LUKA 8

Na gete ga takua o Jesu

1Ta na matena i muri o Jesu ki vatugigi na hinua, na ani raha ma na ani sisite, ma ki ateate renia na Taroha Koro renia na Arahanga iana God. Na kariana tangahuru matarerua ka takua, 2ma nikâ tani na gete. O Jesu ki bani hagakomagara tani, ga atataroga, ma tani, ga ape era. Na gete ngegê kani ka Maria (ta na atana nikâ ka Matalena), o Jesu i bani paira hura na ataro era gi pi tenia; 3ma ka Joana na gete iana o Gusa, i onosurigi na marâ iana o Herote; ma ka Susana, ma rako na gete getera, ga tamanira o Jesu ma na kariana renigi na nahuninga iata.

Na tamasinga maramaraveta renigi na maani na koni

(Mt 13.1-9; Mk 4.1-9)

4Na enoni ka ama ni arâ me ma tanga o Jesu tenigi na hinua. Ma na matena na enoni ka rako era me, o Jesu ki visia na tamasinga maramaraveta ikê, ki vi: 5“Ta na mane ki râ ki tokorenigi na maani na koni i mu iana. Matena i tokorenigi na maani na koni, tani na maani ka vota so i tara. Na enoni ka purigi ma na manu ka ngêgi. 6Tani na maani ka vota so igê na mako, i hêga, ma na matena ka vavaka na gokoni, ngaigi ki hatani mêgu, renia na mako ki avagavaga. 7Tani na maani ka vota so i gupuni na tone. Na tone ka vavaka haku henigi na maani ma ka rubuhigi. 8Ma tani na maani ka vota so igê na mako koro: ka akê na gokoni, ma ka hungu, ma ka rako era na guani ma ka borahu.” Mo Jesu ki vi nikâ ki vi: “Mu rongo, manga vigamu karinga renigi na karingami!”

Suria i hega na tamasinga maramaraveta?

(Mt 13.10-17; Mk 4.10-12)

9Na kariana ka hagatea o Jesu renia na girarana na maramaraveta ngekê. 10O Jesu ki arami, ki vi: “Igamu kamu bani giraragi mataha noga na katoha iana God, na Araha; ma na enoni getera, ga oga hura, ngaira ka rongogi na katoha ngegana renigi na maramaraveta, hanana vi ngaira ke bâbâ ma ka pe bâgirara, ma ke rongo ma ka pe rongogirara.

Na girarana na maramaraveta renigi na maani na koni

(Mt 13.18-23; Mk 4.13-20)

11“Ikê ki na girarana na tamasinga maramaraveta. Na maani na koni ki na tamasinga iana God. 12Na maani, ga vota so i tara, ngaira ka na enoni, ga rongoa na taroha; ma Satana ki râ me ma ki torea vê na taroha tenigi na aitangihata, hanana vi siana ngaira ka tongesuria ma ka tahitahi. 13Na maani, ga vota so igê na mako i bêratega, ngaira ka na enoni, ga rongoa na taroha ma ka têa ma ka vagevage renia. Ma ki asa, vi ge tâ tonge i obata; ngaira ka tongesuria igê na kere matena abubu ma, ma ka kasia râ, matena i tarahura na heuhungiha. 14Na maani, ga vota so i gupuni na tone, ngaira ka na enoni, ga rongoa na taroha; ma ngaira ka takoha bâraha ma renigi na marâ ni maveta, ma ka vanasigi na ruruguha, ma ka tenigi rako na marâ getigi. Na marâ hato ngegana ka heboroge i obata, ma ka rubuhia na taroha, ma ngaira ka takataka anunu. 15Ma na maani, ga vota so igê na mako koro, ngaira ka na enoni, ga rongoa na taroha ma ka têa maninga, ma ka râ suria ki bê ki arâ, mataro me ka hunguhungu bâkoro.

Na laiti ruguhana na apira

(Mk 4.21-25)

16“I asa na enoni, vi ge tanga na laiti ma ke buhia renia na apira, se vi ge naka i ruguhana na bea. Mareha! Ngaia ki naka hete na laiti igê na atohana na laiti, hanana na enoni ka rigia na laiti, matena ga bêbanu me i ruma. 17Na ara ni marâ, ga oga pinihi, ka page nakagi mave, ma na ara ni marâ, ga aba, ka page gagatenigi ma ka nakagi mave.

18“Hoita, mu karinga manga hanana mu karinga. Renia ga page vateakê nikâ ta na marâ tanga na enoni, i bani nahunia ta na marâ; ma na enoni, i pe nahunia rârâ ta na marâ, ka page tavoa râ tenia na kere marâ sisite, i takusia, vi nahunia.”

Kenana ma na goana o Jesu

(Mt 12.46-50; Mk 3.31-35)

19Kenana ma na goana o Jesu ka râ me, vi ga bâsia, ma ki bara tangara, vi ge ura râ i pasina, suria ga rako era na enoni. 20Ta na enoni ki vi tanga o Jesu, ki vi: “Kenamu ma na goamu kaniga gâga i metara ga obanigo.” 21Mo Jesu ki vi tangara na enoni hato, ki vi: “Kenaku ma na goaku ka na enoni, ga rongoa na tamasinga iana God ma ka râ suria.”

O Jesu ki hagapiova na rano

(Mt 8.23-27; Mk 4.35-41)

22Ta na tangiana o Jesu ma na kariana ka tage igê na kere haka, mo Jesu ki vi tangara, ki vi: “Nika, ge tarê i na apanena tarê na rano.” Ma ngaira ka tavoraha. 23Matena ga tage ka arâ, o Jesu ki mamêruga ma ki mêru. Ki parama ma ki tarêheroga ma ki aputaputa na rano, ma na navo ka akêhia na kere haka, ma ngaira ka haga ni kokoro. 24Na kariana ka râ ka hagaritea o Jesu, ka vi: “Araha, Araha! Sugia ma ge meme!” O Jesu ki aharaga, ma ki bonasirerua na roga ma na navo aputaputa karu so, ma ki piova ngavê. 25Ma hemuri ngaia ki vi tangara na kariana, ki vi: “I he na tongesuriha iami?” Ma ngaira ka konekone ka magu, ma ka hetamatamasi, ka vi: “Vania kini noga? Ngaia ki bonasirerua na roga ma na navo, ma ngairerua karu râ suria na tamasinga iana!”

O Jesu ki hagakomaga na mane i atataroga

(Mt 8.28-34; Mk 5.1-20)

26Ngaira ka tage tarê tanga na mako iata na Ai ni Gerasene, i na apanena tarê na Rano ni Galilea. 27Matena o Jesu ki reke vato i one, ta na mane i atataroga i hinua i ngekana ki râ me vurusia. Ngaia ki bani râ rupaturi kere vê noga, ma ki pe oga rârâ i hinua. Ngaia ki oga ma igê na vaba, ga bêbagi nuni igê. 28Matena i bâsia râ o Jesu, ngaia ki aba so i maana o Jesu, ma ki ngere raha, ki vi: “Jesu, Karena God Raha Teha! Na ta kanigo obania tangê? Inê kê nungigo, siana ko hagaitangiê!” 29Ngaia ki tamasi vikana, suria o Jesu ki bani bonasia na ataro era, ki hura tenia. Hagarako na ataro era ki angaria. Henaka na enoni ka mamaisuria ma ka rakuraku na êgana ma na rimana renigi na seni, ma ngaia ki musigi ma na seni, ma na ataro era ki hagatakusia, ki arâ igê na manihê.

30O Jesu ki hagatea, ki vi: “O ti na atamu?” Ma ngaia ki arami, ki vi: “Na ataku ka no Rako.” Renia ga rako na ataro era, ga angaria. 31Na ataro era ka nungia o Jesu, vi siana ki kasira so igê na agua ni hagaitangiha.

32Na totoha raha ni bo ka gâga hagarangi i ngekana, ga suasua igê na apanena na kere hungana. Na ataro era ka nungia o Jesu, vi hagamarumungenira, ka bêbanu i apeta na bo. Ma ngaia ki hagamarumungenira. 33Ngekana na ataro era ka hura me tenia na mane ma ka banu i apeta na bo. Na totoha hagenani ni bo ka tango ka rere igê na apanena na suragina, ma ka vota igê na rano, ma ka tono ka me.

34Na mane, ga bâsurira na bo, ka rigia na tarana ngekana. Tahema ngaira ka gava, ma ka tokorenia na rongoha renia na tarana ngekana i hinua raha ma i hinua sisite. 35Na enoni ka râ, vi ga geria na tarana ngekana. Ngaira ka râ i pasina o Jesu, ma ka tarahua na mane, na ataro era ga bani hura tenia. Ngaia ki oga so i ano hagarangia o Jesu. Ngaia ki hagesuru ma ki kahu takotako oto aporo. Ma ngaira hato ka magu. 36Ngaira na enoni, ga bâsia, ka hagarongora na enoni getera renia i tanu hega kini komaga. 37Ma ngaira hato na enoni igê na apanena iata na Ai ni Gerasene ka vi tanga o Jesu, ki râ vê tenira, renia ngaira hato ka magu teha ngavê. Tahema o Jesu i tage igê na kere haka, ma ki aporo. 38Na mane, ga bani hura tenia na ataro era, ki nungia o Jesu, ki vi: “Nakê be râ henigo.”

Ma o Jesu ki hagatorangenia vê, ki vi: 39“Gu aporo i pasimu, ma ku hagarongora na enoni renia na tarana, God i katogo renia.” Na mane ki râhia na hinua hagenani, ma ki hagarongora na enoni renia na marâ, i katoa o Jesu tanga.

Ka karena o Jairo mo Jesu i hagakomaga ta na gete

(Mt 9.18-26; Mk 5.21-43)

40Matena o Jesu ki aporo tarê i na apanena tarê na rano, na hakuta na enoni ka râ vurusia, renia ngaira hato ka bani oga naasia. 41Ma ta na mane ki ata me, o Jairo na atana. Ngaia ki bâsuria na sukuru i ngekana. Ngaia ki susure i maana o Jesu, ma ki nungia, vi arâ i pasina, 42renia ka karena ki sugi meme noga; na kare i tage iana, ma ki vora na harisi tangahuru matarerua iana.

Matena o Jesu ki râ, na enoni ka heparapara renia. 43Ma i ngekana ki oga nikâ igê ta na gete, i hatamia na mamasiaganiha renia na gapugapu raha surigi na harisi tangahuru matarerua. Ngaia ki bani hatungigi na nahuninga iana tangara na mane mangata, ma ki asa na hitangita, vi ge hagakomaga. 44Ngaia ki ahehe me i guputa na enoni i murina o Jesu, ma ki hataria na bogona na tuguni iana o Jesu, ma ki parama na gapugapu raha, ma ki hato hagetage tenia. 45O Jesu ki hagate, ki vi: “Se, ti kani hatariê?” Na enoni hato ka vi, vi ngaira ki mareha. Mo Petero ki vi: “Araha, na enoni ka hakurigo bâraha ma ka hepara rihigo.”

46Mo Jesu ki vi: “Ta na enoni ki hatariê, renia inê kê girara, na raramohaku ki bani tagara noga.” 47Na gete ki girara, ga sugi tarahua, vi ngaia. Tahema ngaia ki tata ki râ me, ma ki aba so i maana o Jesu. Ma i ngekana, i maata na enoni hato, ngaia ki hagarongoa, vi suria i hega kani hataria, ma ki tanu hega kani komaga ototo râ nga. 48O Jesu ki vi tanga, ki vi: “Kareku, na tongesuriha iamu ki hagakomagago. Gu arâ ma ko mauru koro.”

49Matena o Jesu ki tamasi mênga vikana, ta na mane i totora tamasinga ki râ me tenia na ruma iana o Jairo, na mane i bâsuria na sukuru, ma ki hagarongoa, ki vi: “Ka karemu ki me. Go tamasi purusia na Araha, siana ki arâ me.” 50Mo Jesu ki rongo vikana ma ki vi tanga o Jairo, ki vi: “Siana ko tako bâraha. Gu tongesuri ma, ma hanana ngaia i page mauri aporo.”

51Matena o Jesu ki ata me i metara na ruma, ngaia ki pe obania ta na enoni, ve ge bêbanu henia, nga noga ma o Petero mo Joane mo Jakobo ma o vaemana ma kenana na kare. 52Na akêkuha kani i ngekana. Na enoni hato ka angiangi maramara renia na kare, i me. O Jesu ki vi: “Siana kamu angi maramara. Na kare ki pe me. Ngaia ki mêru ma.”

53Ma ngaira hato ka rurusia, renia ngaira ka bani girara, vi na kare ki bani me. 54Mo Jesu ki here i rimana, ma ki tamasi raha, ki vi: “Kego, gu aharaga!” 55Ma ngaia ki mêri aporo, ma ki aharaga ototo râ nga. Mo Jesu ki vi tangarerua na enana na kare, karu vatea na ngêra, ki ngê. 56Na enana karu konekone ngavê, ma o Jesu ki hagapêpurerua, vi siana karu hagarongoa rârâ ta na enoni renia.

Currently Selected:

LUKA 8: KCB

Highlight

Copy