2 ESETARASE 15
15
TANI NIKÂ NA TAMASINGA POROPETE
Na bagabevoani ga sugi akê me
1Na Araha ki vi: “Gu tarohenigi tangara na kariaku na tamasinga poropete gê page vatego renigi, 2ma hemuri ku segegi so, suria ngaigi ka monari ma ka page vagavaga mave me. 3Siana ko magutenira na ani ga harikato renigo se vigo obaera, suria vi ngaira ka pe tongesuri. 4Na ara ni enoni i pe tongesuri ki page meme suria ma na tongesuriha iana marena.”
5Na Araha ki vi: “Inê be hagaitangia na maveta hagenani renigi na bagabevoani era ngavê: na hearihatana ma na magêha, na mera ma na aruhuruhunga, 6suria na eraha ki bani akê me i na ara ni agua ma ki raha ngavê, ma ki bara vige raha nikâ ke arâ i he.”
7Na Araha ki vi: 8“Tahema inê ki hato vi ve munitenigi na bagatauhata na enoni erataga ngegana. Inê ki hato vi ve piringiape. Ngaira ka nahuira ka me na enoni ga pe erasia rârâ ta na marâ ma na gaputa na enoni koro ga mutera, ka avarasiê vigê naka na siva. Na atarota na enoni koro ka ama ni nungiê nga vigê naka na siva. 9Inê na Araha kê vi: I mareha nikâ vi na ta. Inê kê page aganaria na avarasiha iata na enoni koro, ga mutera, ma inê kê page naka na siva tangara na enoni ni henahuta ngegana.
10Ngaira ka torera na kariaku, hanana ga nahuira ka meme manga na totoha ni sipi. Na kariaku ka page hato nga vige oga i Esipito. 11Renigi na raramohaku raha ngavê inê kê page torera hura tenia na agua ngekana. Inê kê page hagaitangira na ai ni Esipito renigi na bagabevoani manga i nago, ma kê page ruhuruhua na apanena iata. 12Na agua hagenani ki page gâga igê na angiha maramara. Na gatani na agua ka page angingi, matena inê na Araha kê nahuia ma kê ama ni tahurua nga. 13Na enoni tagara i mu ka page angiangi, suria na maani na ngêra ka pe baogo ma na apinige ni ngêra iata ka maria renigi na paruhunga, na hêni na rangi ma na roga raha.
14Na maveta ma na enoni igê ka page meme. 15Na hearihatana, i page sinora, ki hagarangi me ngavê. Na agua ka page tangaru ma ka page hearihaheri. 16Ngaira so i na agua ka page heparapara: ta na apaneni me ka uhungia viga akê me teharira ta na apaneni me, hanana viga marungia na agua, suria ga pe botage renia na gavumane ga bani ura me surigi na ramata. 17I bara na enoni vige hura se vige banu purunguni i hinua, 18suria na heparaparaniha ki hagaerasigi na hinua ma ki hagamagusira ma ki hagatugupunira na enoni igê. 19Suria na mane ka magê ma ka mamasiaga ngavê, ngaira ka page taharira na ruma ga merabasigu hetanga ma ka rurugu tenira na nahuninga iata. I mareha ngavê vige hetaki.
20Inê God kê vi: Inê be unira haku me na maneraha hato tenigi na ara ni sukuni na maveta, hanana ga migiaporo me ma ka barubaru aporo na marâ ga bani hanagogi. 21Inê be hagamamasiagara nga tagenana manga ngaira ka bani hagamamasiagara na kariaku hetakui. Inê nga na Araha kani gê tamasi. 22Na raramohaku ki page hitarira ngavê na enoni tasi ma ki asa vi ve takira. Inê be hagamesira nga na enoni hato ga bani nahuira ka me na enoni ga oga suri parongata. 23Na mangariaganiha iaku ki raha ngavê. Na gi ki hura me tenia hanana i hagamakakagi na gatani na maveta henira na enoni tasi igê mangagi na go maria. 24Inê na Araha kê vi: na enoni tasi ga pe marupegi na ramata iaku, ngaira ka page magahuru. 25Inê ki asa be takira! Tari era kamu râ igamu na enoni mu haritoheê tare. Ti kani pasi bâsigamu nikâ? Siana kamu hagaerasia na ruma ni rotu apuna iaku.”
Na maruteha i mamagutaga
26God ki bani girarara na enoni hato ga haritohea. Ngaia ki page tagarenira tangarerua na mera ma na magahurunga. 27Na bagabevoani mamagutaga ka bani tarahua na maveta, ma igamu, ki asa vigamu tahi tenigi. Igamu kamu bani haritohea God ma ngaia ki asa vige hagatahigamu.
28Hoi, igamu kamu page parama ma kamu bâsia na maruteha mamagutaga i kerekê. 29Na mane ni me gahu ni Arabia henigi rako na kati ni me ka page arâ me mangara na bagahua raha. Matena ga tavoraha, na ringeni na suiha iata ka page râhia na maveta hagenani ma ka page hagamagusira ma ka page hagatatanira na enoni hato ga rongogi. 30Na Karamonita ka page vagavaga me tenia na bagavapuna raha. Ngaira ka page mangariaga ngavê mangara na bo mane na vasi. Ngaira ka page merarâ me na mane ni me iata, hanana ga taharira na bagahua raha. Ngaira ka page ngasia na apanena raha i Asiria renigi na rivo sura iata. 31Henaka, ma na bagahua raha ka page hagahakura na mane ni me hato iata ma ka page tehateha. Ngaira ka page kariarigu bê aporo ma ka page tarigenira na bo mane na vasi. 32Na bo mane na vasi ka page tugupu, ka pe gasigasira rârâ. Ngaira ka kariarigu ka gavagava. 33Na bo mane na vasi, na merongata ka page ahikarira i Asiria. Ta na hitangita ki page meme. Na tarana ngekana ki page hagamagusira ma ki page hagatugupunira na mane ni me iata ma na maneraha iata ka page bagatatako.
34Hemuri ka page parama na roto, na roto mamagutaga ma ni mangariaganiha iana na roga raha, ka page buhia na vavearo tenia ta bogona tanga ta bogona. 35Ngaira ka page hetogotogo ma ka page naka na mangariaganiha iata tanga na maveta. Na gaputa na enoni ga me igê na hearihatana, ki page nonga ki tariha akê i obana na hosi, 36se i tangana na mane se i buru ni êgana na kamelo. 37Na enoni suria na maveta hagenani ka page bubununuga ka tatata na matena ga bâsia na maruteha mamagutaga ngekana. 38Tani na roto raha na roga raha ka page arâ me tenirerua na sukuni gi rua ni vavearo ma tani nikâ tenia na sukuna bêso. 39Ma na roga tenia na sukuna bêkê ka page tehateha ma ka page burungigi bê aporo na roto ni mangariaganiha iana na roga raha ga haga ni hagaerasia na maveta. 40-41Na vaha na roga raha, ga bagaraha, ka raramohaga ma ka mangariaga, ka page akê me ma ka page hagaerasia ngavê na maveta hagenani henira na enoni igê. Na roga raha na gi mamagutaga, na hêni na rangi ma na tatapa borahu ga togatoga, ka page hagavato hurira na enoni raha ga nahuni ramoha. Na ara ni ve ka page maganu ma ka page anuigi na bena, ma na maganuha 42ka page hogegi na hinua ma na para igê ma ka page hagamaoparigi na barani ma na hungani henigi na vapuni ma na mu. 43-44Na tarana ngekana ki page arâ nga mataro me ki tariha i Babilone ma ki anuia. Na roga raha i raramohaga ngavê ki page ruhuruhua. Na momogana ma na roborobona ka page vora re na bagavaha raha i akê i vavearo. Na hinua hato hagarangia i Babilone ka page angi maramara renia. 45Na ani ga tahitahi ka page vora re na kare rakuraku iata na ani ga ruhuruhua na hinua
I Asia ki asa vige tahi
46-47I Asia, na enoni ki ararira, viga takigo. I asa iamu vigu tahi! Igo ko bani ageagesigi na bâkorohana ma na raramohana i Babilone. Igo ko bani amaka suria ma igo ko bani hagesurura ka karemu mangara na êra, hanana ga hagakoro obata ma ka aganarira na maharamu, ga bani tenigo tare me. 48Suria igo ko bani amaka suria na êrâ erataga ngekana igê na ara ni tauhana ma na katoha iana, tahema God ki vi vikê. 49“Inê be katogi na bagabevoani ke tarahugo. Inê be katogo ku nâ. Inê be kuasigo renigi na matarehanga, na magêha, na hearihatana ma na ringa, hanana ga hagaerasigi na ruma iamu ma ka ruhuruhugi ma ka hagamesira na karemu. 50Na ramoha, go paroparo renia, ki page maugu manga na mahe, matena na bababa ki page nahuigo. 51Igo ko page vora re na gete, go bâera, go memega, go rupugapuga, go baro apaparoroga ma ko mamari. Vikana igo ko page hato vigu ura haha nikâ tangara maharamu, ga ruruguha. 52Inê na Araha kê vi: Inê ki asa be hagaitangigo bâraha vikana, 53manga igo ma ko pe mutera na kariaku hetakui. Ma igo ko ageagesia ngavê hete, hanana go nahuira, ma na matena i ruguhigo na tonoha, igo ko parangasi vigo mutera.
54Gu pupuni na maamu. 55Igo ko page nahunia na memu go êrâ. Igo ko page nahunia na mena na tagaraha iamu. 56Inê na Araha, kê vi: Inê kê page vurigo meni na bagatauhamu tangara na kariaku hetakui. Inê kê page kuasigo renigi na bagabevoani. 57Igo ka page nahuigo ko meme ma na karemu ka page mesi magêha. Ga page hogegi na hinua iamu ma ka page mutera na enoni ga oga tarege râ tenigi na hinua. 58Na enoni, ga ogasigi na hungani, ka page mesi magêha. Ngaira ka page ngaugi so na hasigota mareta, suria ga magê teha ngavê. Ngaira ka page tonomigi so na gaputa mareta, suria i mamata ngavê na riota. 59Igo ko page mamasiaga ngavê teharia na anima na enoni i nago ki râme. Henaka, ma na hagaitangiha ka page tarahugo akê nikâ. 60Na mane ni me, ga bani ruhuruhua i Babilone, ka page tavo uga aporo ka aharêvoro igê na apanena iamu ma ka page ruhuruhua na hinua purupurunguniaga iamu. Ngaira ka page hagamakaka na marâ bâkoro iamu ki aruhuruhu. 61Na apanena iamu ki page makaka, mangagi na go maria igê na gi. 62Ngaira ka page sungigi na vapuni iamu ma na pariki ni apinige ni ngêra iamu. Suria na apanena hagenani iamu na aruhuruhunga ki page aharêsigi na hinua iamu ma na hungani. 63Na bâkorohamu ki page magahuru. Ga page henahuraura na karemu. Ga page rurugugi na nahuninga iamu.”
Currently Selected:
2 ESETARASE 15: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific