na guani na vaini ka page matamata ma ki mareha rârâ vige hitahita so ta na enoni, hanana vige tagarahia na vaini renigi. Na maveta hagenani ki page hihirugaga. 27Na enoni ki asa vige bâsiraheri se vige herongogi. 28Igê na hinua raha hagenani na tangahuru gi tage ma na enoni kaniga page tahitahi, ma tenira na ani ga oga tarege râ tenigi na hinua na vererua ma na enoni kanigaru page tahi, suria garu ahiahi igê na vapuni se igê na vaba. 29Matena ga husihusi na pariki ni olive, ka page nakagi vê na guani gi oru se ge he surigi na arani na apinige ni olive. 30Matena ga husihusi na pariki ni vaini, ka page nakagi vê ta na kere parani, henaka vi ngaira ka bâbâ maninga renigi. 31Igê na tangiani ngegana ki page manga ngekana. Na mane ni me, ga garigari i ruma, hanana viga mutera na ara ni enoni hato igê, ngaira ka page tihira na vereoru se na verehe. 32Na agua ki page baguru. Na mu ka page gogoraga renigi na rauga kakaruga. Na tara, na ani raha ma na ani sisite, ka page masigu renigi na rauga ma na tone, suria ga page mareha na sipi hanana vige ngaugi. 33Na kare viru ka page angiangi maramara, suria ga mareha rârâ na mane hanana vige auragira. Na gete êragi ka page angiangi maramara, suria ga têtara renira o vaniata. Na kere gete ka page angiangi maramara, suria i mareha rârâ ta na enoni hanana vige tamanira. 34Na mane na gapu haoru hato ka page meme igê na hearihatana, ma na mane êragi hato ka page mesi magêha.
Na kariana God ka nanêa nga na hagahato tangiani
35Hoita, igamu na enoni mu totosuria na Araha, mu karinga nga na tamasinga iaku. 36Ngaia ki na tamasinga iana na Araha, mareha vi inê mareku. Vikana mu aganaria ma kamu tongesuria na tamasinga iana. 37Na bagabevoani ka hatani hagarangi me noga ma ki asa vige hagarihu. 38Na gete, i obara ki hatohato hurira na hageha gi siva, ngaia ki harahara vari surigi tani na pepe ni rito ma na matena nga tanga i apara igê, ngaia ki asa vige kakaviaga. 39I tagenani ma na bagabevoani ga page tarahua na maveta. Ngaigi ki asa vige kakaviaga, ma na maveta ki page gegege, matena i harahara manga na gete i harate kare.
40Kariaku, mu têtê viteaku ma kamu nanê tanga na hearihatana. Matena ga akê me na bagabevoani, mu gâga nga manga vi igamu ka na mahuara i maveta ikê, i mareha vi i pasimi. 41-42Na enoni ni hagavuringa, siana ka takusia viga hagavarahagi na haga. Ngaira ki tuguhira hete viga nanê ka gavagava tange na manavata. Na enoni ni vuriha ki tuguhira, ga takusia vi ngaira ka page têtara renigi na marâ ga vurigi. Na enoni i tagarahia na ruma, siana ki takusia vi ngaia ki page gâga igê. 43Na enoni ga tagara i mu siana ka takusia, vi ngaira ka page ngaugi na mu iata, se viga husihusi na guani na vaini. 44Na enoni ga êragi haoru, siana ka takusia viga page apara kare, ma na ani ga pe êragi rârâ ki tuguhira viga gâga mangara na nâ. 45Na ara ni tarani mu page katogi, igamu kamu page katogi hagaborâ ma. 46Na enoni mahuara ka page ngaugi na mu, ka page hanagogi na ruruguha, ka page hogegi na ruma ma ka page henahuraura na kare ka voravora re na kare rakuraku. Na enoni ga bani apara kare, ngaira ka page marupera na kareta, hanana viga voravora re na kare vurivuri, se hanana viga mesi magêha. 47Na enoni ga hagavarahagi na haga, ngaira ka page nahunigi ma tanga ga hanagogi tenira. Na enoni ga ama ni rurugugi nga na nahuninga, ngaira ka page ka ama ni kasikasi nga renigi na hinua ma na ruma iata ma ka ama ni maningaira mareta nga viga bâkoro. 48Na tarani ngegana ka ama ni hagamangaria nga na Araha, ma na Araha ki ama ni mangariaga nga tangara renigi na tasi iata. Na Araha kani vi vikana. 49Na gete i gâga suri parongana ngaia ki ruhia na êrâ. 50I tagenana ma na ogaha i hagakoro obana God, ngaia ki ruhia na ogaha ni tasi, henaka vi ngaia ki bâbâ hagamarâ ape. Na ogaha i hagakoro obana God ki page rangania na ara ni tasi i maveta ma ki page tamasi râ i maana vi ngaia ki erataga, igê na matena i page arâ me igê na Araha, i panepane henia. 51Manga ngekana siana kamu amake surigi na ogaha ni tasi se vi surigi na tauhana, 52suria na Araha ki sugi sinoa râ na ogaha ni tasi tenia na maveta, ma na ogaha i hagakoro obana God ki page aharêsigia ngavê.
53Na enoni tasi siana ka hagaiga vi ngaira ka pe tasi. Na enoni ga vi, vi ngaira ka pe bani haritohea God na Araha, ngaira ka hagarateta mareta renia na makiha raha. 54Na Araha ki giraragi nga na ara ni tauhata hato na enoni. Ngaia ki giraragi na katoha iata ma na aitangihata. 55Matena na Araha ki vi, “Ge vora me na maveta”, ma ngaia ki vora me. Matena i vi, “Ge vora me na vavearo”, ma ngaia ki vora me nogana. 56Ngaia ki bonasira na higu, ma ngaira ka oga igê na atohata, ma ngaia ki giraragi vi gi hita kani ngaigi. 57Ngaia ki girara na ani i rutuni ngavê renigi na rutuni i asi henigi na ruruguha igê. Ngaia ki bani aitangisia ngavê na asi henigi na marâ hato igê. 58Ngaia ki tamasi ma na asi ki oga igê na atohana ma ki naka na maveta igê na basina na asi. 59Na Araha ki gasia na vavearo ma ki hagagatagatania i avorana na ve manga na ruma buni. 60Ngaia ki nakagi na ve banga igê na bagamasusu raha ma na rano igê na barani, hanana na ve ka gogogo vato ma ka hagavokaria na mako. 61Na Araha ki hagavorara na enoni ma ki tonganira renigi na bunaniata. Ngaia ki haganahunira renigi na mêriha, na manavasua ma na aitangisiha. 62Ngaigi ka na raramohana God raramohaga hunia i hagavorara na ara ni marâ hato, i giraragi na marâ hato ga pinihi ma ki aitangisigi na raroni na agua ga pinihi.
63Kariaku, na Araha ki giraragi na ara ni katoha iami ma na takoha pinihi igê na aitangihami. Na enoni tasi, ga uhungia viga pinihigi na tasi iata, ngaira ki asa vige tahi. 64Na Araha ki page haharirigi maninga na ara ni tauhami hato ma ki page surigamu renigi. 65Igê na tangiana ni suriha ngekana igamu kamu page bagatatako ngavê. Na tasi hato iami ka page rangaranga mave ma na bagatauhami ka page ranganigamu. 66Hoi, mu page katokato mara ta? Manga i he kanimu girara vigamu pinihigi na tasi iami tenia God ma tenira na angero iana? 67God nga kani page surigamu. Tahema mu magutenia nga! Mu murisigegi na tasi iami, mu kasigi râ na bagatauhami, ma siana hagetage kamu tasitasi aporo nikâ. Vikana God ki page hagatahigamu tenigi na bagabevoani hato ngegana.
68Na eragani nuni rako ka nanê viga hagavato hurigamu ka ngaugamu manga na gi. Ngaira ka page oke rataratagenira tani na hitangimi ma ka page tugurigamu kamu ngaugi na vogasiha iata na enoni ahuroto. 69Manga mu aganarira, ngaira ka page rurusigamu, ka page megamumarabe ma ka page hagamakigamu. 70Igê rako na agua hagarangigi na hinua ngaira ka page hagamamasiagara ngavê igê na enoni ga hagahigasia na Araha. 71Na enoni ga haritaha ngaira ka page mangara na mane vasiga. Ngaira ka page rurugu ma ka page mutera na enoni hato, ga hagahigasia mênga na Araha, ma ki asa vige takira. 72Ngaira ka page paira hura tenigi i pasita ma ka page hanagogi na nahuninga hato iata tenira. 73Ngaia nga ka na matena ni heuhungiha tangara na kariaku hetakui, ma ngaira ka page hagatanga monari, vi ngaira ka matarotaro manga na golo taranina.
74Hoi, mu karinga na tamasinga iana na Araha, i vi: “Kariaku hetakui, na matena ni mamasiaganiha raha ki sugia ma, ma inê be hagatahigamu. 75Siana kamu magu se vigamu hehagare. Inê nga ka na God iami. Inê nga kani ve bêngenigamu. 76Inê na Araha kê vi, manga mu marupegi na ramata ma na tamasinga iaku, siana kamu nakagi na tasi iami ka higegamu se viga angarigamu. 77I asa vige tahi na enoni, na tasi iata ka rakura, suria ga aharêsira na bagatauhata. Ngaira ka page manga na bena i masigu ngavê ma na tara i aharêvoro na tone ma na rauga kakaruga ka rubuhia ngavê, ma ki bara ngavê ta na enoni vige râ igê. 78Na bena ga bani kasia ma na gi ki page hagamakaka.
Currently Selected:
2 ESETARASE 16: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific